သိုၵ်းလူင်ပွင်ၸိုင်ႈမၢၼ်ႈ ႁွၼ်ႈထဝ်ႇသွၵ်ႈတဝ် ၸုမ်းပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး ဢၼ်လူင်းပိုၼ်ႉတီႈ ၵူတ်ႇ ထတ်းၶူဝ်ႊဝိတ်ႉ 19 ၼႂ်းၸႄႈဝဵင်းမိူင်းပၼ်ႇ ၸိုင်ႈတႆး ပွတ်းၸၢၼ်း ၼၼ်ႉလႄႈ ထိုင်တီႈ လႆႈပဵၼ်ပၢင်တိုၵ်းၵၼ် ။
ဝၼ်းတီႈ 12/4/2020 ယၢမ်းဝၢႆးဝၼ်းမွၵ်ႈ 3 မူင်းၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 153 ဢၼ်ပၵ်းတပ်ႉ ဝႆႉတီႈၵွင်းပႅၵ်ႇ ၼႂ်းၵႄႈဝၢၼ်ႈၼွင်လိူဝ်ႇလႄႈ ဝၢၼ်ႈမႆႉပူၵ်ႇ ၸႄႈဝဵင်းမိူင်းပၼ်ႇၼၼ်ႉ တဝ်ထိူၼ်ႇ ၸွမ်းႁွႆးတိၼ် တပ်ႉ ၾၢႆႇယူႇလီ ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၸိူဝ်းလူင်းပိုၼ်ႉတီႈ ၵူတ်ႇထတ်းတၢင်းပဵၼ် ၶူဝ်ႊဝိတ်ႉ 19 ၼၼ်ႉ လႄႈ သွင်ၾၢႆႇ လႆႈပဵၼ်ပၢင်တိုၵ်းၵၼ် ႁိမ်းၸဝ်ႈမိူင်း ၼႃးဝွၼ် ဢိူင်ႇၼႃးဝွၼ် ဢၼ်မီးၾၢႆႇၸၢၼ်း ဝဵင်းမိူင်းပၼ်ႇ ယၢၼ်ဝဵင်းမွၵ်ႈ 25 လၵ်း ။
ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ- “ၾၢႆႇသိုၵ်းလူင်ပွင်ၸိုင်ႈမၢၼ်ႈ ၶဝ် ဢမ်ႇငူပ်ႉ ငီႉတီႈလုမ်းၵပ်းသၢၼ်သေ ၵႂႃႇတူင်ႉၼိုင် ၼႂ်းထိူၼ်ႇၼႂ်းၶိူဝ်းလႄႈ ၸင်ႇလႆႈပဵၼ်ပၢင်တိုၵ်း၊ ယွၼ်ႉဝႃႈ တၢင်းပွတ်း တွၼ်ႈၼၼ်ႉၵေႃႈ ၵူၼ်းႁဝ်းၶႃႈ တူင်ႉၼိုင် ယူႇၶႃႈလူး” ဝႃႈၼႆ။
လွင်ႈၼႆႉ ၾၢႆႇၶွင်ႇသီႇဢဝ်ၶိုၼ်းၸိုင်ႈတႆး ပွင်ႇၶၢဝ်ႇၸူး ၾၢႆႇႁူမ်ႇလူမ်ႈသိုၵ်းမၢၼ်ႈ၊ ၾၢႆႇႁူမ်ႇလူမ်ႈသိုၵ်း ၸယၽ တွပ်ႇလၢတ်ႈဝႃႈ ယင်းပႆႇႁူႉငဝ်းလၢႆး ၼႂ်းပိုၼ်ႉတီႈ တေၸွပ်ႇထၢမ်သေ ၵွႆႈလၢတ်ႈ ပၼ်ၶိုၼ်း – ၸဝ်ႈသိုၵ်း ဢုမ်ႈၶိူဝ်း သိုပ်ႇလၢတ်ႈထႅင်ႈၼင်ႇၼႆ။
ဝၼ်းတီႈ 7/4/2020 ၼႆႉ ၾၢႆႇပၢႆးယူႇလီမေႃယႃ ၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လူင်း ပိုၼ်ႉတီႈ ၵူတ်ႇထတ်းပၢႆးယူႇလီပၼ်ၵူၼ်းမိူင်း ၵဵဝ်ႇၵပ်းတၢင်းပဵၼ်ၶူဝ်ႊဝိတ်ႉ 19 တၢင်းပွတ်းဢိူင်ႇၼႃးဝွၼ် ၸႄႈဝဵင်း မိူင်းပၼ်ႇ ၺႃးတပ်ႉသိုၵ်းလူင်ပွင်ၸိုင်ႈ ႁၢမ်ႈႁႄႉ။ ယင်းပၢႆတဵင် ၵႂၢမ်းၼၵ်းၸူးၵူၼ်းဝၢၼ်ႈဢိူင်ႇၼႃးဝွၼ်ဝႃႈ တေဢမ်ႇ လႆႈပၼ် RCSS မႃးၵူတ်ႇထတ်းပၢႆးယူႇလီ ဝႃႈၼႆ။
ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်း တူဝ်ႈမိူင်း NCA ဝႆႉသေတႃႉ မိူဝ်ႈႁၢင်ႈလိူၼ်ၾႅပ်ႊၿိဝ်ႊရီႊ ႁူဝ်လိူၼ်မၢတ်ႉၶျ်ၼၼ်ႉၵေႃႈ သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉၶွင်ႇသီႇ ဢဝ်ၶိုၼ်းၸိုင်ႈတႆး ၼႂ်းၸႄႈဝဵင်းမိူင်းၵိုင် မိူင်းတႆး ပွတ်းၸၢၼ်း။
