တႄႇဢဝ် ႁၢင်လိူၼ်ၾႅပ်ႊၿိဝ်ႊရီႊ 2020 ၼႆႉမႃး ယူႇတီႈၽူႈမီးပုၼ်ႈၽွၼ်း ၼႂ်းတပ်ႉသိုၵ်းဝႃႉ UWSA တီႈလၢၼ်ႇဝႃႉ လႅၼ်လိၼ်ထႆး BP1 ၵိင်ႇၸႄႈဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်းၼၼ်ႉ ပႂ်ႉၵူတ်ႇထတ်းလူမ်းမႆႈ တၢင်းပဵၼ်ၶူဝ်ႊရူဝ်ႊၼႃႊ(ၶူဝ်ႊဝိတ်ႊ -19) တီႈၵူၼ်းလုၵ်ႉတၢင်းၾင်ႇမိူင်းထႆး ၶဝ်ႈမႃးတၢင်းၾင်ႇမိူင်းတႆးၼႆႉ ဝႃႈၼႆ။
ၵူၼ်းပုင်ႇပႃႇၶႅမ် ဢႃယု 50 ပၢႆ လၢတ်ႈတီႈၽူႈတွႆႇႁွၵ်ႈဝႃႈ “ ပေႃးၵူၼ်းလုၵ်ႉတၢင်းမိူင်းထႆး ၶဝ်ႈမႃးတၢင်းမိူင်းတႆးၼႆႉ တေ လႆႈမိူဝ်းယူႇတီႈႁူင်းယႃႁူၺ်ႈဢေႃႈၼၼ်ႉ 15 ဝၼ်း ၾၢႆႇၸဝ်ႈၼႃႈတီႈဝႃႉၶဝ် တေၵူတ်ႇတူၺ်း ၼႂ်းၶၢဝ်းတၢင်း 15 ဝၼ်း ။ ပေႃးဝႃႈ ဢမ်ႇမီးတၢင်းပဵၼ် ၸင်ႇတေပၼ်ပွၵ်ႈမႃး” ဝႃႈၼႆ။
ၵူၺ်းၵႃႈ ပေႃးလုၵ်ႉမိူင်းတႆးတေၶဝ်ႈမိူင်းထႆးတႄႉ တီႉၵဵတ်ႉ/လၢၼ်ႇၼၼ်ႉ ဢမ်ႇၵူတ်ႇထတ်း။ ပၼ်လတ်းၵႂႃႇယူႇ ဝႃႈၼႆ။
ၸဝ်ႈၼႃႈတီႈၵဵတ်ႉ/လၢၼ်ႇဝႃႉလၢတ်ႈဝႃႈ ယွၼ်ႉဝႃႈတၢင်းပဵၼ်ၶူဝ်ႊရူဝ်ႊၼႃႊ(ၶူဝ်ႊဝိတ်ႊ – 19) ၼႆႉလၢမ်းၽႄႈဝႆး ၸပ်းငၢႆႈလႄႈ မႆႈၸႂ်ၵူဝ်ၵူၼ်းလုၵ်ႉတၢင်းမိူင်းထႆးမႃးၼၼ်ႉ ဢဝ်မႅင်းၶူဝ်ႊရူဝ်ႊၼႃႊ မႃးၽႄႈပၼ် ၵူၼ်းမိူင်း ၼႂ်းပိုၼ်ႉတီႈ ဝႃႈၼႆ။
ၽူႈၸၢႆး ဢႃယု 50 ပၢႆ ၼၼ်ႉ သိုပ်ႇလၢတ်ႈဝႃႈ “သင်ဝႃႈ ၸဝ်ႈၼႃႈတီႈတီႈၵဵတ်ႉလၢၼ်ႇဝႃႉထူပ်းႁၼ်ၸိူဝ်ႉမႅင်းၸိုင် ဢမ်ႇႁူႉဝႃႈ တေယူတ်းယႃပၼ်ၸိူင်ႉႁိုဝ်။ သင်ဝႃႈ ပီႈၼွင်ႉႁဝ်း ၶဝ် တေမႃး မိူင်းတႆး ပေႃးတေၽွမ်ႉယူႇ တီႈႁူင်းယႃႁူၺ်ႈဢေႃႈ ႁိုင် 15 ဝၼ်းၸိုင် ဢွၵ်ႇမႃးလႆႈယူႇ။ သင်ဝႃႈ ဢမ်ႇၽွမ်ႉယူႇႁိုင် 15 ဝၼ်း ၸိုင် ယႃႇၽူမ်ႈၼႅတ်ႈဢွၵ်ႇမႃး” ဝႃႈၼႆ။
တၢင်းၶဝ်ႈဢွၵ်ႇ တီႈလၢၼ်ႇ BP1 လႅၼ်လိၼ်တႆး – ထႆးတႄႉ ပၼ်ၵူၼ်းၶဝ်ႈဢွၵ်ႇၵႂႃႇမႃးမိူၼ်ၵဝ်ႇယူႇ ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊရူဝ်ႊၼႃႊ (ၶူဝ်ႊဝိတ်ႊ 19) တၢင်းလုမ်ႈၾႃႉၼႆႉ မီးၵႂႃႇယဝ်ႉ 101,492 ၵေႃႉ၊ တၢႆ 3,485 ၵေႃႉလႄႈ ၶဵၼ်းၶိုၼ်း 56,875 ၵေႃႉ ယူႇတီႈသိုဝ်ႇၶၢဝ်ႇ South China Morning Post ဢွၵ်ႇဝႆႉ။
