သိုၵ်းလူင်ပွင်ၸိုင်ႈမၢၼ်ႈ ၶၢၼ်းၵူၼ်းဝၢၼ်ႈ တေႃႉမႆႉသူင်ႇတီႈလွႆတွၼ်း တႃႇသၢင်ႈတပ်ႉပၢင်သဝ်းၶဝ် ဝႃႈၼႆ။

တႄႇၸဵမ်မိူဝ်ႈ သိုၵ်းလူင်ပွင်ၸိုင်ႈမၢၼ်ႈ တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ပဵၼ်ပၢင် တိုၵ်းၵၼ် မိူဝ်ႈ ႁၢင်လိူၼ်ၾႅပ်ႊၿိဝ်ႊရီႊ ဝၼ်းတီႈ 27 တၢင်းပွတ်းလွႆတွၼ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၸိုင်ႈတႆး ပွတ်းၸၢၼ်းၼၼ်ႉ သေ ယၢမ်းလဵဝ် ဢွင်ႈတီႈ တပ်ႉပၢင်သဝ်း တီႈလွႆတွၼ်းၼၼ်ႉ RCSS/SSA လႆႈငိူင်ႉဝႄႈယဝ်ႉလႄႈ တပ်ႉသိုၵ်းမၢၼ်ႈ ၶိုၼ်ႈ ၵႂႃႇပၵ်းတပ်ႉၶိုၼ်း တေႁဵတ်းပၢင်သဝ်းၶဝ် ဝႃႈၼႆ။

ၵွပ်ႈၼႆလႄႈ သိုၵ်းလူင်ပွင်ၸိုင်ႈမၢၼ်ႈ ၶၢၼ်းၸႂ်ႉၵူၼ်းဝၢၼ်ႈ ၼႂ်းဢိူင်ႇႁူဝ်ၶၢႆး တင်း ဢိူင်ႇၵုင်းၺွင်ႇၽႃသႃး တႅပ်းမႆႉ ႁႃမႆႉ သူင်ႇပၼ် တႃႇတေသၢင်ႈတပ်ႉမႂ်ႇ ဝႃႈၼႆ။

ၸၢႆးမု ၵူၼ်းႁၢမ်းငၢႆး လၢတ်ႈတီႈၽူႈတွႆႇႁွၵ်ႈဝႃႈ “ တပ်ႉပၢင်သဝ်းၶဝ်ၼၼ်ႉ ၸမ်ဝၢၼ်ႈႁူဝ်ၶၢႆးၶႃႈဢေႃႈ။ ပူၼ်ႉမႃး 3 ဝၼ်း ၼႆႉ ၶဝ်ၸီႉသင်ႇ ႁႂ်ႈၵူၼ်းဝၢၼ်ႈ တႅပ်းမႆႉသေ သူင်ႇပၼ်ၶဝ်တီႈၼိူဝ်လွႆတွၼ်း။ တင်းမူတ်းမႆႉလၢႆလႅမ်ႈဢၼ်ဝႃႈၼၼ်ႉ ၶႃႈ ႁဝ်းၵေႃႈ ဢမ်ႇပႆႇႁူႉတႅတ်ႈတေႃး” ဝႃႈၼႆ။

ၸၢႆးဝၼ်း ၵူၼ်းၵုင်းၺွင်ႇၽႃသႃး လၢတ်ႈတီႈၽူႈတွႆႇႁွၵ်ႈဝႃႈ “ တီႈဝၢၼ်ႈႁဝ်းၶႃႈတႄႉ ၶဝ်ၸႂ်ႉတႅပ်းမႆႉသေ သူင်ႇပၼ်ၶဝ်။ ၵူၺ်းၵႃႈ တီႈဝၢၼ်ႈႁဝ်းၶႃႈ ငဝ်းလၢႆးဢမ်ႇၼိမ်သေ တေပႆႇၸၢင်ႈတႅပ်းသူင်ႇပၼ် ပွင်ႇၶၢဝ်ႇၸူးၶဝ်ၼင်ႇၼႆ” ဝႃႈၼႆ။

တေႃႈလဵဝ် တပ်ႉသိုၵ်းမၢၼ်ႈ ဢၼ်မီးတီႈၼိူဝ်လွႆတွၼ်းၼၼ်ႉ တေႁဵတ်းတပ်ႉပၢင်သဝ်းမႂ်ႇၼႆသေ ၸီႇသင်ႇႁႂ်ႈၵူၼ်းဝၢၼ်ႈ ဢၼ်ယူႇႁိမ်းႁွမ်း ၸွမ်းလွႆတွၼ်းၼၼ်ႉ တႅပ်းမႆႉသူင်ႇပၼ် တႃႇ 1000 လႅမ်ႈပၢႆ ဝႃႈၼႆ။

ယၢမ်းလဵဝ် RCSS တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပၢင်တိုၵ်းယဵၼ်ၵႂႃႇယဝ်ႉသေတႃႉ တၢင်ႇၾၢႆႇသၢႆသိုၵ်းမၢၼ်ႈတႄႉ တိုၵ်ႉတူင်ႉၼိုင်ၵႂႃႇ မႃးၼႂ်းဝၢၼ်ႈယူႇ ဝႃႈၼႆ။

ၸၢႆးဝၼ်း လၢတ်ႈဝႃႈ “ တိုၵ်ႉမီးသိုၵ်းမၢၼ်ႈ ၶဝ်ႈဢွၵ်ႇဝၢၼ်ႈယူႇ၊ ႁဝ်းၶႃႈ ပႆႇႁတ်းတမ်းၸႂ်။ ၶဝ်လူင်းမႃးၵူႈဝၼ်း တီႈလွႆ တွၼ်းၼႆႉ”ဝႃႈၼႆ။

ဢိင်ၼိူဝ် လွင်ႈပဵၼ်ပၢင်တိုၵ်းၵၼ် တီႈလွႆတွၼ်းၼႆႉသေ သိုၵ်းလူင်ပွင်ၸိုင်ႈမၢၼ်ႈ ဢဝ်ၵွင်ႈယိုဝ်းသႂ်ႇ ၸွမ်းႁိူၼ်းၵူၼ်း ဝၢၼ်ႈ၊ သွၵ်ႈတဝ် ယႃႉၶူဝ်းၶွင်ၵူၼ်းဝၢၼ်ႈ ၸဵမ်ၸိူဝ်းၼႆႉ တေႃႈလဵဝ် ယူႇတီႈၽူႈတႅၼ်းသၽႃးၸႄႈဝဵင်းမိူင်းၵိုင် တိုၵ်ႉၵဵပ်း သဵၼ်ႈသၢႆမၢႆဝႆႉယူႇ ဝႃႈၼႆ။

ၼွၵ်ႈလိူဝ်ၼၼ်ႉ ယူႇတီႈၸုမ်းၸွႆႈထႅမ်တူင်ႇဝူင်းၵူၼ်းလႄႈ တမ်းဝၢင်းတီႈယူႇ တင်း တပ်ႉသိုၵ်းမၢၼ်ႈ လူင်းပိုၼ်ႉတီႈ ၵဵပ်းသဵၼ်ႈမၢႆ ႁူဝ်ၵူၼ်း ၽူႈၸၢႆး၊ ၽူႈယိင်း၊ လုၵ်ႈႁဵၼ်း ၸဵမ်ၸိူဝ်းၼႆႉ ဝႃႈၼႆ။