မိူဝ်ႈၼႆႉ ဝၼ်းတီႈ 4/4/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ် ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဝႃႈ ၵူတ်ႇထတ်းထူပ်း ႁၼ်ထႅင်ႈ ၵူၼ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 1 ၵေႃႉ ၼႂ်းမိူင်းႁူမ်ႈတုမ် ဝႃႈၼႆ။

ၵူၼ်းမိူင်း ဢၼ်ၸပ်းတၢင်းပဵၼ်ၶူဝ်ႊဝိတ်ႉ 19 ၵေႃႉၼိုင်ႈၼႆႉ ပဵၼ်ၼၢင်းယိင်း ဢႃယု 26 ပီ မၼ်းၼၢင်းၼႆႉလုၵ်ႉမိူင်းဢမေႊရိၵႃႊ မႃးလူင်း မိူင်းၵူဝ်ႊရီႊယိူဝ်ႊ၊ မိူင်းထႆး သေမႃးထိုင်ၶိုၼ်းဝဵင်းတႃႈၵုင်ႈမိူဝ်ႈဝၼ်းတီႈ 26/3/2020 ။ ဝၼ်းၼၼ်ႉမၼ်းၼၢင်းလႆႈၵႂႃႇၵုမ်းတူဝ်တီႈႁူင်းႁႅမ်းဢၼ်ၼိုင်ႈၼႂ်းၸႄႈဝဵင်းပူဝ်ႇတထွင်ႇ ဝဵင်းတႃႈၵုင်ႈ။

လူင်ပွင်ၸိုင်ႈပိုၼ်ၽၢဝ်ႇဝႃႈမၼ်းၼၢင်းၼႆႉ ထိုင်ဝၼ်းတီႈ 2/4/2020 မႃး လူမ်းမႆႈၶိုၼ်ႈသုင်၊ဢႆ လႄႈ ၵႂႃႇၶဝ်ႈႁူင်းယႃ ၵူတ်ႇထတ်းတၢင်းပဵၼ်။ ၶေႃႈတွပ်ႇဢွၵ်ႇမႃးဝၼ်းမိူဝ်ႈၼႆႉ 4/4/2020 ဝႃႈ မၼ်းၼၢင်းၸပ်းၸိူဝ်ႉမႅင်းတၢင်းပဵၼ်။

ယၢမ်းလဵဝ်ၸဝ်ႈၼႃႈတီႈသူင်ႇတူဝ်မၼ်းၼၢင်းၵႂႃႇႁူင်းယႃဝေႇပႃႇၵီႇ ဝဵင်းတႃႈၵုင်ႈ တႃႇႁၵ်ႉသႃယူတ်းယႃတူဝ်။ ပၢႆးယူႇလီမၼ်းၼၢင်းယၢမ်းလဵဝ်ၶႅမ်ႉလႅပ်ႈယူႇ ဝႃႈၼႆ။

မၼ်းၼၢင်းၼႆႉဢွၵ်ႇတၢင်းမႃးလူၺ်ႈၵၼ်တင်း ၵေႃႉပဵၼ်မႄႈလႄႈ ၼွင်ႉၸၢႆးမၼ်း ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ်ၼႆႉ တင်းမူတ်းမီးဝႆႉ 21 ၵေႃႉ၊ တၢႆ ၵေႃႉ ႞ ယဝ်ႉ။ ၼႂ်းၼၼ်ႉ ၼႂ်းမိူင်းတႆး ထူပ်းႁၼ်ဝႆႉ ၵေႃႉၼိုင်ႈ။ ပဵၼ်ၵူၼ်းမိူင်းၵျွၵ်ႉမႄး။ တေႃႈလဵဝ် လႆႈသူင်ႇမႃးယူတ်းယႃ တူဝ်ဝႆႉတီႈ ႁူင်းယႃလူင် လႃႈသဵဝ်ႈယဝ်ႉ ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တၢင်းလုမ်ႈၾႃႉၼႆႉ မီး 1,139,120 ၵေႃႇ၊ တၢႆ 61,144 ၵေႃႉလႄႈ ယႃၶႅၼ်း 236,214 ၵေႃႉ ယူႇတီႈႁွင်ႈၵၢၼ်ပၢႆးယူႇလီလုမ်ႈၾႃႉ worldometers ဢွၵ်ႇဝႆႉ။