လုမ်းတၢင်ႇမၢၼ်ႈ ဢၼ်ပၵ်းတီႈဝဵင်းလူင်မိူင်းၵွၵ်ႇ(ၵုင်းထဵပ်ႈ) ပိုၼ်ၽၢဝ်ႇမိူဝ်ႈဝၼ်းတီႈ 15/3/2020 ၼၼ်ႉဝႃႈ ယူႇတီႈႁႅင်းၵၢၼ်မိူင်းမၢၼ်ႈသေ ၶၢဝ်းယၢမ်းလိုဝ်ႈၵၢၼ် လိူၼ်ႁႃႈသွၼ်းၼမ်ႉၼႆႉ ပေႃးပဵၼ်လႆႈ ယႃႇပေၽူမ်ႈပွၵ်ႈမိူဝ်းဝၢၼ်ႈၽႂ်မိူင်းမၼ်း ဝႃႈၼႆ။
ဢူးမဵဝ်းမျိၼ်ႉၼၢႆႇ ၽွင်းတၢင်ၽူႈမီးၸၼ်ႉၾၢႆႇႁႅင်းၵၢၼ်မိူင်းမၢၼ်ႈ လၢတ်ႈဝႃႈ – “ၶၢဝ်းသွၼ်းၼမ်ႉ လိူၼ် ႁႃႈ ၵေႃႈ ပေႃးပဵၼ်လႆႈယႃႇပေၵႂႃႇတၢင်းလႂ်။ ၶႂ်ႈတိုၵ်းသူၼ်းႁႂ်ႈဢွၼ်ၵၼ် ပႂ်ႉႁႄႈႁူထွမ်ႇၶၢဝ်ႇ ဢၼ်လူင်ပွင် ၸိုင်ႈ တေပိုၼ်ၽၢဝ်ႇႁၢႆးငၢႆးၼၼ်ႉ သေၵမ်း ”- ဝႃႈၼႆ။
သင်ဝႃႈႁႅင်းၵၢၼ်ၵူၼ်းမိူင်းႁူမ်ႈတုမ် ပွၵ်ႈႁိူၼ်းၶၢဝ်းသွၼ်းၼမ်ႉၸိုင် (1) တေလႆႈၸၢႆႇၵႃႈဝီႊသႃႊ ၶဝ်ႈမိူင်းၶိုၼ်း 1000 ဝၢတ်ႇ၊ (2) ပေႃးၶဝ်ႈမိူင်းထႆးၶိုၼ်း ၸၢင်ႈၺႃးၵၵ်းၶင်တူဝ်တႃႇ 14 ဝၼ်း လႄႈ ၸၢင်ႇႁူပ်ႉတၢင်းယၢပ်ႇၽိုတ်ႇ ထႅင်ႈ၊ ၵွပ်ႈၼၼ်ႁႂ်ႈ ပႂ်ႉတူၺ်းငဝ်းလၢႆး တၢင်းပဵၼ်ဝူႊႁၢၼ်ႉ ထႅင်ႈသေၵမ်း ဝႃႈၼႆ။
ၵူၺ်းၵႃႈ ၽွင်းၶၢဝ်းလိူၼ်ႁႃ သွၼ်းၼမ်ႉၼႆႉ ပဵၼ်ၶၢဝ်းဢၼ် ၵူၼ်းၵႂႃႇႁဵတ်းၵၢၼ်တီႈၵႆ ဢွၼ်ၵၼ် ပွၵ်ႈႁိူၼ်းၽႂ်မၼ်းသေ ႁဵတ်းၵၢၼ် ၵိၼ် ၵၢၼ် လူႇ ဢုၼ်ႇၸႂ်ပေႃႈမႄႈၵူၼ်းၸိူဝ်းၵိုတ်းတၢင်းလင်။
ၵဵဝ်ႇၵပ်းၶေႃႈပိုၼ်ၽၢဝ်ႇလုမ်းတၢင်မၢၼ်ႈမိူင်းၵွၵ်ႇၼႆသေ ဢူးမူဝ်းၵဵဝ်း ႁူဝ်ပဝ်ႈၵေႃႇမတီႇ တူင်ႉၼိုင်သုၼ်ႇ လႆႈႁႅင်းၵၢၼ်လၢတ်ႈဝႃႈ – “ ပေႃးၶႂ်ႈႁႂ်ႈမၼ်းၶိုဝ်းယမ်ပဵၼ်ၵၢၼ်တႄႉ တင်းသွင်ၸိုင်ႈမိူင်း တၵ်းလႆႈႁူမ်ႈမိုဝ်း ၵၼ်သေ ဢွၵ်ႇပၵ်းဢွၵ်ႇပိူင်ပၼ် ပိုၼ်ၽၢဝ်ႇတႄႉတႄႉတိူဝ်ႇတိူဝ်ႇ ၸင်ႇတေယမ် ၶႃႈဢေႃႈ။ ပေႃးထုၵ်ႇ ဢိုတ်း ၽၵ်းတူၶဝ်ႈဢွၵ်ႇ ဝူင်ႈၵၢင်သွင်မိူင်းၵေႃႈ တေလႆႈဢိုတ်း။ ၼၼ်ၸင်ႇတေ ၸၢင်ႈႁၢမ်ႈႁႅင်းၵၢၼ်လႆႈ ” – ဝႃႈၼႆ။
ဢူးမိၼ်းဢူး ၾၢႆႇပၢႆးပၺႃႁႅင်းၵၢၼ် ၵေႃႈလၢတ်ႈဝႃႈ မိူင်းထႆးတွၼ်ႈတႂ်ႈၵမ်ႈၼမ် တင်ႈဢဝ်မိူဝ်ႈ ၽုၵ်ႈၼႆႉၵႂႃႇ လူင်ပွင်ၸိုင်ႈထႆးသင်ႇပိၵ်ႉဢိုတ်းႁူင်းႁဵၼ်း၊ ၵၢတ်ႇ၊ တီႈၵူၼ်းၶွၼ်ႈ၊ ၵူၼ်းၵိုၼ်းယဝ်ႉလႄႈ ၵူၼ်းမိူင်းမၢၼ်ႈၸိူဝ်းႁဵတ်းၵၢၼ်ၸွမ်းၵၢတ်ႇ ႁူပ်ႉတၢင်းယၢပ်ႇ ဝူၼ်ႇၵႂင် တေလႆႈပွၵ်ႈမိူဝ်း ႁိုဝ်တေလႆႈသိုပ်ႇယူႇထႅင်ႈ- ဝႃႈၼႆ။
“ၶဝ်ၵေႃႈဝူၼ်ႉယၢပ်ႇဢေႃႈ။ ၶၢဝ်းၼႆႉသမ်ႉပဵၼ်ၶၢဝ်းပိူၼ်ႈႁဵတ်းဝတ်းဝႂ် ငိုၼ်းၵေႃႈတေလႆႈသဵင်ႈၼမ်။ ၵွပ်ႈၼႆ တေလႆႈၶိုင်ၸိူင်ႉႁိုဝ်ဢမ်ႇႁူႉယဝ်ႉၵမ်ႈၽွင်ႈၼႆႉ”- ဢူးမိၼ်းဢူး လၢတ်ႈ။
တႃႇတေႁၢမ်ႈႁႅင်းၵၢၼ်ဢွၵ်ႇတၢင်း ၵႂႃႇမႃး ပွၵ်ႈမိူဝ်းႁိူၼ်းၶၢဝ်းလိူၼ်ႁႃႈၼၼ်ႉတႄႉ ၸုမ်းတူင်ႉၼိုင် တူင်ႇဝူင်းႁႅင်းၵၢၼ်မိူင်းမၢၼ်ႈ တေၶဝ်ႈဢုပ်ႇဢူဝ်းတင်းၸဝ်ႈႁူင်းၵၢၼ်၊ ပေႃႈလဵင်ႉမႄႈလဵင်ႉၵူၼ်းထႆးယူႇ ဢူးမဵဝ်းမျိၼ်ႉၼၢႆႇ ၽွင်းတၢင်ၵဵဝ်ႇၵပ်းႁႅင်းၵၢၼ်မိူင်းမၢၼ်ႈ လၢတ်ႈ။
ယၢမ်းလဵဝ် ႁႅင်းၵၢၼ်မိူင်းမၢၼ်ႈ ဢၼ်ၶဝ်ႈႁဵတ်းၵၢၼ်ၼႂ်းမိူင်းထႆး ဢၼ်မီးဝတ်းဝႂ်ပဵၼ်တၢင်းၵၢၼ်မီး 2.2. လၢၼ်ႉၵေႃႉသေ၊ ဢၼ်ဢမ်ႇ မီးဝတ်းဝႂ်ပဵၼ်တၢင်းၵၢၼ်၊ ၸိူဝ်းလၵ်ႉလွမ်ႁဵတ်းၵၢၼ် မီးယူႇ 1 လၢၼ်ႉပၢႆ ၸုမ်း NGO ၵဵဝ်ႇၵပ်းႁႅင်းၵၢၼ်ၼႂ်းမိူင်းထႆးပိုၼ်ၽၢဝ်ႇသဵၼ်ႈမၢႆဝႆႉၼင်ႇၼႆ။
ပဵၼ်ႇဢဝ်မႃးတီႈ rfa.org/burmese/
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ