ၼၢင်းယိင်း ဢႃယု 41 ပီ ၵူၼ်းၵေးသီးၵေႃႉဢၼ်ထၢင်ႇထိူမ် ဝႃႈၸပ်းတၢင်းပဵၼ် ၶူဝ်ႊဝိတ်ႊ 19 ၼၼ်ႉ လူႉတၢႆ တီႈႁူင်းယႃမိူင်းၼွင် ၽွင်းမေႃယႃတိုၵ်ႉပႂ်ႉတူၺ်းငဝ်းလၢႆး ဝႆႉ ။
ဝၼ်းတီႈ 20/3/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ပၢႆးယူႇလီ လႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇ ဢွၵ်ႇမႃးဝႃႈ ၼၢင်းယိင်းၵေႃႉၼိုင်ႈ ဢၼ်မီးတၢင်းပဵၼ်မိူၼ် ၶူဝ်ႊဝိတ်ႊ 19 သေ ယူတ်းယႃတူဝ်ဝႆႉတီႈႁူင်းယႃ ၸႄႈဝဵင်းၵေးသီး ၸိုင်ႈတႆးပွတ်းၸၢၼ်းၼၼ်ႉ လူႉတၢႆယဝ်ႉဝႃႈၼႆ။
လိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ယူႇတီႈၾၢႆႇမေႃယႃ တိုၵ်ႉဢဝ်လိူတ်ႈမၼ်းၼၢင်းသူင်ႇၵႂႃႇၵူတ်ႇထတ်းတူၺ်း တီႈႁူင်းယႃလူင် တႃႈၵုင်ႈဝႆႉယူႇၼၼ်ႉ မၼ်းၼၢင်းလႆႈလူႉတၢႆၵွၼ်ႇ ” ဝႃႈၼႆ။
မိူဝ်ႈပူၼ်ႉမႃး 2 သွင်ဝူင်ႈၼၼ်ႉ ၼၢင်းယိင်းၵေႃႉၼႆႉ တိုၵ်ႉလုၵ်ႉမိူင်းထႆးသေပွၵ်ႈမႃးၵူၺ်း လႄႈ ၸင်ႇလႆႈဝႆႉပဵၼ် ၵူၼ်းပဵၼ်ဢၼ်ထုၵ်ႇလီပႂ်ႉတူၺ်း ၶူဝ်ႊဝိတ်ႉ-19 ဝႃႈၼႆ။
ၼၢင်းယိင်း ၵေႃႉၼႆႉ မိူဝ်ႈ ဝၼ်းတီႈ 5 ၼၼ်ႉ မၼ်းၼၢင်း ဢႆ၊ ႁိူဝ်ႉ မိူၼ်ၾၢင်ႁၢင်ႈ တၢင်းပဵၼ် ၶူဝ်ႊဝိတ်ႉ-19 သေ ထိုင်မႃး ဝၼ်းတီႈ 19 ၸင်ႇၵႂႃႇႁူင်းယႃ မိူင်းၼွင် လႆႈလူႉတၢႆၵႂႃႇတီႈႁူင်းယႃၼၼ်ႉ ။ ၾၢႆႇပၢႆးယူႇလီတႄႉ ပိုၼ်ၽၢဝ်ႇဝႆႉဝႃႈ မၼ်းၼၢင်းတၢႆယွၼ်ႉတၢင်းပဵၼ် ပွတ်ႇၵႂ်ႈလႄႈ ယဵဝ်ႈဝၢၼ် ဝႃႈၼႆ။
ပူၼ်ႉမႃး ဝၼ်းတီႈ 18 ၼၼ်ႉၵေႃႈ ၵူၼ်းပဵၼ်ၵေႃႉၼိုင်ႈ ဢၼ်ပႂ်ႉတူၺ်းတၢင်းပဵၼ် ၶူဝ်ႊဝိတ်ႉ-19 တၢႆတီႈႁူင်းယႃၵဵင်းတုင် ၸိုင်ႈတႆးပွတ်းဢွၵ်ႇၶူင်း ။
တေႃႈထိုင်ယၢမ်းလဵဝ် ၼႂ်းမိူင်းႁူမ်ႈတုမ်မၢၼ်ႈၼႆႉ ပႆႇမီးၶေႃႈပိုၼ်ၽၢဝ်ႇပဵၼ်တၢင်းၵၢၼ်ၵဵဝ်ႇၵပ်းၵူၼ်းၸပ်းတၢင်းပဵၼ်ၶူဝ်ႊဝိတ်ႊ 19 သေၵေႃႉ။ ၵူၺ်းၵႃႈ ၵူၼ်းဢၼ်ထုၵ်ႇထၢင်ႇထိူမ်သေပႂ်ႉတူၺ်းဝႆႉၼၼ်ႉ လႆႈတၢႆၵႂႃႇယဝ်ႉ 8 ၵေႃႉ ။
တႄႇဢဝ်ဝၼ်းတီႈ 19/3/2020 ၼႆႉၵႂႃႇ ယူႇတီႈႁွင်ႈၵၢၼ်ၽွင်းလူင်မိူင်းမၢၼ်ႈ ၾၢႆႇၼွၵ်ႈမိူင်း ပိုၼ်ၽၢဝ်ႇဝႃႈ ႁၢမ်ႈၵူၼ်းၼွၵ်ႈမိူင်း (ၵူၼ်းမိူင်းတီႈသၢမ်) ၶဝ်ႈဢွၵ်ႇ ၸွမ်းၽၵ်းတူလႅၼ်လိၼ် – ဝႃႈၼႆဝႆႉ ။
မိူင်းၸိုင်ႈထႆး ဢၼ်တိတ်းၸပ်းမိူင်းမၢၼ်ႈတႄႉ ပိုၼ်ၽၢဝ်ႇဝႃႈမီးၵူၼ်းတိတ်းၸပ်းတၢင်းပဵၼ် ၶူဝ်ႊဝိတ်ႉ-19 ၼႆႉ 322 ၵေႃႉ။ ၼႂ်းၼၼ်ႉပဵၼ်ၵူၼ်းမိူင်းႁူမ်ႈတုမ်မၢၼ်ႈ 2 ၵေႃႉ ။ လုၵ်ႈဢွၼ်ႇဢႃယု 6 လိူၼ် 1 ၵေႃႉ။
