ၾူၼ်လူင်၊ ၾူၼ်မၢၵ်ႇႁဵပ်း တူၵ်းတၢင်းထုင်ႉလွႆႁူၼ်း ၸႄႈဝဵင်းၵေးသီး ၸႄႈတွၼ်ႈလွႆလႅမ် လႄႈ သူၼ်ၽၵ်းလူႉ၊ မူ၊ ၵႆႇ၊ ဝူဝ်း၊ ၵႂၢႆး တၢႆၼမ် ၊ ႁိူၼ်းယေး ၵူၼ်းဝၢၼ်ႇ ၸိူဝ်းယူႇ ထုင်ႉတူင်ႇၸၢတ်းၵေးသီး လူႉၵွႆၼမ်။
ဝၼ်းတီႈ 26/4/2020 မိူဝ်ႈဝႃႈ ယၢမ်းဝၢႆးဝၼ်း ၾူၼ်မၢၵ်ႇႁဵပ်း ၾၢႆႇၸၢၼ်းၵေးသီး တၢင်းထုင်ႉလွႆႁူၼ်း (တီႈဢၼ် ၾၢႆႇသိုၵ်းမၢၼ်ႈ တင်းသိုၵ်း RCSS/SSA ယၢမ်ႈၶဵင်ႈၶႅင်ၵၢၼ်သိုၵ်းတေႃႇၵၼ်) ဢၼ်မီးၾၢႆႇၸၢၼ်း ၵေးသီးမွၵ်ႈ 30 လၵ်း။ ႁိူၼ်းယေးၵူၼ်းဝၢၼ်ႈ ၼမ်ႉမေႃႇသၢႆး လူႉၵွႆၼမ်သေပိူၼ်ႈ။ ယၢမ်းလဵဝ် ၽူႈမီးပုၼ်ႈၽွၼ်း လႄႈ ၽူႈတႅၼ်းသၽႃး ၶပ်းၶိုင် တႃႇလူင်းပိုၼ်ႉတီႈ ၸွႆႈထႅမ် လွင်ႈယူႇ လွင်ႈၵိၼ်ၵူၼ်းဝၢၼ်ႈဝႆႉယူႇဝႃႈၼႆ။
ၸၢႆးၸၢမ်ႇမိူင်း ၽူႈတႅၼ်းသၽႃးၸေႊမိူင်းၸေႊဝဵင်းၵေးသီးလၢတ်ႈဝႃႈ-“ လႆႈႁူႉဝႃႈ လင်ၶႃးႁိူၼ်းပိဝ် 7 လင်။ ငဝ်းလၢႆးပဵၼ်ႁိုဝ် မီးႁိုဝ် ႁဝ်းၶႃႈ တိုၵ်ႉဢၢင်ႈမိူဝ်းတူၺ်း မိူဝ်းၸွႆႈထႅမ်ယူႇ၊ ၵွင်ႉတူၺ်း ၽူႈမီးပုၼ်ႈ ၽွၼ်း တွၼ်ႈၼၼ်ႉဝႆႉ၊ ယင်းပႆႇၸၢင်ႈၵႂႃႇ” ဝႃႈၼႆ။
ဝၢၼ်ႈၼမ်ႉမေႃႇသၢႆးၼႆႉ ပဵၼ်ၼႂ်းၸေႈဝဵင်းၵေးသီး။ တိတ်းၸပ်းလႅၼ်လိၼ်ၸေႈဝဵင်းလၢႆးၶႃႈ တင်း ၸႄႈဝဵင်းမိူင်းၵိုင်။ ၼႂ်းဝၢၼ်ႈၼၼ်ႉ မီးလင်ႁိူၼ်းမွၵ်ႈ 70 လင်၊ ပဵၼ်ပီႈၼွင်ႉလွႆတဢၢင်းၵမ်ႈၼမ်ယူႇသဝ်း။
မၢႆးဢွင်ႇသၢၼ်း မေႃသွၼ်တီႈႁူင်းႁဵၼ်းဝၢၼ်ႈၼမ်ႉမေႃႇသၢႆးလၢတ်ႈတီႈၽူႈတွႆႇႁွၵ်ႈဝႃႈ -“ ႁိူၼ်းၵွႆ 7 လင်ၶႃႈဢေႃႈ။ ႁူဝ်ၵူၼ်းဢၼ်ႁူပ်ႉတၢင်းယၢပ်ႇၽိုတ်ႇမီးယူႇ 60 ပၢႆ။ ယွၼ်ႉပိူဝ်ႈ လင်ၶႃးႁိူၼ်းပိဝ်လႄႈ ၶဝ်ႈသၢၼ်တၢင်းၵိၼ်တၢင်းယႅမ်ႉ ယမ်းၼမ်ႉမူတ်း။ ၸိူဝ်းၶဝ် လႆႈသွၼ်ႈယူႇၸွမ်းၵျွင်းမုၼ်ၸဝ်ႈလႄႈ ႁိူၼ်းဢၼ်ဢမ်ႇၵွႆၸိူဝ်းၼၼ်ႉ။ ၼႂ်း 60 ပၢႆၼၼ်ႉပဵၼ်လုၵ်ႈဢွၼ်ႇၵမ်ႈၼမ်။ ၸိူဝ်းၶဝ်လူဝ်ႇတၢင်းၸွႆႈထႅမ်တႄႉတႄႉၶႃႈယၢမ်းလဵဝ်” – ဝႃႈၼႆ။
ၵူၼ်းမၢတ်ႇၸဵပ်းလူႉတၢႆတႄႉဢမ်ႇမီး ။ တူဝ်သတ်းဝူဝ်းၵႂၢႆးတႄႉ တၢႆၽွင်ႈ၊ သူၼ်ၽၵ်းမၢၵ်ႇၶဝ်ႈတဝ်ႈၼမ်ႉၵေႃႈ ၵွႆၽွင်ႈ ဝႃႈၼႆ။ ဢၼ်ၾူၼ်မၢၵ်ႇႁဵပ်းတူၵ်းတီႈဝၢၼ်ႈၼမ်ႉမေႃႇသၢႆးၼႆႉ ၼႂ်းပီၼႆႈၵူၺ်း ပဵၼ်ၵမ်းထူၼ်ႈသွင်ယဝ်ႉ ဝႃႈၼႆ။
