Sunday, May 26, 2024

ၽူႈသိုဝ်ႇၶၢဝ်ႇ 2 ၵေႃႉ ၺႃးတီႉတီႈမိူင်းယၢင်းၽိူၵ်ႇၼၼ်ႉ လွတ်ႈမႃးၶိုၼ်းယဝ်ႉ

Must read

ၽူႈသိုဝ်ႇၶၢဝ်ႇ Frontier Myanmar  လႄႈ ၽူႈထၢႆႇႁၢင်ႈတီႈႁွင်ႈၵၢၼ်ၶၢဝ်ႇ  Myanmar Times ၺႃးတီႉၺွပ်းတီႈဝဵင်းမျႃႉဝတီႇ မိူင်းယၢင်းၽိူၵ်ႇၼၼ်ႉ လွတ်ႈမႃးၶိုၼ်းယဝ်ႉ။

Photo Credit to Thanlwin Thway Chin

ၼေႃႇပႅတ်ႇတီႇႁၢၼ်ႇ ၽူႈသိုဝ်ႇၶၢဝ်ႇတီႈၸုမ်းၶၢဝ်ႇ ၾရွၼ်ႊထီႊယႃႊ ဢၼ်ပၵ်းတီႈဝဵင်းတႃႈၵုင်ႈ လႄႈတင်း ၵူဝ်ႇမႃႇၼေႃႇ ၽူႈထၢႆႇႁၢင်ႈ တီႈႁွင်ႈၵၢၼ်ၶၢဝ်ႇ မျၢၼ်ႊမႃႊထၢႆႊမ် ၺႃးတပ်ႉပႂ်ႉလႅၼ်လိၼ်ယၢင်းၽိူၵ်ႇ တီႉၺွပ်းတီႈ ဝဵင်းမျႃႉဝတီႇ မိူဝ်ႈဝၼ်းတီႈ 4/3/2020 ၽွင်းၶႃသွင်ၵေႃႉၵႂႃႇဢဝ်ၶၢဝ်ႇ ။

- Subscription -

ဝၢႆးလင်ၶႃသွင်ၵေႃႉၺႃးတီႉၺွပ်းဝႆႉၼၼ်ႉ ယူႇတီႈႁွင်ႈၵၢၼ်ၶၢဝ်ႇၶဝ်သေ လႆႈၵပ်းသိုပ်ႇယွၼ်းတၢင်းၸွႆႈထႅမ်တီႈ ႁွင်ႈၵၢၼ်ၾၢႆႇပွင်ႇၶၢဝ်ႇ၊ ၶွင်ႊသီႊမီႊတီႊယႃႊၶၢဝ်ႇငၢဝ်းမိူင်းႁူမ်ႈတုမ်မၢၼ်ႈ လႄႈလူင်ပွင်ၸိုင်ႈမိူင်းယၢင်းၽိူၵ်ႇ။

ဝၼ်းတီႈ 5/3/2020 ၵေႃႈ တပ်ႉပႂ်ႉလႅၼ်လိၼ်ယၢင်းၽိူၵ်ႇလႆႈပွႆႇပၼ်တူဝ်ၶိုၼ်းဝႃႈၼႆ။

ၸဝ်ႈႁၢၼ် ၼၢႆႇမွင်ႇၸေႃႇ ၸဝ်ႈၼႃႈတီႈလုမ်ႊမၢႆမီႈလႄႈႁူမ်ႇလူမ်ႇငဝ်ႈငုၼ်း တပ်ႉပႂ်ႉလႅၼ်လိၼ် ယၢင်းၽိူၵ်ႇ လၢတ်ႈတီႈၸုမ်းၶၢဝ်ႇ မျၢၼ်ႊမႃႊထၢႆးမ်ဝႃႈ – “ယၢမ်းဝၢႆးဝၼ်း လႆႈဢဝ်တူဝ် ၽူႈသိုဝ်ႇၶၢဝ်ႇ တင်းသွင်ၵႂႃႇမွပ်ႈပၼ်တီႈလုမ်းၸွမ်ၽွင်းလူင်မိူင်းယၢင်းၽိူၵ်ႇယဝ်ႉ။ ငဝ်းလၢႆးၶႃသွင်ၵေႃႉၵေႃႈ ၶႅမ်ႉလႅပ်ႈလီၵူႈလွင်ႈ။ ယၢမ်းလဵဝ်တိုၵ်ႉသွပ်ႇထၢမ်တူၺ်းတီႈၸၼ်ႉၵူၼ်းသိုၵ်း ၸိူဝ်းတီႉၺွပ်း ၸိူဝ်းၼၼ်ႉယူႇ တႃႇဢဝ်လိူင်ႈပၼ်တူတ်ႈတၢမ်ႇ”- ဝႃႈၼႆ။

ၼေႃႇပႅတ်ႇတီႇႁၢၼ်ႇၼႆႉ ပဵၼ်ၽူႈသိုဝ်ႇၶၢဝ်ႇဢၼ်ၵႂႃႇဢဝ်ၶၢဝ်ႇလွင်ႈ ၵၢၼ်သိုဝ်ႉၶၢႆတီႈလိၼ် ၼႂ်းၼႃႈလိၼ်တပ်ႉပႂ်ႉလႅၼ်လိၼ်ယၢင်းၽိူၵ်ႇၵုမ်းထိင်း၊ ၶၢဝ်ႇ ငဝ်းလၢႆးၶႄႇမႃးႁူမ်ႈမိုဝ်းတပ်ႉပႂ်ႉလႅၼ်လိၼ်သေ လူင်းတိုၼ်းႁဵတ်းၵၢၼ်ပၢႆးမၢၵ်ႈမီး ၸိူဝ်းၼႆႉ။

ၵူဝ်ႇမႃႇၼေႃႇၼႆႉတႄႉ ပဵၼ်ဝၼ်းလိုဝ်ႈၵၢၼ်မၼ်းၸၢႆးသေတႃႉ မၼ်းၸၢႆးၵႂႃႇဢဝ်ၶၢဝ်ႇ ၸွမ်းၵၼ်တင်းၼေႃႇပႅတ်ႉတီႇႁၢၼ်ႇ လႄႈ ၺႃးတီၸွမ်းၵၼ်တီႈႁိမ်း ၵဵတ်ႉလၢၼ်ႇၶၢမ်ႈလႅၼ်လိၼ်မၢၼ်ႈ-ထႆး မၢႆ 1 တီႈဝဵင်းမျႃႉဝတီႇ။

ၶေႃႈမုလ်းတီႈ – Myanmar Times ,  Thanlwin Thway Chin

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း