ၸုမ်းၸတ်းၵၢၼ် လႄႈ ပႂ်ႉတူၺ်းငဝ်းလၢႆးၸိူဝ်ႉမႅင်း ၶူဝ်ႊဝိတ်ႉ-19 လၢမ်းၽႄႈ ၼႂ်းမိူင်းထႆး ပိုၼ်ၽၢဝ်ႇဝႃႈ  ၽွင်းၶၢဝ်းမၢႆမီႈၶိုၵ်ႉၶၵ်ႉၼႆႉ ၽႂ်သျႄး/ ပိုၼ်ၽႄႈ ၶေႃႈမုလ်းၶၢဝ်ႇၽိတ်း ၸိုင် တေၺႃးတူတ်ႈတၢမ်ႇၼၵ်းၼႃ ဝႃႈၼႆ။

ဝၼ်းတီႈ 5/4/2020 မီးၵူၼ်းသျႄး ၽိုၼ်လိၵ်ႈလွင်ႈဝႃႈ လူင်ပွင်ၸိုင်ႈထႆး တေပိုၼ်ၽၢဝ်ႇ ၶႃႊၾိဝ်ႊ  မၢႆမီႈႁၢမ်ႈဢွၵ်ႇႁိူၼ်း 24 ၸူဝ်ႈမူင်း ၼႂ်းဝၼ်းတီႈ 10/4/2020 ၼႆႉၵႂႃႇ ၼႆလႄႈ ၵူၼ်းမိူင်းထႆး ဢွၼ်ၵၼ်တူၵ်းၸႂ်တိုၼ်ႇသၢၼ်ႈ လႄႇႁႃသိုဝ်ႉၶူဝ်းၵိၼ်ယမ်ႉ ၶဝ်ႈသၢၼ် ဢႃးႁၢရ်ႁႅင်ႈ  ။

ဝၼ်းတီႈ 6/4/2020 မိူဝ်ႈၼႆႉ မေႃယႃ ထဝီးသိၼ် ဝိသၼုယူဝ်းထိၼ်း ၽူႈၶၢၼ်ပၢၵ်ႇ ၸုမ်းၸတ်းၵၢၼ် လႄႈ ပႂ်ႉတူၺ်းငဝ်းလၢႆးၸိူဝ်ႉမႅင်း ၶူဝ်ႊဝိတ်ႉ-19 လၢမ်းၽႄႈ ၼႂ်းမိူင်းထႆး ပိုၼ်ၽၢဝ်ႇပဵၼ်တၢင်းၵၢၼ်ဝႃႈ -“ ၽွင်းၶၢဝ်း ဢွၵ်ႇဝႆႉမၢႆမီႈ ၶိုၵ်ႉၶၵ်ႉ ၽေႃႊရေႃႊ ၵေႃႊ ၶျုၵ်ႊၶျိူၼ်ႊၼႆႉသင်ဝႃႈ တူဝ်ၼပ်ႉ ၵူၼ်းတိတ်းၸပ်းၸိူဝ်ႉမႅင်း ဢမ်ႇမီးၼမ်မႃးထႅင်ႈ ၼႆၸိုင် လူင်ပွင်ၸိုင်ႈထႆး တေဢမ်ႇမီးၽႅၼ်ၵၢၼ်တႃႇတေ ပိုၼ်ၽၢဝ်ႇမၢႆမီႈ ႁၢမ်ႈၵၼ်ၵပ်ႉႁႅင်းလိူဝ်ၼႆႉထႅင်ႈ။ သင်ဝႃႈ တိုၵ်ႉမီးၵူၼ်းတိတ်းၸပ်းၼမ်ယူႇတိၵ်းတိၵ်းၼႆတႄႉ ဢမ်ႇၸၢင်ႈဝႃႈ ။ ၵူၺ်းၵႃႈ ဢၼ်ၵူၼ်းမိူင်း သျႄး (သိုပ်ႇပိုၼ်ၽႄႈၼႂ်းသိုဝ်ႇၼႅင်ႈ) ယူႇဢၼ်ဝႃႈ လူင်ပွင်ၸိုင်ႈ တေပိုၼ်ၽၢဝ်ႇၶႃႊၾိဝ်ႊ  မၢႆမီႈႁၢမ်ႈဢွၵ်ႇႁိူၼ်း 24 ၸူဝ်ႈမူင်း ၼႂ်းဝၼ်းတီႈ 10/4/2020 ၼႆႉၼႆၼၼ်ႉ ဢမ်ႇၸႂ်ႈလႃးလႃး။ ၽႂ်သိုပ်ႇသျႄးၶေႃႈမုလ်းၽိတ်းၼႆႉတိၵ်းတိၵ်း တေပၼ်တူတ်ႈတၢမ်ႇ” – ဝႃႈၼႆ။

မၢႆမီႈ ၶိုၵ်ႉၶၵ်ႉ ၽေႃႊရေႃႊၵေႃႊ ၶျုၵ်ႊၶျိူၼ်ႊ ဢၼ်လူင်ပွင်ၸိုင်ႈထႆး ဢွၵ်ႇဝႆႉယၢမ်းလဵဝ်ၼႆႉၼၼ်ႉဝႃႈဝႆႉ- ၼင်ႇႁိုဝ်တေၵုမ်းလႆႈတၢင်းပဵၼ်ၶူဝ်ႊဝိတ်ႉလၢမ်းၽႄႈၼၼ်ႉ- ႁၢမ်ႈၵူၼ်းၶွၼ်ႈတုမ်ၵၼ်၊ ပေႃးဢမ်ႇမီးလွင်ႈတၢင်းယႂ်ႇလူင် ႁၢမ်ႈဢွၵ်ႇၼွၵ်ႈႁိူၼ်း၊ ႁၢမ်ႈပိုၼ်ၽႄႈၶၢဝ်ႇၽၢင်း ၶၢဝ်ႇပွမ် – ၸဵမ်ၸိူဝ်းၼႆႉ။

မၢႆမီႈၶႃႊၾိဝ်ႊ ဢမ်ႇၼၼ် မၢႆမီႈႁၢမ်ႈဢွၵ်ႇႁိူၼ်း ယၢမ်းလဵဝ်ဢွၵ်ႇဝႆႉဝႃႈ- ႁၢမ်ႈၵူၼ်းမိူင်း ဢွၵ်ႇႁိူၼ်းၼႂ်းၶၢဝ်းယၢမ်း 10 မူင်းၵၢင်ၶမ်ႈတေႃႇထိုင် 4မူင်းၵၢင်ၼႂ် ။

ယၢမ်းလဵဝ်ၼႂ်းမိူင်းထႆးၼႆႉ ၵူၼ်းတိတ်းၸပ်းတၢင်းပဵၼ် ၶူဝ်ႊဝိတ်ႉ 19 မီးယူႇ 2220 ၵေႃႉ။ ၼမ်ၶိုၼ်ႈမႃးလိူဝ်မိူဝ်ႈဝႃး 51 ၵေႃႉ။  တၢႆယွၼ်ႉတၢင်းပဵၼ်ယဝ်ႉ 26 ၵေႃႉ။

ၼႂ်းမိူင်းထႆးမီး 77 ၸေႈတွၼ်ႈ။ဝၼ်းမိူဝ်ႈၼႆႉ ဢၼ်ဢမ်ႇမီးၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 ၼႆႉမီးယူႇ 11 ၸေႈတွၼ်ႈၵူၺ်း။ ပဵၼ်ၸေႈတွၼ်ႈ ၵမ်းၽႅင်းၽဵတ်း၊ ၶျႆးၼၢတ်ႉ၊ တရၢတ်ႇ၊ ၼၢၼ်ႉ၊ ပိုင်ႊၵၢၼ်ႊ၊ ၽင်ႊငႃႊ၊  ၽိၵျိတ်ႇ၊ ရၼွင်း၊ သတုၼ်း၊ သိင်ပူႊရီႊ လႄႈ ဢၢင်ႇထွင်း။