ၵႃးသိုၵ်းလူင်ပွင်ၸိုင်ႈသိုၵ်းမၢၼ်ႈ ႁေႃႈၵႃးၽႃႇတမ်သႂ်ႇ ႁိူၼ်းယေး ၵူၼ်းမိူင်းပွၼ် ဢၼ်ပိုတ်ႇႁၢၼ်ႉၶၢႆၶူဝ်းၵူၼ်းဝၢၼ်ႈ ၵိုၵ်း ၼၼ်ႉ ၾၢႆႇသိုၵ်း လႆႈႁပ်ႉမႄး သၢႆႈတႅၼ်း ပၼ် ၵႃႈလူႉသုမ်းတင်းမူတ်း – ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 9/5/2020 ၼၼ်ႉ ၵႃးတၢင်ႇၶူဝ်းသိုၵ်းလူင်ပွင်ၸိုင်ႈမၢၼ်ႈ လုၵ်ႉတၢင်းလွႆလႅမ် ၶိုၼ်ႈၸူးတူၼ်းတီႈၼၼ်ႉ လေႃႇၽႃႇတမ်သႂ်ႇ ႁၢၼ်ႉၶၢႆၶူဝ်းၵုၼ်ႇ ၶွင်ၵူၼ်းဝၢၼ်ႈ တီႈပွၵ်ႉၵုင်းၵၢတ်ႇ ဝဵင်းမိူင်းပွၼ် ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း၊ လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီးသေတႃႉ မီးလွင်ႈလူႉသုမ်းတင်းၼမ် ဝႃႈၼႆ။

ၵူၼ်းပိုၼ်ႉတီႈ မိူင်းပွၼ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ ဢွင်ႈတီႈပဵၼ်ၼၼ်ႉ ပဵၼ်တၢင်းငႅၵ်းဝႆႉ၊ ၵႃးသိုၵ်းမၢၼ်ႈၼၼ်ႉၽႃႇတမ်သႂ်ႇ ၼႂ်းႁၢၼ်ႉၼၼ်ႉၵမ်းလဵဝ်၊ ႁူဝ်ႉဝၢင်းႁိူၼ်း၊ ၽႃႁိူၼ်း၊ မၢၼ်ႇၵႅဝ်ႈၸိူဝ်းၼႆႉ လူႉၵွႆၵႂႃႇ။ လုၵ်ႉတၢင်းလွႆလႅမ် မုင်ႈၼႃႈမႃးတၢင်းမိူင်းပွၼ်ၼႆႉၶူဝ်းလူႉသုမ်း ၵွႆၵႂႃႇၸိူဝ်းၼႆႉ ယူႇတီႈတပ်ႉသိုၵ်းမၢၼ်ႈ ဢဝ်ပုၼ်ႈၽွၼ်း သၢႆႈတႅၼ်း ပၼ်ၶိုၼ်းမူတ်းယဝ်ႉ၊ မႄးၵုမ်းႁၢၼ်ႉပၼ်ၶိုၼ်းမူတ်းယူႇဢေႃႈ။” ဝႃႈၼႆ။

ႁၢၼ်ႉၶၢႆၶူဝ်းၼၼ်ႉ ၸဝ်ႈၶွင်ပဵၼ် လုင်းတဵင်းတူႇလႄႈ ပႃႈမလႃႇထူၺ်း၊ ႁိူၼ်းလင်ၼႆႉ ႁဵတ်းဝႆႉ 3 ႁွင်ႈတိတ်းၸပ်းၵၼ်၊ ဢၼ်ၵႃးသိုၵ်းမၢၼ်ႈၽႃႇသႂ်ႇၼၼ်ႉ ပဵၼ်ႁွင်ႈၶၢႆၶူဝ်း (ၼႂ်းၵၢင်) ။ ႁိူၼ်းလင်ၼႆႉ ၵႃးၵႂႃႇမႃး ၵႆႉပူၼ်ႉႁႅင်းသေ လေႃႇတမ်ၺႃး။ ၵမ်းၼႆႉ ပဵၼ်ၵမ်းတီႈသွင် ယဝ်ႉ – ၵူၼ်းမိူင်းပွတ်လၢတ်ႈၼႄၼင်ႇၼႆ။