လူင်ပွင်ၸိုင်ႈမိူင်းတႆး ႁၢင်ႈႁႅၼ်းၶဝ်ႈၼမ်ႉတၢင်းၵိၼ် တႃႇၸွႆႈထႅမ် ၵူၼ်းမိူင်း ၸိူဝ်းတုၵ်ႉယၢၵ်ႈၶၢၼ်ၸႂ် ၽွင်းယၢမ်း တၢင်းပဵၼ်ၶူဝ်ႊဝိတ်ႉ 19 လၢမ်းၽႄႈႁၢဝ်ႈႁႅင်းၼႂ်းမိူင်းတႆး ဝႃႈၼႆ။
ယူႇတီႈလူင်ပွင်ၸိုင်ႈမိူင်းတႆးသေ ၶွတ်ႇၽွတ်ႈဝႆႉ ၶွမ်ႊမတီႊ တႃႇၸွႆႈထႅမ်လွင်ႈၶဝ်ႈၼမ်ႉတၢင်းၵိၼ် ၵူၼ်းမိူင်းတႆး ဝႃႈၼႆ။
ဢူးသူႇရၸေႃးတဵင်း (ႁွင်ႉ) ၵူဝ်ႇတူးငႄႇ ၵႅမ်ႁူဝ်ပဝ်ႈ ၶွမ်ႊမတီႊတႃႇၸွႆႈထႅမ် လွင်ႈၶဝ်ႈၼမ်ႉတၢင်းၵိၼ် ၵူၼ်းမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ သင်ဝႃႈ တၢင်းပဵၼ်ၶူဝ်ႊဝိတ်ႉ 19 လၢမ်းၽႄႈမႃးႁၢဝ်ႈႁႅင်းၸိုင် လွင်ႈၵိၼ်ယမ်ႉၵူၼ်းမိူင်းၵေႃႈ တေၵပ်ႉၵိၼ်းလိူဝ်ႁႅင်း ၵဵဝ်ႇလူၺ်ႈလွင်ႈၵႂႃႇမႃးၵေႃႈတေယၢပ်ႇၽိုတ်ႇ။ ယွၼ်ႉၼၼ်လႄႈ ႁဝ်းၶႃႈႁၢင်ႈႁႅၼ်းဝႆႉ တႃႇတေ ၸႅၵ်ႇ ပၼ် မိူဝ်ႈၽွင်းၼၼ်ႉ။ ၶူဝ်းၶွင်ဢၼ်ႁဝ်းၶႃႈ တေၸႅၵ်ႇပၼ်ၵႂႃႇၼၼ်ႉၵေႃႈယူႇတီႈၽူႈမီး ၼမ်ႉၸႂ်ၸေႇတၼႃႇၶဝ် ၵမ်ႉထႅမ်မႃး သေ ႁဝ်းၶႃႈႁၢင်ႈႁႅၼ်းသိုဝ်ႉဝႆႉ ၶွင်ၵိၼ်ယမ်ႉယဝ်ႉ။ တေႃႈလဵဝ်တႄႉ ယင်းပႆႇၸႅၵ်ႇ ၊ ႁၢင်ႈႁႅၼ်းဝႆႉၵူၺ်းၶႃႈ” ဝႃႈၼႆ။
ငိုၼ်းတွင်းဢၼ် ၽူႈမီးၼမ်ႉၸႂ်ၸေႇတၼႃႇ ဢၼ်လႆႈၵမ်ႉထႅမ်ၸွႆႈၼၼ်ႉ ဢဝ်ႁူမ်ႈၵၼ်တင်းငိုၼ်းၵမ်ႉၸွႆႈဢၼ် ဢူးဢွင်ႇၵူဝ်ႇ ဝိၼ်း ၽူႈၼမ်းၼႃႈ ယေးငိုၼ်းၵမ်ႇပေႃးၸႃႉ လူႇတၢၼ်း 2,000 သႅၼ်ပျႃး ၊ ၸုမ်းလူင်ပွင်ၸိုင်ႈမိူင်းတႆး လူႇတၢၼ်း ၸိူဝ်းၼၼ်ႉသေ သိုဝ်ႉဝႆႉ ၶဝ်ႈ သၢၼ် 7,000 ထူင် ၊ ၼမ်ႉမၼ်း 75,000 တဝ်ႈလႄႈ ထူဝ်ႇလိူင် ၸဵမ်ၸိူဝ်းၼႆႉ ဝႆႉ ႁၢင်ႈႁႅၼ်း တႃႇတေၸႅၵ်ႇပၼ် ဝႃႈၼႆ။
ဢူးသူႇရၸေႃးတဵင်း (ႁွင်ႉ) ၵူဝ်ႇတူးငႄႇ လၢတ်ႈဝႃႈ “ တေၵမ်ႉၸွႆႈတီႈလႂ်၊ ယၢမ်းလႂ်၊ တေၵမ်ႉၸွႆႈၸိူင်ႉႁိုဝ် ဢၼ်ဝႃႈ ၼၼ်ႉ ယူႇတီႈလူင်ပွင်ၸိုင်ႈမိူင်းတႆး ႁၢင်းႁႅၼ်းဝႆႉပၼ်ၵူၺ်း။ ႁဝ်းၶႃႈတႄႉ ၶွတ်ႇၽွတ်ႈၶွမ်ႊမတီႊသေ ၵဵပ်းႁွမ်တွမ်ဝႆႉ ၶူဝ်းၶွင်လႄႈ ႁူမ်ႈၸွႆႈႁႅင်းၶိုင်ပွင်ဝႆႉၵူၺ်းၶႃႈ။ သင်ဝႃႈ ၶွင်ၵိၼ်ယမ်ႉ ၵူၼ်းမိူင်းၵပ်ႉၵိၼ်းလိူဝ်ႁႅင်းမႃး ယူႇတီႈၶွမ်ႊမတီႊတေလူင်းၸွႆႈထႅမ်ၵမ်းလဵဝ်ၶႃႈဢေႃႈ” ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ-19 မီး 20 ၵေႃႉယဝ်ႉ။
Dr. မဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း ၸုမ်းလူင်ပွင်ၸိုင်ႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ဝၼ်းတီႈ 3/4/2020 ၼႆႉ ၵူၼ်းထၢင်ႇထိူမ်ပႂ်ႉတူၺ်းၶူဝ်ႊဝိတ်ႉ-19 တင်းမူတ်း ၼႂ်းမိူင်းတႆး မီး 93 ၵေႃႉ၊ ဢၼ်လႆႈပႂ်ႉတူၺ်းတီႈႁူင်းယႃသမ်ႉ 57 ၵေႃႉ၊ ဢၼ်လူင်းႁူင်းယႃၵႂႃႇယဝ်ႉၼၼ်ႉ 29 ၵေႃႉလႄႈ ထူပ်းႁၼ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 သမ်ႉ မီးၼိုင်ႈၵေႃႉ” ဝႃႈ ၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ