Friday, March 29, 2024

သဵင်မၢၵ်ႇတႅၵ်ႇတီႈမူႇၸေႊထႅင်ႈ 2 ၵမ်း ၵူၼ်းမိူင်းတူၵ်းၸႂ်

Must read

သဵင်မၢၵ်ႇတႅၵ်ႇတီႈမူႇၸေႊထႅင်ႈ 2 ၵမ်းထပ်းၵၼ် တၢင်းပွၵ်ႉၸွၼ်ႊၸူဝ်ႇ ႁဵတ်းႁႂ်ႈၵူၼ်းမိူင်းတိုၼ်ႇသၢၼ်ႈ တူၵ်းၸႂ် ဝႃႈၼႆ။

- Subscription -

 

မိူဝ်ႈၼႆႉ ဝၼ်းတီႈ 12/5/2020 ယၢမ်းၵၢင်ၶိုၼ်း မွၵ်ႈ 10 မူင်း (ၶၢဝ်းယၢမ်းမိူင်းတႆး) မၢၵ်ႇတႅၵ်ႇတီႈပွၵ်ႉၸွၼ်ႊၸူဝ်ႇ ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ  2 ၵမ်းထပ်းၵၼ်။ ၵဵဝ်ႇလူၺ်ႈလွင်ႈၼႆႉ ယူႇတီႈၽူႈမီးပုၼ်ႈၽွၼ်း တိုၵ်ႉၵူတ်ႇထတ်းလွင်ႈတၢင်းမၼ်းယူႇ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်မၢၵ်ႇတႅၵ်ႇထႅင်ႈၶႃႈ တီႈပွၵ်ႉ ၸွၼ်ႊၸူဝ်ႇႁဝ်းၼႆႉၵူၺ်း။ လႅပ်ႈပဵၼ်တီႈႁိမ်းယွမ်ႇ ပျီႇတူႉၸိတ်ႉပၢၼ်းသေးၶဝ်ၼၼ်ႉၶႃႈ။ တေႃႈလဵဝ် ယူႇတီႈၽူႈၵွၼ်းပွၵ်ႉႁဝ်း လႄႈ ၽူႈမီးပုၼ်ႈၽွၼ်း တိုၵ်ႉလူင်းၵူတ်ႇထတ်းတူၺ်းယူႇဝႃႈ ဢွင်ႈတီႈမၢၵ်ႇတႅၵ်ႇၼၼ်ႉ ပဵၼ်တီႈလႂ်တႄႉတႄႉ။ လွင်ႈ ၵူၼ်း မၢတ်ႇၸဵပ်းလူႉတၢႆၵေႃႈ ပႆႇလႆႈငိၼ်းဝႃႈႁိုဝ်” ဝႃႈၼႆ။

မၢၵ်ႇတႅၵ်ႇၶမ်ႈၼႆႉ ၵမ်ႈၽွင်ႈဝႃႈ တႅၵ်ႇတီႈ ပွၵ်ႉၸွၼ်ႊၸူဝ်ႇတင်းသွင်တီႈၼႆသေတႃႉ မၢင်ၵေႃႉဝႃႈတႅၵ်ႇတီႈ ၽၵ်းတူၶဝ်ႈဝဵင်းမူႇၸေႈၼၼ်ႉလုၵ်ႈၼိုင်ႈ ။ ၵူၺ်းၵႃႈ ပႆႇမီးၽႂ်ႁူႉတီႈမၼ်းတႅတ်ႈတေႃးဝႃႈၼႆ။

ၸၢႆးႁိၼ်လဵၵ်း သိုပ်ႇလၢတ်ႈဝႃႈ “ မၢၵ်ႇၼႆႉ မၼ်းတႅၵ်ႇထပ်းၵၼ် 2 လုၵ်ႈ တေတႅၵ်ႇႁၢင်ႇၵၼ် မွၵ်ႈ 10-15 ၸၵႅၼ်ႉၼႆႉၵူၺ်း။ ၶႃႈလႆႈငိၼ်း လီလီၶႃႈလူင် မၢၵ်ႇတႅၵ်ႇ 2 ၵမ်းၼႆႉ” ဝႃႈၼႆ။

မိူဝ်ႈဝႃး ဝၼ်းတီႈ 11/5/2020 ယၢမ်းၵၢင်ၶမ်ႈ မွၵ်ႈ 8 မူင်းၶိုင်ႈၼႆႉၵေႃႈ မၢၵ်ႇတႅၵ်ႇတီႈၵဵတ်ႉ/ လၢၼ်ႇ (တိုးဂိတ်) တၢင်းၶဝ်ႈ ဝဵင်း မူႇၸေႊ   လုၵ်ႈၼိုင်ႈ။ ဢိင်ၼိူဝ်လွင်ႈမၢၵ်ႇတႅၵ်ႇၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် မႃးႁၢင်ႈၵၢင် ႁဵတ်း ဝႆႉ ဢၼ်ဝႃႈၼၼ်ႉ ပႆႇလႆႈႁူႉ ဝႃႈၼႆ။

လိူဝ်ၼၼ်ႉ မိူဝ်ႈပူၼ်ႉမႃး ဝၼ်းတီႈ 23/4/2020 ယၢမ်းၵၢင်ၶမ်ႈ မွၵ်ႈ 7 မူင်းၶိုင်ႈၼၼ်ႉ မီးၵူၼ်း/ ၸုမ်း ဢမ်ႇႁူႉၾၢႆႇၶဝ်ႈယိုဝ်း ဢွင်ႈတီႈၸုမ်းပျီႇတူႉ ၸိတ်ႉပၢၼ်းသေး ၵုမ်းၵမ်ဝႆႉ  တီႈပွၵ်ႉၸွၼ်ႊၸူဝ်ႇ ၼႂ်ႈၵႄႈမၢၼ်ႈပၢင်ႇၶမ်း – ပွၵ်ႉၸွၼ်ႊၸူဝ်ႇ ၵႄႈသဵၼ်ႈတၢင်း ၼမ်ႉၶမ်း – မူႇၸေႊ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း