ၶၢဝ်းၾူၼ်ၼႆႉ ၵူၼ်းပၢႆႈၽေးသိုၵ်း မိူင်းရၶႅင်ႇ သႅၼ်ပၢႆ တေယၢပ်ႇၽိုတ်ႇတီႈယူႇ

ၵူၼ်းမိူင်းရၶႅင်ႇ ၸိူဝ်းလႆႈပၢႆးၽေးသိုၵ်းယၢမ်းလဵဝ်မီး သႅၼ်ႁူၵ်းမိုၼ်ႇပၢႆယဝ်ႉလႄႈ ပေႃးထိုင်ၶၢဝ်းၾူၼ်တူၵ်းတႄႉတႄႉမႃး တေႁူပ်ႉလွင်ႈယၢပ်ႇၽိုတ်ႇလိူဝ်ႁႅင်း ဝႃႈၼႆ။

ၸုမ်းၸၢဝ်းၶိူဝ်း ရၶႅင်ႇ REC ဢွၵ်ႇလိၵ်ႈပိုၼ်ၽၢဝ်ႇမိူဝ်ႈဝၼ်းတီႈ 30/4/2020 ဝႃႈ ယွၼ်ႉပၢင်တိုၵ်းၼႂ်းၵႄႈ သိုၵ်းလူင်ပွင်ၸိုင်ႈလႄႈ သိုၵ်းရၶႅင်ႇ AA လႄႈယၢမ်းလဵဝ်ၵူၼ်းပၢႆႈၽေးသိုၵ်းၼႂ်းမိူင်းရၶႅင်ႇ  မီးသႅၼ်ပၢႆ။  ၸိူဝ်းၶဝ်သွၼ်ႈယူႇဝႆႉတီႈ ပၢင်သဝ်းၵူၼ်းပၢႆႈၽေးၽွင်ႈသေဢမ်ႇၵႃး ၵမ်ႈၽွင်ႈ ယူႇသဝ်းဝႆႉတီႈ ႁူင်းႁဵၼ်း၊ ဝတ်ႉဝႃး ၸိူဝ်းၼႆႉ။

ဢူးၸေႃႇၸေႃႇထုၼ်း ၽူႈၼမ်းၼႂ်း ၸုမ်းၸၢဝ်းၶိူဝ်း ရၶႅင်ႇလၢတ်ႈဝႃႈ – “ပီၼႆႉ ပေႃးၾူၼ်တူၵ်းတႄႉတႄႉမႃး ၸိူဝ်းၶဝ်တေႁူပ်ႉလွင်ႈယၢပ်ႇ။ ၵွပ်ႈဝႃႈ သုမ်ႉသွင်း တီႈပၢဝ်သဝ်းၵူၼ်းပၢႆႈၽေးၼၼ်ႉ ယၢမ်းလဵဝ်မၼ်းၽင်ႉယဝ်ႉ။ တႃႇၶဝ်တေမုင်းမႂ်ႇ ၵင်ႈမႂ်ႇၼၼ်ႉ မၼ်းဢမ်ႇငၢႆႈ ။ၶဝ်ဢမ်ႇမီးငိုၼ်း။ ပေႃးဢမ်ႇၸၢင်ႈယူႇတႄႉတႄႉ ၵႃႈတေလႆႈၶွၼ်ႈၵၼ်ယူႇတီႈဢၼ် လင်ၶႃးဢမ်ႇၵွႆ ၼၼ်ႉၵူၺ်းယဝ်ႉ” -ဝႃႈၼႆ။

ၾၢႆႇၼိုင်ႈ ၸိူဝ်းပိုင်ႈဢိင်ယူႇသဝ်းတီႈႁူင်းႁဵၼ်း ၸိူဝ်းၼၼ်ႉၵေႃႈ ဢမ်ႇႁိုင်သင် တေပဵၼ်ၶၢဝ်းပိုတ်ႇႁူင်းႁဵၼ်းၶိုၼ်းယဝ်ႉသေဢမ်ႇၵႃး ပေႃးထိုင်ၶၢဝ်းၾူၼ်မႃး တေယၢပ်ႇၽိုတ်ႇတႄႉတႄႉဝႃႈၼႆ။

တေႃႇလႃႉယိၼ်ႇၽိဝ်ႇ ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်ယူႇသဝ်းဝႆႉတီႈဝဵင်းၸိတ်ႉတူၺ်ႇ လၢတ်ႈဝႃႈ – “ယၢမ်းလဵဝ်လႆႈဢဝ်ၽႃႈယၢင် မုင်းဝႆႉၵူၺ်းလႄႈ ပေႃးလူမ်းပဝ်ႇၵူၺ်းၵေႃႈ သမ်ႉပေႃးပိဝ်ယဝ်ႉ။ ၶႂ်ႈလႆႈတီႈယူႇဢၼ်ၵႅၼ်ႇၶႅင်ဢိတ်းၼိုင်ႈ။ ပေႃးၾူၼ်တူၵ်းလူမ်းပဝ်ႇ တေဢမ်ႇလႆႈမႆႈၸႂ် ”- ဝႃႈၼႆ။

ယူႇတီႈလူင်ပွင်ၸိုင်ႈမိူင်းရၶႅင်ႇသေ ႁဵတ်းဝႆႉပၼ် ပၢင်သဝ်းၵူၼ်းပၢႆႈၽေးသိုၵ်း 7 တီႈ ၼႂ်း 6 ၸႄႈဝဵင်း။ သမ်ႉပိုၼ်ၽၢဝ်ႇဝႆႉဝႃႈ ပေႃးဢမ်ႇလႆႈဢၼုယၢတ်ႈလူင်ပွင်ၸိုင်ႈ ၵူၼ်းပၢႆႈၽေးသိုၵ်း တေဢမ်ႇလႆႈႁဵတ်းသုမ်ႉသွင်းယူႇသဝ်း။ ၵူၺ်းၵႃႈ ၾၢႆႇၸွႆႈထႅမ်ၵူၼ်းပၢႆႈၽေးတႄႉလၢတ်ႈဝႃႈ ၵူၼ်းပၢႆႈၽေးသိုၵ်းမွၵ်ႈ 10 ပိူဝ်ႊသႅၼ်ႊၵူၺ်းလႆႈယူႇတီႈပၢင်သဝ်းဢၼ်လူင်ပွင်ၸိုင်ႈႁဵတ်းဝႆႉပၼ်ဝႃႈၼႆ။

တပ်ႉသိုၵ်းလူင်ပွင်ၸိုင်ႈလႄႈ တပ်ႉသိုၵ်း ရၶႅင်ႇ AA လႆႈပိုတ်းယိုဝ်းၵၼ်မႃးၶၢဝ်းတၢင်း ႁိမ်းၸမ် 2 ပီယဝ်ႉ။ တေႃႇထိုင်ယၢမ်းလဵဝ် ပၢင်တိုၵ်းတိုၵ်ႉႁၢဝ်ႈႁႅင်းယူႇလႄႈ ၵူၼ်းပၢႆႈၽေးသိုၵ်းၵေႃႈ ပႆႇႁတ်းပွၵ်ႈယူႇၶိုၼ်းဝၢၼ်ႈၽႂ်ႁိူၼ်းမၼ်း။

ဢိင်ၶၢဝ်ႇ – DMG