Friday, March 29, 2024

ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၼႂ်းမိူင်းတႆး ၵေႃႉထူၼ်ႈ 7 ပဵၼ်ထဝ်ႈယိင်း မူႇၸေႊ

Must read

ၼႂ်းမိူင်းတႆးပွတ်းႁွင်ႇ မီးၵူၼ်းၸပ်းတၢင်း ပဵၼ်ၶူဝ်ႊဝိတ်ႉ – 19 ထႅင်ႈၵေႃႉၼိုင်ႈ တေႃႈလဵဝ် ၼႂ်းမိူင်းတႆး ၵူၼ်းၸပ်းၸိူဝ်ႉ မႅင်းတင်းမူတ်း မီး 7 ၵေႃႉ။

Photo by – Ministry of Health and Sports, Myanmar/ ၵူၼ်းမိူင်းႁူမ်ႈတုမ် ဢၼ်တိတ်းၸပ်းတၢင်းပဵၼ် ၶူဝ်ႊဝိတ်ႉ – 19 မိူဝ်ႈၼႆႉ 24/4/2020 တင်းမူတ်း 4 ၵေႃႉ

မိူဝ်ႈၼႆႉ ဝၼ်းတီႈ 24/4/2020 ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇ ၵူၼ်းၸပ်းတၢင်း ပဵၼ် ၼႂ်းမိူင်း ႁူမ်ႈတုမ် ၼမ်မႃးထႅင်ႈ 4 ၵေႃႉ ၼႂ်းၼၼ်ႉ တႃႇ 3 ၵေႃႉ ပဵၼ်ၵူၼ်း တႃႈၵုင်ႈ တႃႇၵေႃႉၼိုင်ႈ ပဵၼ်ၵူၼ်း မူႇၸေႊ ၸိုင်ႈတႆး ပွတ်းႁွင်ႇ ။ ပဵၼ်ၵူၼ်းထဝ်ႈယိင်း ဢႃယု 87 ပီ ဝႃႈၼႆ။

- Subscription -

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ၵူၼ်းမူႇၸေႊ။ ပဵၼ်ၵူၼ်း ပွၵ်ႉၵၢတ်ႇၶႃႈ။ လႆႈငိၼ်းဝႃႈ တိုၵ်ႉၵႂႃႇဢႅဝ်ႇမိူင်းတူႇပၢႆးမႃးမိူဝ်ႈလိူၼ်မၢတ်ႉၶျ်ၵူၺ်း။ မႃးထိုင်ၶိုၼ်းတႄႉလႆႈမွၵ်ႈလိူၼ်ၼိုင်ႈ ယဝ်ႉသေတႃႉ တိုၵ်ႉပဵၼ်ဢႆ ၶေႃးၸဵပ်းမႃးၵူၺ်းလႄႈ ၼႅတ်ႈၵႂႃႇႁူင်းယႃ။ တေႃႈလဵဝ်တႄႉ မီးတီႈႁူင်းယႃ မူႇၸေႊ” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇလူင်ပွင်ၸိုင်ႈ ၾၢႆႇပၢႆးယူႇလီဝၼ်းမိူဝ်ႈၼႆႉ ဢွၵ်ႇဝႆႉဝႃႈ “ မိူဝ်ႈၼႆႉ လႆႈၵူတ်ႇထတ်းတၢင်းပဵၼ် တင်းမူတ်း 167 ၵေႃႉ။ ၼႂ်းၼၼ်ႉ ထူပ်းႁၼ် ၸိူဝ်ႉမႅင်း 4 ၵေႃႉ။ တႃႇ 163 ၵေႃႉတႄႉ ဢမ်ႇထူပ်းႁၼ် ၸိူဝ်ႉမႅင်း။ တင်းမူတ်း ၼႂ်းမိူင်း ႁူမ်ႈတုမ် ၵူၼ်းၸပ်းတၢင်းပဵၼ် မီးၵႂႃႇ 143 ၵေႃႉယဝ်ႉ” ဝႃႈၼႆ။

တေႃႈလဵဝ် ၼႂ်းမိူင်းတႆးၼႆႉ ၵူၼ်းၸပ်းတၢင်းပဵၼ် တင်းမူတ်းမီး 7 ၵေႃႉယဝ်ႉ။ ၼႂ်းၼၼ်ႉ တၢင်းပွတ်းဢွၵ်ႇၶူင်း 3 ၵေႃႉ ပဵၼ် ၵူၼ်းမိူင်းၽျၢၵ်ႈၵေႃႉၼိုင်ႈလႄႈ ၵူၼ်းတႃႈၶီႈလဵၵ်း 2 ၵေႃႉ တေႃႈလဵဝ် လႆႈသူင်ႇယူတ်းယႃဝႆႉတီႈ ႁူင်းယႃလူင်ၵဵင်းတုင်။ တၢင်းပွတ်းၸၢၼ်း 2 ၵေႃႉ ပဵၼ်ၵူၼ်းတူၼ်ႈတီး လႆႈသူင်ႇယူတ်းယႃဝႆႉတီႈႁူင်းယႃလူင်ၸဝ်ႈၸၢမ်ႇထုၼ်း ဝဵင်းတူၼ်ႈတီး၊ ပွတ်းႁွင်ႇသမ်ႉ 2 ၵေႃႉ ၵူၼ်းၵျွၵ်ႉမႄးၵေႃႉၼိုင်ႈ လႆႈသူင်ႇယူတ်းယႃဝႆႉတီႈ ႁူင်းယႃလူင် လႃႈသဵဝ်ႈလႄႈ ၵူၼ်းမူႇၸေႊ ထႅင်ႈၵေႃႉၼိုင်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း