တပ်ႉသိုၵ်းလူင်ပွင်ၸိုင်ႈမၢၼ်ႈ ၵူတ်ႉၶၢႆသွၵ်ႈတဝ်ႁိူၼ်းၵူၼ်းဝၢၼ်ႈ ၽွင်းၸဝ်ႈႁိူၼ်းဢမ်ႇယူႇသေ ဢဝ်လၢႆၶူဝ်းၶွင်ၵႂႃႇ။

ဝၼ်းတီႈ 5/4/2020 ယၢမ်းႁူဝ်ၶမ်ႈ သိုၵ်းလူင်ပွင်ၸိုင်ႈမၢၼ်ႈ ယႃႉၽၵ်းတူႁိူၼ်း ၵူၼ်းဝၢၼ်ႈလင်ၼိုင်ႈ တီႈမၢၼ်ႈထမ်ႈ ဢိူင်ႇလွႆၶၢင် ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။

မၼၼ်ႇထၼ်ႇ ၸဝ်ႈႁိူၼ်း ဢၼ်ၺႃးယႃႉသွၵ်ႈတဝ်ႁိူၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈႁဝ်း ဢဝ်လုၵ်ႈဢွၼ်ႇ ၵႂႃႇႁွင်ႈ ယႃ(ဆေးခန်း) ပွၵ်ႈမႃးသေ လႆႈႁၼ်ၽၵ်းတူႁိူၼ်းၶႃႈႁဝ်း ၺႃးယႃႉၵွႆဝႆႉ။ ယဝ်ႉၵေႃႈ ၼႂ်းႁိူၼ်းယေးၵေႃႈ ထုၵ်ႇသွၵ်ႈတဝ် ဢဝ်ၶူဝ်းၶွင်လႄႈ ယႃႈယႃ လုၵ်ႈဢွၼ်ႇ၊ ၼမ်ႉၵိူဝ်(ဓာတ်ဆား) ၸိူဝ်းၼႆႉ ဢဝ်ၵႂႃႇမူတ်း။ လိူဝ်ၼၼ်ႉ ၼႂ်းႁွင်ႈသိုင်ႇၾႆးၵေႃႈ ဢဝ် ၶဝ်ႈသၢၼ်၊ ၼမ်ႉမၼ်း၊ ၵိူဝ် ၸိူဝ်းၼႆႉ ၵႂႃႇမူတ်း ဢမ်ႇၵိုတ်းလိူဝ်သင် ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈၽူႈၵွၼ်းသၢႆသိုၵ်းမၢၼ်ႈ ယွမ်းႁပ်ႉ ယွမ်းၼွမ်းဝႃႈ မိူဝ်းၼႃႈမႃး တေဢမ်ႇပၼ်ပဵၼ်ထႅင်ႈ ဝႃႈၼႆ။

ဢူးႁွင်ႊၶွင်ႊ ၽူႈၵွၼ်းဢိူင်ႇလွႆၶၢင် လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈသိုၵ်းတပ်ႉမတေႃႇ သိုပ်ႇၾူၼ်းမႃးၶႃႈဢေႃႈ။ ၶဝ်ဝႃႈ တေပၼ်ၵႃႈယႃႈယႃၶိုၼ်း။ ၶႃႈၵေႃႈလၢတ်ႈဝႃႈ မိူဝ်းၼႃႈမႃး ယႃႇႁႂ်ႈပဵၼ်ၸိူင်ႉၼႆထႅင်ႈၼႆ ၶဝ်ၵေႃႈႁပ်ႉပၢၵ်ႇၵႂႃႇ ၶႃႈဢေႃႈ ” ဝႃႈၼႆ။

ၶွင်ၵိၼ်ယမ်ႉ ၵူၼ်းမိူင်း ဢၼ်သိုၵ်းလူင်ပွင်ၸိုင်ႈမၢၼ်ႈဢဝ်ၵႂႃႇၼၼ်ႉ ပဵၼ်ၶူဝ်းၶွင်ၵဵပ်းႁွမ်ဝႆႉ တႃႇၽွင်း တၢင်းပဵၼ် ၶူဝ်ႊဝိတ်ႉ 19 ၼႆႉ ဝႃႈၼႆ။

မၼၼ်ႇထၼ်ႇ လၢတ်ႈဝႃႈ “ ဢၼ်ၶဝ်ဢဝ်ၵႂႃႇၼၼ်ႉ တေမီးၵႃႈၶၼ်မွၵ်ႈ 5 မိုၼ်ႇပျႃးၼႆႉၵူၺ်းၼႆသေတႃႉ တွၼ်ႈတႃႇ ႁဝ်းၶႃႈ ၵူၼ်းႁိူၼ်းဢၼ် ႁဵတ်းၵိၼ်ၸွမ်းဝၼ်းလႂ် ဝၼ်းၼၼ်ႉတႄႉ ပေႃးၵိၼ်တႃႇ မွၵ်ႈ 2 ဝူင်ႈယဝ်ႉၶႃႈဢေႃႈ” ဝႃႈၼႆ။

တီႈမၢၼ်ႈထမ်ႈၼႆႉ ၽွင်းၸဝ်ႈႁိူၼ်းဢမ်ႇယူႇၼၼ်ႉ ၵႆႉၵႆႉၺႃးယႃႉၽၵ်းတူႁိူၼ်းယေး သွၵ်ႈတဝ်ဢဝ်ၶူဝ်းၶွင်ႁိူၼ်းယေး ႁဵတ်းၼႆတႃႇသေႇ ဝႃႈၼႆ။

မၢၼ်ႈထမ်ႈ ဢိူင်ႇလွႆၶၢင်ၼႆႉ တင်းမူတ်းမီးလင်ႁိူၼ်း 15 လင်။ လုၵ်ႉၵူတ်ႉၶၢႆၵႂႃႇ ႁိုင်မွၵ်ႈ 20 မိၼိတ်ႉ ။

ၼႂ်းၸႄႈဝဵင်းၵူတ်ႉၶၢႆၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးၼမ်၊ ပၢင်တိုၵ်းၵေႃႈၵႆႉၵႆႉပဵၼ်ယူႇတႃႇသေႇ။