သိုၵ်းလူင်ပွင်ၸိုင်ႈမၢၼ်ႈ လႄႈ တပ်ႉသိုၵ်းတႆးလႅင် ပဵၼ်ပၢင်တိုၵ်း ၼႂ်းတိူင်းၸႄႈၵႅင်းတွၼ်ႈၼိူဝ်

တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တပ်ႉသိုၵ်းတႆးလႅင် SNA ပဵၼ်ပၢင်တိုၵ်းၵၼ် ၼႂ်းၸႄႈဝဵင်း မၢၼ်ႈမွၵ်ႇ တိူင်းၸႄႈၵႅင်း တွၼ်ႈၼိူဝ်။

ပၢင်တိုၵ်းပဵၼ်မိူဝ်ႈဝၼ်းတီႈ 2/3/2020 ယၢမ်းဝၢႆးဝၼ်း ပဵၼ်တီႈၼႂ်းၵႄႈဝၢၼ်ႈပေႇတႃႇလႄႈ ဝၢၼ်ႈ ၼၢင်းၸႃး ၸႄႈဝဵင်းမၢၼ်ႈမွၵ်ႇ တၢင်းၵႂႃႇ ၼွင်မႄႈမၢႆႈ (ၼွင်ဢိၼ်းတေႃႇၵျီး) ။

ၾၢႆႇတၢင်း ၸဝ်ႈၼႃႈတီႈ  ၼႂ်းတပ်ႉသိုၵ်းတႆးလႅင်ၸဝ်ႈၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းတႄႉ ပဵၼ်တႄႉဢေႃႈ။ ပဵၼ်ယွၼ်ႉသင်ၼႆႁဝ်းၶႃႈၵေႃႈတိုၵ်ႉၸွပ်ႇတူၺ်းယူႇၶႃႈ”– ဝႃႈၼႆ။

ပူၼ်ႉမႃးလိူၼ်ၾႅပ်ႉပိဝ်ႊရီႊ  ၶွမ်ႊပၼီႊၶုတ်းၶမ်း တီႈမတ်ႉတယႃႇ ၼၼ်ႉၺႃးၸုမ်းယိပ်းၵွင်ႈ ၸုမ်းၼိုင်ႈ ၵဵပ်းၶွၼ်ႇ။  ၾၢႆႇၶွမ်ႊပၼီႊဢမ်ႇၸၢႆႇပၼ်ၵႃႈ ၶွၼ်ႇလႄႈ ၵႃးထႆလိၼ်၊ ၵႃးၶုတ်းလိၼ် ၶဝ်ၺႃးၽဝ်သွင်လမ်း။ ၾၢႆႇၶွမ်ႊပၼီႊ ၸင်ႇၸႅင်ႈသိုၵ်းလူင်ပွင်ၸိုင်ႈ ၵႂၢတ်ႇလၢင်ႉပိုၼ်ႉတီႈလႄႈ လႆႈပဵၼ်ပၢင်တိုၵ်း ၵၼ် ဝႃႈၼႆ။

ၵဵဝ်ႇၵပ်းလွင်ႈၼႆႉ ႁွင်ႈၵၢၼ်ၶၢဝ်ႇ DVB ပိုၼ်ၽၢဝ်ႇဝႆႉဝႃႈ သိုၵ်းလူင်ပွင်ၸိုင်ႈတီႉလႆႈၵူၼ်းသိုၵ်း SNA တႆးလႅင် ဢၼ်မၢတ်ႇ ၸဵပ်းဝႆႉၵေႃႉၼိုင်ႈ – ဝႃႈၼႆ။

ထုင်ႉပဵၼ် ပၢင်တိုၵ်းၼႆႉ မီးၸၢဝ်းၶိူဝ်းတႆးလႅင် တင်း ၶိူဝ်းၵတူး၊ ၵၼၼ်းၶဝ်ယူႇ သဝ်းၼမ်။

တပ်ႉသိုၵ်းတႆးလႅင် SNA ၼႆႉ ၵေႃႇတင်ႈမီးမႃး ၼပ်ႉႁူဝ်သိပ်းပီသေ တႃႉ ယဵၼ်မွပ်ႇၵႂႃႇ လၢႆပီ။ ဢိင်ၼိူဝ်ပိူဝ်ႈတႃႇပူၵ်းပွင်သုၼ်ႇလႆႈသုၼ်ႇပဵၼ်တႆးလႅင်၊ ပိူဝ်ႈတႃႇသၢင်ႈ ၶိုၼ်း မိူဝ်းၼႃႈ ၶိူဝ်းတႆးလႅင်ၼၼ်ႉ ၵူၼ်းၼုမ်ႇတႆးလႅင် ႁူမ်ႈၵၼ် ထႅမ်ႁႅင်း သၢင်ႈဢဵၼ်ႁႅင်းမႂ်ႇ ယႂ်ႇၶိုၼ်ႈမႃး ၼႂ်းၶၢဝ်းတၢင်း 7-8 ၼႆႉ။