ၼႂ်းမိူင်းႁူမ်ႈတုမ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ပုင်ႈၶိုၼ်ႈထိုင် 111 ၵေႃႉယဝ်ႉ ႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈ ႁႅင်း ပိုၼ်ၽၢဝ်ႇဢွၵ်ႇဝႆႉ။

မိူဝ်ႈၼႆႉ ဝၼ်းတီႈ 20/4/2020 ယၢမ်းၵၢင်ၼႂ် 10 မူင်း ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႆႉ တေႃႈလဵဝ် ၵူၼ်းမိူင်းႁူမ်ႈတုမ် ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆႉ တင်းမူတ်းမီးၵႂႃႇ 111 ၵေႃႉယဝ်ႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ၼႂ်းမိူင်းႁူမ်ႈတုမ် ၵူတ်ႇထတ်းႁၼ်ၵူၼ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 ၼႆႉ တင်းမူတ်းမီးၵႂႃႇ 111 ၵေႃႉယဝ်ႉ။ လူႉတၢႆၵႂႃႇမီး 5 ၵေႃႉ။ ယႃၶႅၼ်းသေ လႆႈၶႂၢင်ႉလူင်းႁူင်းယႃသမ်ႉ မီး 2 ၵေႃႉ” ဝႃႈၼႆ။

ၼႂ်းၵူၼ်းပဵၼ် 111 ၵေႃႉၼၼ်ႉ ပႃးၵူၼ်းမိူင်းတႆး 4 ၵေႃႉ ။ ပဵၼ်ၵူၼ်းၵျွၵ်ႉမႄးၵေႃႉၼိုင်ႈ မီးတီႈႁူင်းယႃ လႃႈသဵဝ်ႈ ၊ ၵူၼ်းတူၼ်ႈတီးၵေႃႉၼိုင်ႈ မီးတီႈႁူင်းယႃၸဝ်ႈၸၢမ်ႇထုၼ်း၊ ၵူၼ်းမိူင်းၽျၢၵ်ႈၵေႃႉၼိုင်ႈ မီးတီႈႁူင်းယႃ ၵဵင်းတုင်လႄႈ မိူဝ်ႈဝၼ်းတီႈ 19/4/2020 ယၢမ်းၵၢင်ၼႂ် 7 မူင်းၼၼ်ႉ ပိုၼ်ၽၢဝ်ႇၽူႈတိတ်းၸပ်းတၢင်းပဵၼ်ထႅင်ႈ 8 ၵေႃႉၼႂ်းၼၼ်ႉပႃးၵူၼ်းတႃႈၶီႈလဵၵ်းၵေႃႉၼိုင်ႈ ပဵၼ် ၽူႈၸၢႆး ဢႃယု 43 ပီ ယၢမ်းလဵဝ်မီးတီႈႁူင်းယႃၵဵင်းတုင် ။

မိူဝ်ႈဝၼ်းတီႈ 16/4/2020 ယၢမ်းၵၢင်ၶမ်ႈ 8 မူင်းၼၼ်ႉ ယူႇတီႈလူင်ပွင်ၸိုင်ႈမိူင်းႁူမ်ႈတုမ် ဢွၵ်ႇလိၵ်ႈပိုၼ်ၽၢဝ်ႇ ႁၢမ်ႈ ၵူၼ်းမိူင်းၶွၼ်ႈတုမ်ၵၼ် 5 ၵေႃႉ ၶိုၼ်ႈၼိူဝ်။ ယွၼ်ႉဝႃႈ တႃႇတေၵုမ်းၵမ်လႆႈတၢင်းပဵၼ်ၶူဝ်ႊဝိတ်ႉ 19 ဢၼ်လၢမ်း ၽႄႈ ႁၢဝ်ႈႁႅင်းယူႇယၢမ်းလဵဝ်ၼႆႉ ဝႃႈၼႆ။

ၸၢႆးလၢဝ်သႅင် ၽူႈၶဝ်ႈၸုမ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈလူင်ပွင်ၸိုင်ႈၵေႃႈ ဢွၵ်ႇ လိၵ်ႈမႃးယဝ်ႉ တေဢမ်ႇလႆႈၶွၼ်ႈတုမ်ၵၼ်ၵူၼ်း 5 ၵေႃႉၶိုၼ်ႈၼိူဝ် ယွၼ်ႉဝႃႈ တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ဢၼ်လၢမ်းၽႄႈယူႇ တေႃႈလဵဝ်ၼႆႉ” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ တွၼ်ႈတႃႇတေၵုမ်းၵမ် တၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ်ၼႆႉသေ သင်ဝႃႈ ဢမ်ႇမီးလွင်ႈတၢင်းၶိုၵ်ႉၶၵ်ႉလမ်ႇလွင်ႈသင်ၼႆ ယႃႇပေဢွၵ်ႇႁိူၼ်းယေးၵၼ်၊ ယႃႇပေၶွၼ်ႈတုမ် ႁူဝ်ၵူၼ်း 5 ၵေႃႉ ၶိုၼ်ႈၼိူဝ် ဝႃႈၼႆ။

ယဝ်ႉၵေႃႈ ၵူၼ်းၵႂႃႇႁဵတ်းၵၢၼ်၊ ပွၵ်ႈၵၢၼ်၊ ၵူၼ်းၶၢႆၶူဝ်း ၸိူဝ်းလႆႈၶႂၢင်ႉၶၢႆ ၸိူဝ်းၼၼ်ႉ တေဢမ်ႇလႆႈၶွၼ်ႈတုမ်ၵၼ် 5 ၵေႃႉ ၶိုၼ်ႈၼိူဝ်။ ၼွၵ်ႈလိူဝ်ၼၼ်ႉ မိူၼ်ၼင်ႇ မီးလွင်ႈၶိုၵ်ႉၶၵ်ႉ လူဝ်ႇၵႂႃႇႁူင်းယႃ၊ ႁွင်ႈယႃ ၸဵပ်းမႆႈၶႆႈၼၢဝ် ၸိူဝ်းၼႆႉၵေႃႈ တေ ဢမ်ႇလႆႈၵႂႃႇၶွၼ်ႈတုမ်ၵၼ် 5 ၵေႃႉ ၶိုၼ်ႈၼိူဝ် ဝႃႈၼႆ။