ၼႂ်းဝၼ်းလဵဝ်ၵူၺ်း ၵူၼ်းၼႂ်းမိူင်းႁူမ်ႈတုမ် တိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ပုင်ႈၶိုၼ်ႈမႃး ပဵၼ် 14 ၵေႃႉ ၵမ်းလဵဝ်။
ဝၼ်းတီႈ 7/5/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႃႈ ၵူတ်ႇထတ်း ႁၼ်ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 တင်းမူတ်း 14 ၵေႃႉ။ ၵူၼ်းပဵၼ်ၸိူဝ်းၼၼ်ႉ ၵမ်ႈၼမ်ပဵၼ်ၵူၼ်းမိူင်း ၼႂ်းတိူင်းတႃႈၵုင်ႈ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ဝၼ်းတီႈ 7 ၼႆႉ လႆႈၵူတ်ႇထတ်းၸုပ်ႈထီႉၼိုင်ႈ တင်းမူတ်း 83 ၵေႃႉ။ ၼႂ်းၼၼ်ႉ ထူပ်းႁၼ် ၵူၼ်းၸပ်းတၢင်းပဵၼ် 14 ၵေႃႉ။ တေႃႈလဵဝ် ၼႂ်းမိူင်းႁူမ်ႈတုမ် ၵူၼ်းၸပ်းတၢင်းပဵၼ် တင်းမူတ်းမီးၵႂႃႇ 176 ၵေႃႉ” ဝႃႈၼႆ။
မိူဝ်ႈၼႆႉ ဝၼ်းတီႈ 8/5/2020 ယၢမ်းၵၢင်ၼႂ် 7 မူင်း ယူႇတီႈႁွင်ႈၵၢၼ်ပၢႆးယူႇလီလႄႈၾၢႆႇလဵၼ်ႈႁႅင်း ၶိုၼ်းမႄး Update ၶေႃႈမုလ်းထႅင်ႈသေ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၼႆႉ တင်းမူတ်းမီးဝႆႉ 176 ၵေႃႉ။ ၵူၼ်းမိူင်း ဢၼ်ယူတ်းယႃၶႅၼ်း မီးၵႂႃႇ 62 ၵေႃႉ။ ဢၼ်လႆႈဢၼၺၢတ်ႈ /ၶႂၢင်ႉလူင်းႁူင်းယႃသမ်ႉ 37 ၵေႃႉ၊ ၵူၺ်းၵႃႈ ၵူၼ်းလူင်းႁူင်းယႃၸိူဝ်းၼၼ်ႉ တေဢမ်ႇလႆႈဢွၵ်ႇၵႂႃႇတၢင်းလႂ် တေလႆႈႁဵတ်းၸွမ်းၼင်ႇၶေႃႈႁၢမ်ႈ ဢၼ်လႆႈ တမ်းဝႆႉပၼ်ၼၼ်ႉ ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ်ၵူၼ်းမိူင်းဢၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 သေ လႆႈလူႉတၢႆၵႂႃႇ မီး6 ၵေႃႉယဝ်ႉ ဝႃႈၼႆ။
ၸၢႆးလူင် ၵူၼ်းတႃႈၵုင်ႈ လၢတ်ႈတီႈၽူႈတွႆႇႁွၵ်ႈဝႃႈ – မိူဝ်ႈတႄႇပဵၼ်တၢင်းပဵၼ်ၶူဝ်ႊဝိတ်ႉၼႆႉ ၵူၼ်းမိူင်း တႃႈၵုင်ႈ ၵူဝ်ႁႄၵၼ်ႁႅင်းသေ ဢမ်ႇႁတ်းဢွၵ်ႇႁိူၼ်းယေးၵၼ်။ ယၢမ်းလဵဝ် ယွၼ်ႉၵၢၼ်ႁႃၵိၼ်လဵင်ႉတွင်ႉ လႄႈ ဢမ်ႇဢွၵ်ႇႁိူၼ်းဢမ်ႇပဵၼ်ယဝ်ႉလႄႈ လွင်ႈၵူဝ်ႁႄၼၼ်ႉ ယဵၼ်းပဵၼ်တီႈသွင်ၵႂႃႇယဝ်ႉ။ ၵွပ်ႈၼႆ ဝဵင်းတႃႈၵုင်ႈၼႆႉ ၼိူဝ်သဵၼ်ႈတႃႈသၢႆတၢင်း ၵူၼ်းၶိုၼ်းၵိုၼ်းၶွၼ်ႈၼႃႇယဝ်ႉ။ ပဵၼ်ဢၼ်လီမႆႈၸႂ် ၵူဝ်တိတ်းၸပ်းတၢင်းပဵၼ်ၼမ်မႃးလိူဝ်ၵဝ်ႇထႅင်ႈ – ဝႃႈၼႆ။
လိူဝ်ၼၼ်ႉ ၼႂ်းမိူင်းတႆးသမ်ႉ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်း မီး 7 ၵေႃႉ။ ပွတ်းဢွၵ်ႇၶူင်း 3 ၵေႃႉယၢမ်းလဵဝ် ယူတ်းယႃတူဝ်ဝႆႉတီႈႁူင်းယႃလူင်ၵဵင်းတုင် ၵူၼ်းမိူင်းၽျၢၵ်ႈၵေႃႉၼိုင်ႈလႄႈ တႃႈၶီႈလဵၵ်း 2 ၵေႃႉ။ ပွတ်းၸၢၼ်း သမ်ႉ 2 ၵေႃႉ ပဵၼ်ၵူၼ်းတူၼ်ႈတီး တင်း 2 ၵေႃႉ တႃႇၵေႃႉၼိုင်ႈယႃၶႅၼ်းယဝ်ႉသေ လႆႈလူင်းႁူင်းယႃယဝ်ႉ တႃႇၵေႃႉၼိုင်ႈ တိုၵ်ႉယူတ်းယႃဝႆႉတီႈ ႁူင်းယႃလူင်ၸဝ်ႈၸၢမ်ႇထုၼ်းဝႆႉယူႇ ဝႃႈၼႆ။
လိူဝ်သေၼၼ်ႉ ၸိုင်ႈတႆးပွတ်းႁွင်ႇ 2 ၵေႃႉ တႃႇၵေႃႉၼိုင်ႈ ၵူၼ်းၵျွၵ်ႉမႄး ၶႅၼ်းၸိုၼ်ႈသေလူင်းႁူင်းယႃယဝ်ႉ။ ထႅင်ႈၵေႃႉၼိုင်ႈသမ်ႉ ၵူၼ်းမူႇၸေႊ ယၢမ်းလဵဝ် တိုၵ်ႉယူတ်းယႃဝႆႉတီႈႁူင်းယႃမူႇၸေႊယူႇ ဝႃႈၼႆ။
