သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼိူဝ်သဵၼ်ႈတၢင်းလူင် မိူင်းႁူမ်ႈတုမ် ၼႂ်းၸႄႈဝဵင်းၵူတ်ႉၶၢႆ ၸဝ်ႈရူတ်ႉၸဝ်ႈၵႃး လႆႈၵိုတ်းယင်ႉ ဢမ်ႇၸၢင်ႈၵႂႃႇမႃးၵၼ်။

မိူဝ်ႈၼႆႉ ဝၼ်းတီႈ 29/5/2020 တႄႇဢဝ် ယၢမ်းၵၢင်ၼႂ်မွၵ်ႈ 10 မူင်း သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းၵႄႈမၢၼ်ႈလွႆ – ၵူတ်ႉၶၢႆ ၼိူဝ်သဵၼ်ႈတၢင်းလူင် မိူင်းႁူမ်ႈတုမ် ၵူတ်ႉၶၢႆ – မူႇၸေႊ ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ သွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း၊ ၵူၺ်းၵႃႈ ၵဵဝ်ႇလူၺ်ႈလွင်ႈၵူၼ်းမိူင်း ပၢႆႈၽေးလႄႈ မၢတ်ႇၸဵပ်းလူႉတၢႆ ၸွမ်းတႄႉ ပႆႇလႆႈႁူႉ-ၼႆယဝ်ႉ။

ၸၢႆးႁိၼ်လဵၵ်း ၸုမ်းၶၢဝ်ႇ ထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ပၢင်တိုၵ်းၼႆႉ တႄႇမိူဝ်ႈၼႆႉ ယၢမ်းၵၢင်ၼႂ်မႃး တေႃႇထိုင်တေႃႈလဵဝ် သဵင်ၵွင်ႈယင်းပႆႇယဵၼ်၊ ၸဝ်ႈရူတ်ႉၵႃးၶဝ် ဢမ်ႇၸၢင်ႈၶိုၼ်ႈလူင်း ၶမ်ဝႆႉယူႇၸွမ်းတၢင်း။ လွင်ႈၵူၼ်းပၢႆႈၽေး လူႇတၢႆ မၢတ်ႇၸဵပ်း ယွၼ်ႉပၢင်တိုၵ်းၼၼ်ႉတႄႉ ဢမ်ႇပႆႇလႆႈငိၼ်းသင်၊ ယၢမ်းလဵဝ် သဵင်ၵွင်ႈပႆႇယဵၼ်လႄႈ ပႆႇလႆႈႁူႉၶေႃႈမုလ်းသင်” ဝႃႈၼႆ။

ပၢင်တိုၵ်းဢၼ်ၶဝ်ပဵၼ်ၵၼ်ၼၼ်ႉ မၼ်းပဵၼ်တီႈႁိမ်းဝၢၼ်ႈၼမ်ႉၵူတ်ႉ တီႈသူႉၶိၼ်းတႃႇ ဢွင်ႈတီႈၵႃးလူင် ၶွင်ၵူၼ်းမိူင်း ဢၼ်ၺႃးၽဝ်မိူဝ်ႈပူၼ်ႉမႃးၼၼ်ႉ ဝႃႈၼႆ။

တေႃႇလွၼ်းၺွႆႇ ၵူၼ်းဝၢၼ်ႈ ၼမ်ႉၵူတ်ႉ လၢတ်ႈတီႈၽူႈတွႆႇႁွၵ်ႈဝႃႈ – ႁဝ်းၶႃႈၵူၼ်းၸိူဝ်းယူႇၼွၵ်ႈဝၢၼ်ႈ 4-5 ႁိူၼ်းတႄႉ ဢွၼ်ၵၼ်ပၢႆႈမႃးမူၵ်းယူႇသဝ်း ဝႆႉတီႈႁိူၼ်းၵူၼ်းႁူႉၸၵ်း ၼႂ်းဝၢၼ်ႈဝႆႉယူႇ – ဝႃႈၼႆ။

တေႃႈလဵဝ် ၸဵမ်ၸဝ်ႈရူတ်ႉ ၸဝ်ႈၵႃး ၵူၼ်းမိူင်းပိုၼ်ႉတီႈ ၸိူဝ်းၼၼ်ႉတႄႉ ပႆႇႁတ်းလတ်းၽၢၼ်ႇၵႂႃႇမႃး တီႈၼိူဝ်သဵၼ်ႈတၢင်းၼၼ်ႉ ယွၼ်ႉပၢင်တိုၵ်းယင်းပႆႇယဵၼ်လူင်းလီလီ ။

မၢႆးမၢႆႇ ၵူၼ်းၼုမ်ႇၵူတ်ႉၶၢႆၵေႃႈလၢတ်ႈတီႈၽူႈတွႆႇႁွၵ်ႈဝႃႈ- ၼႂ်းဝဵင်းၵူတ်ႉၶၢႆၵေႃႈ တပ်ႉသိုၵ်းမၢၼ်ႈၶဵင်ႈၶႅင်လွင်ႈႁူမ်ႇလူမ်ႈသေ ပႂ်ႉၵူတ်ႇထတ်းၵူၼ်းၵႂႃႇမႃးယူႇ။ ၼႂ်းသွင်သၢမ်ဝၼ်းၼႆႉတႄႉ လႅပ်ႈတေမီးလွင်ႈတူင်ႉၼိုင်ၵၢၼ်သိုၵ်းထႅင်ႈယူႇ ၼႂ်း သွင်သၢမ်ဝၼ်းၼႆႉ- ဝႃႈၼႆ။

ၵဵဝ်ႇၵပ်းလွင်ႈပၢင်တိုၵ်းတီႈၵူတ်ႉၶၢႆၼႆႉသေ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး ၽူႈၶၢၼ်ပၢၵ်ႇတပ်ႉသိုၵ်း TNLA လၢႆလၢႆၵမ်းယူႇၵေႃႈ ၵပ်းသိုပ်ႇဢမ်ႇလႆႈ။

ၵူၺ်းၵႃႈ ႁွင်ႈၵၢၼ်ၾၢႆႇပိုၼ်ၽၢဝ်ႇတပ်ႉသိုၵ်းတဢၢင်း TNLA ပိုၼ်ၽၢဝ်ႇဝႆႉဝႃႈ ၼႂ်းလိူၼ်မေႊ ပီ 2020 ၼႆႉ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ဢမ်ႇယွမ်း 3 ပွၵ်ႈယဝ်ႉ  ဝႃႈၼႆ။