ၸုမ်းၶၢင်ၼွၵ်ႈမိူင်း WKC : World Kachin Congress ဢွၵ်ႇလိၵ်ႈပိုၼ်ၽၢဝ်ႇ တုၵ်းယွၼ်း ၶွင်ႊသီႊႁူမ်ႇလူမ်ႈၸၢတ်ႈၸိုင်ႈလုမ်ႈၾႃႉ ႁဵတ်းပၢင်ၵုမ် ဢုပ်ႇလိူင်ႈမိူင်းမၢၼ်ႈ ဢၼ်ႁဵတ်းပၢင်တိုၵ်း တၢင်းမိူင်းရၶႅင်ႈ၊ ၶျၢင်း။
လိၵ်ႈပိုၼ်ၽၢဝ်ႇ WKC ၼၼ်ႉ မီး 4 ၶေႃႈ – မႆႈၸႂ် ဢၼ်သိုၵ်းလူင်ပွင်ၸိုင်ႈမၢၼ်ႈ လေႃႇတိုၵ်းၼႂ်း ၸႄႈမိူင်းရၶႅင်ႇ၊ ၸႄႈမိူင်းၶျၢင်း။ ဢမ်ႇႁၼ်လီၸွမ်းသေ ဢိတ်း ဢၼ်ႁဵတ်းႁႂ်ႈ ၵူၼ်းႁေႃ ၵႃး ၾၢႆႇယူႇလီ ၸၢတ်ႈၸိုင်ႈလုမ်ႈၾႃႉ WHO ပေႃးလႆႈလူႉတၢႆၵႂႃႇၵေႃႉၼိုင်ႈ၊ ယွၼ်ႉၼၼ်လႄႈ ႁႂ်ႈၶွင်ႊသီႊႁူမ်ႇလူမ်ႈ ၹၢတ်ႈၸိုင်ႈလုမ်ႈၾႃႉ UN-SC ၸတ်းႁဵတ်းပၢင်ၵုမ်လူင်ၽႂ်းၽႂ်းသေ ၵူတ်ႇထတ်း ပၼ်ႁႃ ဢၼ်ပဵၼ်ယူႇ ၼႂ်းမိူင်းႁူမ်ႈတုမ်မၢၼ်ႈတွၼ်ႈတူၵ်း။
လိူဝ်ၼၼ်ႉၵေႃႈ တုၵ်းယွၼ်း ႁႂ်ႈသိုၵ်းမၢၼ်ႈၵိုတ်းပၢင်တိုၵ်းၽႂ်းၽႂ်းသေ ၵႃႈၸႂ်ႉၸၢႆႇဢၼ်ၸႂ်ႉၼႂ်းပၢင် တိုၵ်းၼၼ်ႉ ဢဝ်ၵႂႃႇပူၵ်းပွင်ၵႅတ်ႇၵင်ႈ တၢင်းပဵၼ် ၶူဝ်းဝိတ်ႉ 19 သေ ၵမ်းၼႆ ၸုမ်းၶွၼ်ႊၵရႅတ်ႉသ် ၶၢင်လုမ်ၾႃႉ ဢွၵ်ႇလိၵ်ႈတုၵ်းယွၼ်းမိူဝ်ႈပူၼ်ႉမႃး ဝၼ်းသဝ် 25/4/2020 ၼႆႉ ။
ဝူင်ႈပူၼ်ႉမႃးၼႆႉ သိုၵ်းလူင်ပွင်ၸိုင်ႈမၢၼ်ႈ သူင်ႇႁႅင်းသိုၵ်း လေႃႇတိုၵ်းၵႂၢတ်ႇလၢင်ႉ ၸုမ်းသိုၵ်းရၶႅင်ႇ AA ၼႂ်းၸႄႈမိူင်းရၶႅင်ႇ တင်း ၼႂ်းၸႄႈမိူင်းၶျၢင်း၊ ႁဵတ်းႁႂ်ႈၵူၼ်းမိူင်း တၢႆၼႂ်းၵႄႈသိုၵ်းသိူဝ်လၢႆလၢႆၵေႃႉ။ ၵႃးၸုမ်းၾႃႇယူႇလီလုမ်ႈၾႃႉ WHO ဢၼ်ၸွႆႈ ၵၢၼ်ၵူတ်ႇထတ်း တၢင်းပဵၼ်ၸိူဝ်ႉမႅင်း ၶူဝ်ႊဝိတ်ႉ 19 ၼၼ်ႉ ၺႃးယိုဝ်း ႁဵတ်းႁႂ်ႈၽူႈႁၢပ်ႇၵၢၼ် လူႉတၢႆၵႂႃႇၵေႃႉၼိုင်ႈ ၸိူဝ်းၼႆႉ ၸုမ်းၶၢင် တုၵ်းယွၼ်း ႁႂ်ႈတင်ႈၶွမ်ႊမတီႊ ၵူတ်ႇထတ်း ဢဝ်တၢင်းၽိတ်းပၼ် ၽူႈပူၼ်ႉပႅၼ်။
ၽူႈၶၢၼ်ပၢၵ်ႇ ၾၢႆႇပွင်ႇၶၢဝ်ႇတပ်ႉသိုၵ်းလူင်ပွင်ၸိုင်ႈ ၸွမ်သိုၵ်း ၸေႃႇမိၼ်းထုၼ်း ဢုပ်ႇလၢတ်ႈ တီႈသပ်းၸႅင်ႈၶၢဝ်ႇ ဝႃႈ သိုၵ်းလူင်ပွင်ၸိုင်ႈ ဢမ်ႇပႆႇမီးၽႅၼ်ၵၢၼ်တႃႇ ပိုၼ်ၽၢဝ်ႇၵိုတ်းတိုၵ်း။ တေထႅမ်ႁႅင်းသိုၵ်းၵႅတ်ႇၵင်ႈ ၵူၼ်းမိူင်းသေ ၵႂၢတ်ႇလၢင်ႉတိုၵ်းတေႃးၸုမ်းသိုၵ်းရၶႅင်ႇၵႂႃႇ ထႅင်ႈၵွၼ်ႇ ဝႃႈၼႆ။
