ၵူၼ်းမီးၸိူဝ်ႉမႅင်း ၶူဝ်ႊဝိတ်ႉ 19 ဢၼ်လူင်ပွင်ၸိုင်ႈ ၾၢႆႇပၢႆးယူႇလီ ပိုၼ်ၽၢဝ်ႇ ပဵၼ်တၢင်းၵၢၼ်ၵေႃႉထူၼ်ႈ 5 ၼႂ်း  မိူင်းႁူမ်ႈတုမ်ၼၼ်ႉ လူႉတၢႆၵႂႃႇမိူဝ်ႈၼႆႉ 31/3/2020 ယၢမ်းၵၢင်ၼႂ်ၸဝ်ႉ။

မၼ်းၸၢႆးၼႆႉ မီးဢႃယု 69 ပီ လုၵ်ႉမိူင်းဢေႃးသတေးလျ လႄႈ မိူင်းသိင်ႊၵပူဝ်ႊမႃးသေ ၶဝ်ႈယူတ်းယႃတူဝ်ဝႆႉတီႈႁူင်းယႃလူင် ဝေႇပႃႇၵီႇ ဝဵင်းတႃႈၵုင်ႈ။ လူင်ပွင်ၸိုင်ႈပိုၼ်ၽၢဝ်ႇ ဝႃႈမၼ်းၸၢႆးတိတ်းၸပ်းၸိူဝ်ႉမႅင်း မိူဝ်ႈဝၼ်းတီႈ 27/3/2020 ။

ၸဝ်ႈၼႃႈတီႈၾၢႆႇပၢႆးယူႇလီ ဝဵင်းတႃႈၵုင်ႈ ၵေႃႉ ႞ ၵေႃႈယိုၼ်ယၼ်လၢတ်ႈတီႈၽူႈတွႆႇႁွၵ်ႈဝႃႈ – “ဢႃယုမၼ်းယႂ်ႇယဝ်ႉ မၼ်းဢမ်ႇမီးႁႅင်းၵမ်ႉတူဝ် ၾၢႆႇၼိုင်ႈၵေႃႈမၼ်းမီးတၢင်းပဵၼ်ဝႆႉ ႁင်းမၼ်း ၵွပ်ႈၼၼ် လႄႈ  ဢမ်ႇၶၢမ်ႇလႆႈ  သေ လူႉတၢႆၵႂႃႇ ။ ၵူၼ်းတိတ်းၸပ်းတၢင်းပဵၼ်တၢင်ႇၵေႃႉတႄႉ ပၢႆးယူႇလီၶဝ်ၶႅမ်ႉလႅပ်ႈယူႇ” – ဝႃႈၼႆ။

ၶၢဝ်ႇ မႅၼ်မႃႇတတိၼ်း ဢွၵ်ႇဝႆႉဝႃႈ မၼ်းၸၢႆးၼႆႉပဵၼ်ၵူၼ်းယူႇၼႂ်းဝဵင်းမင်ႇၵလႃႇတွင်ႇၺုၼ်ႉ ၊  ဝဵင်းတႃႈၵုင်ႈ။ မၼ်းၸၢႆးတိုၼ်းမီး တင်းပဵၼ် ၵႅၼ်ႊသိူဝ်ႊ (မရဵင်း) ၶူႈၼင် ၊ ၵႂႃႇယူတ်းယႃတူဝ်တီႈမိူင်း ဢေႃးသတေးလျႃး ႁိုင် 1 လိူၼ်သေ ပွၵ်ႈမႃးတၢင်းမိူင်းသိင်ႊၵပူဝ်ႊ ယဝ်ႉၸင်ႇၶဝ်ႈမိူင်းမၢၼ်ႈဝႃႈၼႆ။

ဢၼ်လႆႈယူႇၸမ်ႁူပ်ႉထူပ်းတင်းမၼ်းၸၢႆးသမ်ႉ ပဵၼ်ၵူၼ်းပဵၼ် ၶူဝ်ႊဝိတ်ႉ 19  ၵေႃႉထိ 10 ၊ ပဵၼ်ၽူႈၸၢႆး ဢႃယု 45 ပီ။ ယၢမ်းလဵဝ် မၼ်းၸၢႆးယူႇတီႈႁူင်းယႃ ဝေႇပႃႇၵီႇ  ဝဵင်းတႃႈၵုင်ႈ ၼင်ႇၵဝ်ႇ – ဝႃႈၼႆ။

ယၢမ်းလဵဝ် ၼႂ်းမိူင်းႁူမ်ႈတုမ်မၢၼ်ႈ မီးၵူၼ်းၸပ်းတင်းပဵၼ် ၶူဝ်ႊဝိတ်ႉ 19 ယူႇ 14 ၵေႃႉယဝ်ႉ။