Monday, May 20, 2024

လူင်ပွင်ၸိုင်ႈမၢၼ်ႈယိုၼ်ယၼ်ဝႃႈ ၵူၼ်းၵျွၵ်ႉမႄးၵေႃႉ႞ၸပ်းတၢင်းပဵၼ် ၶူဝ်ႊဝိတ်ႉ 19

Must read

လူင်ပွင်ၸိုင်ႈမၢၼ်ႈၼေႇပျီႇတေႃႇ ႁွင်ႈၵၢၼ်ၾၢႆႇပၢႆးယူႇလီ ပိုၼ်ၽၢဝ်ႇဝႃႈ ႁူပ်ႉႁၼ် ၵူၼ်းတိတ်းၸပ်း တၢင်းပဵၼ်ၸိူဝ်ႉမႅင်း ၶူဝ်ႊဝိတ်ႉ-19 ထႅင်ႈ 4 ၵေႃႉ၊ ၼႂ်းၼၼ်ႉပႃးၵူၼ်း ၼႂ်းၸႄႈဝဵင်းၵျွၵ်ႉမႄးၵေႃႉၼိုင်ႈ ။ဝၼ်းမိူဝ်ႈၼႆႉ ဝၼ်းတီႈ 30/3/2020 ယၢမ်းၵၢင်ၶမ်ႈ 7 မူင်း လူင်ပွင်ၸိုင်ႈပိုၼ်ၽၢဝ်ႇ ဝႃႈ ၵူတ်ႇထတ်း ႁူပ်ႉႁၼ်ၵူၼ်းၸပ်းတၢင်းပဵၼ် ၶူဝ်ႊရူဝ်ႊၼႃႊ COVID 19 ထႅင်ႈ 4 ၵေႃႉ ။ ၼႂ်းၼၼ်ႉပႃးၵူၼ်းဝၢၼ်ႈ ၼႂ်းဢိူင်ႇၶူဝ်မုင်း ဝဵင်းၵျွၵ်ႉမႄးၵေႃႉၼိုင်ႈ၊ မၼ်းလုၵ်ႉမိူင်းထႆးပွၵ်ႈမႃး ဝႃႈၼႆ။။

 

- Subscription -

ၵဵဝ်ႇၵပ်းလွင်ႈၼႆႉ ၸၢႆးထုၼ်းၺၢၼ်ႇ ၽွင်းတႅၼ်းသၽႃးၸေႈမိူင်း ဝဵင်းၵျွၵ်ႉမႄးလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈၶႃႈ ဢေႃႈ။ ပဵၼ်လုၵ်ႈႁဵၼ်းၸၼ်ႉၸွမ် ပီသၢမ် ပဵၼ်လုၵ်ႈဢွၼ်ႇၸၢႆး ၵူၼ်းဢိူင်ႇၶူဝ်မုင်း  ၼႆၶႃႈဝႃႇ  ။ လႆႈႁူႉတႅတ်ႈတေႃးယဝ်ႉၶႃႈ။ တေႃႈလဵဝ် ဢၼ်ထၢင်ႇထိူမ်သေ သူင်ႇထတ်း  ၸိူဝ်ႉမႅင်းဝႆႉလၢႆလၢႆၵေႃႉၵွၼ်ႇဢေႃႈ” – ဝႃႈၼႆ။

ဢၼ်လူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ ၵူၼ်းတိတ်းၸၢင်းပဵၼ် ၶူဝ်ႊဝိတ်ႉ 19 ထႅင်ႈ 3 ၵေႃႉၼၼ်ႉပဵၼ် ၵူၼ်းယိင်း သွင်ၵေႃႉ တင်းၵူၼ်းၸၢႆးၵေႃႉၼိုင်ႈ ပဵၼ် ၶႅၵ်ႇတွင်ႈတဵဝ်း ၵူၼ်းမိူင်းၾရင်ႊသဵတ်ႈ တင်း 3 ၵေႃႉ။ ၽူႈယိင်း သွင်ၵေႃႉၼၼ်ႉ ၵေႃႉၼိုင်ႈ ဢႃယု 61 ထႅင်ႈၵေႃႉၼိုင်ႈ 66 ၵေႃႉ။ ၽူႈၸၢႆး ၼၼ်ႉၵေႃႈ ဢႃယု 65 ပီ။  ယၢမ်းလဵဝ်  မီးတီႈ ႁူင်းႁႅမ်းလင်ၼိုင်ႈ ဝဵင်းတႃႈၵုင်ႈတင်း သၢမ်ၵေႃႉ။ ( ၵူၼ်းသူင်ႇၶႅၵ်ႇ (သူင်ႇၶဝ်ဢႅဝ်ႇၼၼ်ႉ)  တိတ်းၸပ်းၸိူဝ်ႉမႅင်း (လူင်ပွင်ၸိုင်ႈပိုၼ်ၽၢဝ်ႇပဵၼ်တၢင်းၵၢၼ်မိူဝ်ႈဝၼ်းတီႈ 28/3/2020) လႄႈ ၸင်ႇလႆႈၵုမ်းတူဝ်ၶႅၵ်ႇ 4 ၵေႃႉသေၵူတ်ႇထတ်းတၢင်းပဵၼ်။ ၼႂ်းၶဝ် 4 ၵေႃႉၼၼ်ႉ ၵူတ်ႇထတ်းၺႃးၸိူဝ်ႉမႅင်း 3 ၵေႃႉ။)

ၸၢႆးၵူၼ်းၵျွၵ်ႉမႄးၼႆႉ ၶၢဝ်ႇလူင်ပွင်ၸိုင်ႈတႄႉ ႁၢႆးငၢၼ်းဝႃႈ မၼ်းၸၢႆးလုၵ်ႉတၢင်းမိူင်းထႆး/မိူင်းၵွၵ်ႈပွၵ်ႈမႃး တၢင်းတႃႈၶီႈလဵၵ်း ဝၼ်းတီႈ 25/3/2020၊ ယူႇတႃႈၶီႈလဵၵ်း သွင်ၶိုၼ်းသေ ထိုင်ဝဵင်းၵျွၵ်ႉမႄး ဝၼ်းတီႈ 28/3/2020။ ယၢမ်းလဵဝ် တႄႉၵုမ်းတူဝ်မၼ်းၸၢႆးယူတ်းယႃဝႆႉယူႇတီႈ ႁူင်းယႃလူင်ဝဵင်းၵျွၵ်ႉမႄးဝႆႉ။

ၸၢႆးထုၼ်းၺၢၼ်ႇလၢတ်ႈထႅင်ႈဝႃႈ – “ယၢမ်းလဵဝ်တီႈၵျွၵ်ႉမႄးၼႆႉ  ၵူၼ်းၵႂႃႇႁဵတ်းၵၢၼ်တၢင်ႇဝၢၼ်ႈ တၢင်ႇမိူင်းသေပွၵ်ႈမႃးမီးတီႈႁူင်းႁဵၼ်း ၸၼ်ႉသုင် 100 ပၢႆ။  တႃႇတေၵုမ်းလႆႈၼင်ႇႁိုဝ်ၸိူဝ်ႉမႅင်း တေဢမ်ႇၽႄႈၼမ်ၼၼ်ႉ တီႈၵျွၵ်ႉမႄးၼႆႉ ပိုတ်ႇဝႆႉပၼ် ၽၵ်းတူမိူင်း ႁူးလဵဝ်ၵူၺ်းယဝ်ႉ”-  ဝႃႈၼႆ။

ယၢမ်းလဵဝ်ၵူၼ်းမိူင်းႁူမ်ႈတုမ်ပတ်းပိုၼ်ႉ ဢၼ်လူင်ပွင်ၸိုင်ႈပိုၼ်ၽၢဝ်ႇ ၸိုဝ်ႈသဵင်ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တင်းမူတ်း မီး 14 ၵေႃႉ၊ ၵူၼ်းထုၵ်ႇထၢင်ႇထိူမ် မီး 400 ပၢႆ။

ၼႂ်းလုမ်ႈၾႃႉတင်းမူတ်း ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 မီး 741774 ၵူၼ်းတၢႆယွၼ်ႉၸိူဝ်ႉမႅင်းၼႆႉမီး 35334 ၵေႃႉယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း