ၽူႈၵုမ်းထတ်းလိၵ်ႈ ၸုမ်းၶၢဝ်ႇရၶႅင်ႇၵေႃႉၼိုင်ႈ  ၺႃးပလိၵ်ႈ ၸွႆးတြႃးလိူင်ႈၵေႃႇၵၢၼ်ႁၢႆႉ

ပလိၵ်ႈမၢၼ်ႈဝဵင်းၸိတ်ႉတူၺ်ႇ ၸေႈမိူင်း ရၶႅင်ႇ ဢဝ်လိူင်ႈ ၽူႈထတ်းလိၵ်ႈ ဢႄႊတီႊတိူဝ်ႊ ၸုမ်းၶၢဝ်ႇၼႃႊရိၼ်ႊၵျရႃႊ (မိူင်းရၶႅင်ႇ) ၼႄးဝႃႈ ၵေႃႇၵၢၼ်ႁၢႆႉ ဝႃႈၼႆ။

ပလိၵ်ႈၽူႈမီးၸၼ်ႉ တီႈႁူင်းပလိၵ်ႈၸိတ်ႉတူၺ်ႇလၢတ်ႈဝႃႈ – ဝၼ်းတီႈ31/3/2020 မိူဝ်ႈၼႆႉၵၢင်ၼႂ် မီးပလိၵ်ႈၾၢႆႇၸွပ်ႇၶၢဝ်ႇ SB မႃးပိုတ်ႇလိူင်ႈတီႈႁူင်းပလိၵ်ႈတႃႇဢဝ်လိူင်ႈ ဢူးၶၢႆႇမျၢတ်ႈၵျေႃႇ ဢႄႊတီႊတိူဝ်ႊ ၸုမ်းၶၢဝ်ႇ ၼႃႊရိင်ႊၵျရႃႊ- ဝႃႈၼႆ။

ၾၢႆႇၸွပ်ႇၶၢဝ်ႇ ၸိၼႄးဝႃႈ ၸုမ်းၶၢဝ်ႇ ၼႃႊရိင်ႊၵျရႃႊ ၼႆႉ ပိုၼ်ၽၢဝ်ႇၶၢဝ်ႇငၢဝ်း ဢၼ်ၵပ်းသိုပ်ႇတွင်ႈထၢမ် (ဢိၼ်ႊထိူဝ်ႊပိဝ်ႊ) ဝႆႉတင်း ၶၢႆႇသုၶ ၽူႈၶၢၼ်ပၢၵ်ႇတပ်ႉသိုၵ်း ရၶႅင်ႇ AA လႄႈ ၸင်ႇလႆႈဢဝ်လိူင်ႈ လူၺ်ႈမၢႆမီႈ 50 (ၵ) လႄႈ 52 (ၵ) ၽဵဝ်ႈလၢင်ႉၵၢၼ်ၵေႃႇၵၢၼ်ႁၢႆႉ ဝႃၼႆ။

ၸုမ်းၶၢဝ်ႇ  ၼႃႊရိင်ႊၵျရႃႊ ၼႆႉပဵၼ်လုၵ်ႈၸုမ်း  ၸုမ်းၶၢဝ်ႇ BNI   ၊ပဵၼ်ပႃးၽူႈၵေႃႈတင်ႈ ၸုမ်းၶၢဝ်ႇ BNI  ဢၼ်ပဵၼ်လုၵ်ႈၸုမ်း ၶွင်ႊသီႊမီႊတီႊယႃႊၸိုင်ႈမိူင်း။ တူဝ် ဢူးၶၢႆႇမျၢတ်ႉၵျေႃႇၵေႃႈ ၶဝ်ႈပႃးဝႆႉၼႂ်း ၶွင်ႊသီႊမီႊတီႊယႃႊၸိုင်ႈမိူင်း။

မိူၼ်ၼၼ်ၼင်ႇၵဝ်ႇမိူဝ်ႈဝၼ်းတီႈ 30/3/2020 မိူဝ်ႈဝႃးၵၢင်ၶမ်ႈၵေႃႈ ပလိၵ်ႈဝဵင်းလိူဝ်ႇ တီႉၺွပ်းဢဝ်ဢူးၼေႇမဵဝ်းလိၼ်း ၽူႈထတ်းလိၵ်ႈ ဢႄႊတီႊတိူဝ်ႊ ၸုမ်းၶၢဝ်ႇ VOM တီႈဝဵင်းလိူဝ်ႇသေ မိူဝ်ႈၼႆႉ ဝၼ်းတီႈ 31/3/2020 ဢဝ်လိူင်ႈလူၺ်ႈမၢႆမီႈ ၽဵဝ်ႈလၢင်ႉၵၢၼ်ၵေႃႇၵၢၼ်ႁၢႆႉၼၼ်ႉၼင်ႇၵဝ်ႇ။