ၾႆးမႆႈပႃႇ လၢမ်းလွႆ လၢမ်းမႆႈပႃးႁိူၼ်းၵူၼ်းဝၢၼ်ႈလင်ၼိုင်ႈဢၼ်မီးၼႂ်းပွၵ်ႉၸဵင်ႇပၢၼ်း လွင်ႈမၢတ်ႇၸဵပ်းလူႉတၢႆတႄႈဢမ်ႇမီး။
ဝၼ်းတီႈ 12/3/2020 မိူဝ်ႈၼႆႉယၢမ်းၵၢင်ဝၼ်း ၾႆးမႆႈပႃႇလၢမ်းထိုင် ႁိူၼ်း ဢူးၸၢၼ်းၼၢႆႇဢူး (ဢႃယု 36 ပီ) ဢၼ်မီးတီႈ ပွၵ်ႉၸဵင်ႇပၢၼ်း ။ ပဵၼ်ႁိူၼ်းဢၼ်ဢဝ်လဵၵ်းမုင်း လဵၵ်းၵင်ႈ သိူဝ်ႇၽၢၵ်ႈလႄႈ ၾႆးလၢမ်းမႆႈဝႆး။ ၶူဝ်းၶွင်ႁိူၼ်းလုသုမ်းတင်းၼမ်။ ၵူၼ်းမၢတ်ႇၸဵပ်းလုတၢႆတႄႉဢမ်ႇမီး။
ၸၢႆးၼုမ်ႇ ၵူၼ်းတူၼ်ႈတီးလၢတ်ႈဝႃႈ- “ ပွၵ်ႉၼၼ်ႉမၼ်းၶႂ်ႈပဵၼ်လႅၼ်ပိူၼ်ႈယဝ်ႉၶႃႈ။ မၼ်းပဵၼ်ႁိမ်းတၢပ်ႈလွႆ လူမ်းၵေႃႈႁႅင်းဢေႃႈ။ ၵူၼ်းၵေႃႈမႃးယူႇမႂ်ႇၼမ်ဢေႃႈပွၵ်ႉၼၼ်ႉ။ ပဵၼ်ပီႈၼွင်ႉမၢၼ်ႈတူင်ႈပဵင်းၵမ်ႈၼမ်။ ႁိူၼ်းၶဝ်ၵေႃႈ သုမ်ႉတွပ်း သေ ၶပ်ႉတိတ်းၵၼ်ၵႂႃႇမူတ်းဢေႃႈ။ ဢၼ်ၽဝ်ပႃႇၼႆႉၵေႃႈ ၽဝ်မႃးၸမ်တၢင်းပွၵ်ႉၵူၼ်းယူႇၼႃႇယဝ်ႉၶႃႈလူး။ တီႈတူၼ်ႈတီးၼႆႉ ၵႆႉၵႆႉလႆႈငိၼ်းမႃးယဝ်ႈၶႃႈ ၾႆးမႆႈပႃႇသေ မႆႈပႃးႁိူၼ်းၵူၼ်းၼႆႉ။ ” – ဝႃႈၼႆ။
မိူဝ်ႈဝၼ်းတီႈ 17 /2/2020 ပူၼ်ႉမႃး တီႈဝဵင်းတူၼ်ႈတီး ပွၵ်ႉၵျွင်းၵျီးၸုၼၼ်ႉၵေႃႈ ၾႆးမႆႈပႃႇသေ လၢမ်းမႆႈပႃးႁိူၼ်းၵူၼ်းလင်ၼိုင်ႈၼင်ႇၵဝ်ႇ။