လူင်ပွင်ၸိုင်ႈမိူင်းတႆး တေၵမ်ႉၸွႆႈငိုၼ်းတွင်း ပၼ်ၵူၼ်းမိူင်း ၸိူဝ်းဢမ်ႇမီးၵၢၼ် ဢမ်ႇမီးငိုၼ်းၶဝ်ႈ ယၢပ်ႇယၢၵ်ႈတႃႇႁႃၵိၼ်လဵင်ႉတွင်ႉ ၶၢဝ်းပၼ်ႁႃတၢင်းပဵၼ်ၶူဝ်ႊဝိတ်ႉ – 19 ။
ၸွမ်းၼင်ႇ လူင်ပွင်ၸိုင်ႈ ၼေႇပျီႇတေႃႇ ပူင်တမ်းသေ ယူႇတီႈလူင်ပွင်ၸိုင်ႈမိူင်းတႆး တေတႄႇၵမ်ႉၸွႆႈငိုၼ်းတွင်းပၼ် ၵူၼ်းမိူင်း ၸိူဝ်းဢမ်ႇလႆႈႁဵတ်းၵၢၼ် ဢမ်ႇမီးငိုၼ်းၶဝ်ႈ၊ ဝၼ်းတီႈ 15-30/5/2020 ၶၢဝ်းတၢင်း 15 ဝၼ်း တေၸႅၵ်ႇၸုပ်ႈဢွၼ်တၢင်း၊ ၼႂ်းဝၼ်းတီႈ 15-30/6/2020 ထႅင်ႈ 15 ဝၼ်း သမ်ႉ တေပဵၼ်ၸုပ်ႈတီႈသွင် ။
ဢူးၽိဝ်းမိၼ်းထႅၵ်ႉ ၽူႈၵွၼ်းၸႄႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၸႄႈဝဵင်းတူၼ်ႈတီးၼႆႉ တင်းမူတ်းမီး မုင်ႉႁေႃႁိူၼ်း(ၼႃႈႁိူၼ်း) ၼိုင်ႈမိုၼ်ႇသီႇႁဵင်လင်ပၢႆ။ ၼိုင်ႈမုင်ႉႁေႃႁိူၼ်းလႂ် တေၸွႆႈၵမ်ႉထႅမ်ပၼ်ၵႃႈႁိုဝ် ဢၼ်ဝႃႈၼၼ်ႉ ပႆႇႁူႉ။ ၵူၺ်းၵႃႈ တေၸႅၵ်ႇၽဵင်ႇပဵင်းၵႂႃႇၵၼ် တင်းမိူင်းႁူမ်ႈတုမ်ၶႃႈယဝ်ႉ”ဝႃႈၼႆ။
ယူႇတီႈပၢင်ၵုမ်ၶွမ်ႊမတီႊ ယူတ်းယႃ၊ ၵုမ်းၵမ် ႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၸၼ်ႉၸိုင်ႈမိူင်းသေ လႆႈဢုပ်ႇ ဢူဝ်းတူၵ်း လူင်းၵၼ်ဝႃႈ တေၵမ်ႉၸွႆႈၵူၼ်းမိူင်း ၸိူဝ်းႁႃၸဝ်ႉၵိၼ်ၶမ်ႈ၊ ယၢပ်ႇယၢပ်ႈတႃႇႁႃၵိၼ်လဵင်ႉတွင်ႉ ယွၼ်ႉဢမ်ႇလႆႈႁဵတ်းၵၢၼ် ယွၼ်ႉပၼ်ႁႃ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း – ဝႃႈၼႆ။
မိူဝ်ႈၵၢင်လိူၼ်ဢေႊပရိူဝ်ႊပူၼ်ႉမႃးၼၼ်ႉ ယူႇတီႇလူင်ပွင်ၸိုင်ႈသေ ၸွႆႈထႅမ် ၶဝ်ႈၼမ်ႉတင်းၵိၼ် 9 သႅၼ်း တႃႈၼႃႈႁိူၼ်း 1 သႅၼ်လင်ပၢႆ ဝႃႈၼႆသေတႃႉ – ၽွင်းၼၼ်ႉ ၵူၼ်းၵမ်ႈၼမ် ဢမ်ႇလႆႈၽဵင်ႇ မိူၼ်ၼင်ႇ ပွၵ်ႉၸၢၼ်း မူႇၸႄႈ ၵူၼ်းထုၵ်ႇလႆႈၵမ်ႉထႅမ် မီး 600 လင်ႁိူၼ်း( ၵမ်ႈၼမ်ပဵၼ်ၵူၼ်းတၢင်ႇတီႈ မႃးၶၢတ်ႈႁွင်ႈ/ႁိူၼ်းယူႇ)။ ဢၼ်လူင်ပွင်ၸိုင်ႈ တမ်းပၼ် သမ်ႉ မီး တႃႇ 140 ၼႃႈႁိူၼ်းၵူၺ်း။ တၢင်းဝဵင်းၼမ်ႉလၼ်ႈ ၵေႃႈ တေႃႈ ၼင်ႇ ၼၼ်။
ဢၼ်ႁူပ်ႉတၢင်းယၢပ်ႇ ၸိူင်ႉၼႆ ၼႆႉ ၵူၼ်းဝၢၼ်ႈ ၽူႈႁူႉပုၼ်ႈၽွၼ်းၶဝ် လႆႈလူင်းၶဝ်ႈၸူး ၵူၼ်းၸိူဝ်း ဝႃႈလႆႈ ပွင်ပဵၼ် ၼႂ်းပွၵ်ႉၼႂ်းယွမ်ႇ ႁႂ်ႈၸူၵ်းငိုၼ်း ၵမ်ႉၸွႆႈ ဢဝ်ၵႂႃႇသိုဝ်ႉ တၢင်းၵိၼ် တင်းယမ်ႉၸႅၵ်ႇပၼ် ၵူၼ်းၸိူဝ်း ဢမ်ႇလႆႈႁပ်ႉ၊ ၵူၼ်းပိုၼ်ႉတီႈ ၼင်ႇၵၼ် လႆႈ ၸွႆႈထႅမ်ၵၼ်ၶိုၼ်းၵူၺ်း ။
ယွၼ်ႉတၢင်းပဵၼ် ၶူဝ်ႊဝိတ်ႉ 19 ၽႄႈလၢမ်း ပတ်းပိုၼ်ႉလုမ်ႈၾႃႉသေ မိူင်းႁူမ်ႈတုမ်မၢၼ်ႈ တေလႆႈႁပ်ႉငိုၼ်းၵမ်ႉၸွႆႈ US$ 8 လၢၼ်ႉ တီႈငိုၼ်းၵွင်ၵၢင် တႃႇၸွႆႈထႅမ်ၽႄးၽယၢတ်ႈတၢင်းပဵၼ် ၶွင်ယေးငိုၼ်းလုမ်ႈၾႃႉ။ ဢူးၵျေႃႇၸူဝ်းလိၼ်း ၽူႈၶၢၼ်ပၢၵ်ႇ(မၢၼ်ႈ) ယေးငိုၼ်းလုမ်ႈၾႃႉ တႅပ်းတတ်း တႃႇပၼ်မိူင်းႁူမ်ႈတုမ်မၢၼ်ႈ ၼႂ်းၵၢင်လိူၼ်မေႊ 2020 ၼႆႉယဝ်ႉဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ