ႁိူၼ်းၵူၼ်းဝၢၼ်ႈၼႂ်းၵိင်ႇၸႄႈဝဵင်းၶူဝ်လမ် လူႉၵွႆၼမ် ယွၼ်ႉၽေးၾူၼ်လူင်လူမ်းလႅင်ႉ

ၾူၼ်လူင်လူမ်းလႅင်ႉ ၽတ်ႉပဝ်ႇတူၵ်းႁႅင်း တီႈဝၢၼ်ႈၼွင်ၶမ်း ၼႂ်းၵိင်ႇၸႄႈဝဵင်းၶူဝ်လမ်၊ ဝတ်ႉမုၼ်ၸဝ်ႈ လင်ႁိူၼ်းၵူၼ်းဝၢၼ်ႈ ၵူၼ်ႇပင်းလူႉၵွႆ လင်ၶႃးမုင်းၵွၵ်းပိဝ်ၼပ်ႉသိပ်းလင်ပၢႆ။

မိူဝ်ႈဝၼ်းတီႈ 11/05/2020 မွၵ်ႈယၢမ်း 4 မူင်းၶိုင်ႈႁူဝ်ၶမ်ႈ၊ ၾူၼ်လူင်လူမ်းလူင် ၽတ်ႉပဝ်ႇတူၵ်းႁႅင်း တီႈဝၢၼ်ႈၼွင်ၶမ်း ဢိူင်ႇႁူဝ်ၼွင် ၵိင်ႇၸႄႈဝဵင်းၶူဝ်လမ်။ လင်ႁိူၼ်းၵူၼ်းဝၢၼ်ႈ ပႃးၸဵမ် ဝတ်ႉၵျွင်း မုၼ်ၸဝ်ႈ လင်ၶႃးၵွၵ်းပိဝ် ၵူၼ်ႇပင်းၵႂႃႇတင်းမူတ်း 14 လင်-ၼႆယဝ်ႉ။

ၼၢင်းၶမ်းဢိင်ႇ ၵူၼ်းၶူဝ်လမ် ၸွမ်းလူၺ်ႈၼႃႈၵၢၼ်သေၵႆႉလတ်းၽၢၼ်ႇၵႂႃႇမႃး ပွတ်းတွၼ်ႈၼၼ်ႉ လၢတ်ႈဝႃႈ- “ပေႃးပႃးဝတ်ႉမုၼ်ၸဝ်ႈၵွႆတင်းမူတ်း 14 လင်၊ ပႃးႁိူၼ်းပီႈၼွင်ႉလႃးႁူႇ၊ ႁိူၼ်းပီႈၼွင်ႉလွႆ ၵွႆသၢမ်လင်၊ မၢင်ႁိူၼ်းၵူၼ်ႇပင်းလူႉၵွႆတင်းမူတ်း၊ မၢင်ႁိူၼ်းဝၢင်ႈၵႂႃႇၽၢၵ်ႇၼိုင်ႈ၊ ၵျွင်းမုၼ်ၸဝ်ႈတႄႉ လဵၵ်းမုင်းမၼ်းယၢတ်ႇတူၵ်းမူတ်း ဢမ်ႇမီးသင်ယဝ်ႉ။ ၵျွင်းမုၼ်ၸဝ်ႈၼႆႉ ပႆႇၸႂ်ႈၵျွင်းတႄႉတႄႉ တိုၵ်းပဵၼ်ၸလွပ်ႈၵူၺ်း၊ ၸလွပ်ႈၼႆႉၵေႃႈယင်းတိုၵ်ႉသၢင်ႈပႆႇယဝ်ႉ တိုၵ်ႉၵင်ႈဝႆႉၽႃမၼ်းၽၢၵ်ႇၼိုင်ႈ ၵူၺ်း”-ဝႃႈၼႆ။

ပီႈၼွင်ႉၵူၼ်းမိူင်းၸိူဝ်းယူႇသဝ်းၵိၼ်သၢင်ႈ တီႈဝၢၼ်ႈၼွင်ၶမ်းၼႆႉ မီးပီႈၼွင်ႉမႅဝ်ႉ၊ ပီႈၼွင်ႉလွႆ၊ ပီႈၼွင်ႉလႃးႁူႇ၊ ပီႈၼွင်ႉတႆး။ ပီႈၼွင်ႉမၢၼ်ႈတႄႉ တေဢမ်ႇပေႃးမီး၊ ပေႃးမီးၵေႃႈ တေမီးဢၼ်လုၵ်ႉ တၢင်ႇတီႈသေ မႃးႁဵတ်းၵၢၼ်ဢိတ်းဢွတ်း- ၸၢႆးမူၼ်း ၵူၼ်းၶူဝ်လမ် (ၶူဝ်ၶမ်း)  လၢတ်ႈၼင်ႇၼႆ။

ၸၢႆးမူၼ်းသိုပ်ႇလၢတ်ႈဝႃႈ- “တီႈတၢင်းၶူဝ်လမ်ၼႆႉ လူမ်းတႄႉမႃးယူႇ၊ ၵူၺ်းမၼ်းဢမ်ႇပေႃးႁႅင်း၊ ၾူၼ်ၵေႃႈတေႃႉတႄႉယွႆးၵူၺ်း လိၼ်ယင်းဢမ်ႇ ယမ်းသဵင်ႈ။ ဝၢၼ်ႈၼွင်ၶမ်းၼႆႉ မၼ်းယူႇၼႂ်းၵႄႈၵၢင်ၶူဝ်လမ်တင်းၵဵင်းတွင်း၊ ပေႃးလုၵ်ႉတီႈၶူဝ်လမ် ၵႂႃႇထိုင်ဝၢၼ်ႈၼၼ်ႉ မီး 19 လၵ်း၊ ၵွပ်ႈၼၼ် တီႈၼၼ်ႈဝၢၼ်ႈၼွင်ၶမ်း ၼႆၵေႃႈႁွင်ႉ ဝၢၼ်ႈသိပ်းၵဝ်ႈလၵ်းၼႆၵေႃႈႁွင်ႉ”-ဝႃႈၼႆ။

ၵဵဝ်ႇၵပ်းလွင်ႈၼႆႉ ၶၢဝ်ႇၽႃႇသႃႇမၢၼ်ႈတၢၼ်ႇလုၼ်ႇတူၺ်းၶျိၼ်း ဢွၵ်ႇဝႆႉဝႃႈ- ႁိူၼ်းၵူၼ်းဝၢၼ်ႈ ၵူၼ်ႇပင်းလူႉၵွႆ 2 လင်၊ တႃႇႁိူၼ်း 10 လင်သမ်ႉ လင်ၶႃးမုင်းၵွၵ်းပိဝ်။ လိူဝ်သေၼၼ်ႉ တူၼ်ႈမႆႉၵေႃႈ လူမ်ႉတဵင်တတ်းၼၢင်ၵၢင်တၢင်း၊ ယူႇတီႈၸဝ်ႈၼႃႈတီႈလၢႆၾၢႆႇလၢႆႁွင်ႈၵၢၼ် ဝဵင်းၶူဝ်လမ် လႆႈႁူမ်ႈၵၼ်လူင်းပိုၼ်ႉတီႈၸွႆႈၵႂႃႇတတ်းလိူဝ်ႈၾၼ်းမႆႉ ၸိူဝ်းလူမ်ႉတဵင်တၢင်းဢွၵ်ႇပႅတ်ႈ။ သၢႆၸႂ်ၵူၼ်းလႄႈတူဝ်သတ်းလဵင်ႉၸိူဝ်းၼႆႉၵေႃႈ ဢမ်ႇမီးလွင်ႈတုမ်ႉတိူဝ်ႉသင်-ဝႃႈၼႆ။

ဝၢၼ်ႈၼွင်ၶမ်းၼႆႉ ယူႇၼႂ်းဢိူင်ႇႁူဝ်ၼွင် ၵိင်ႇၸႄႈဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈ လွႆလႅမ် ၸိုင်ႈတႆးပွတ်းၸၢၼ်း။ မီးၾၢႆႇဢွၵ်ႇဝဵင်းၶူဝ်လမ် ယၢၼ်ၵႆမွၵ်ႈ 19 လၵ်း-ၼႆယဝ်ႉ။