သိုၵ်းလူင်ပွင်ၸိုင်ႈမၢၼ်ႈ ပွႆႇမၢၵ်ႇသႂ်ႇၼႂ်းဝၢၼ်ႈသေ သွၵ်ႈတဝ်ယႃႉၶူဝ်းၶွင် ႁိူၼ်းယေး ၵူၼ်းဝၢၼ်ႈ။

ဝၼ်းတီႈ 2/3/2020 ယၢမ်းဝၢႆးဝၼ်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ ပွႆႇမၢၵ်ႇသႂ်ႇၼႂ်းဝၢၼ်ႈၵုင်းၺွင်ႇၽႃသႃး 2 လုၵ်ႈသေ ယိုဝ်းၵွင်ႈၸၢၵ်ႈႁၢတ်ႇသႂ်ႇၵူႈတၢင်း။ ဝၢႆးၼၼ်ႉ ယႃႉသွၵ်ႈတဝ်ဢဝ်ၶူဝ်းၶွင် ၼႂ်းႁိူၼ်းယေးၵူၼ်းဝၢၼ်ႈ ဢၼ်မီးၼႂ်း ဢိူင်ႇ ႁၢမ်းငၢႆး ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

လုင်းၸၢႆးလူင် ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈဢေႃႈ သိုၵ်းမၢၼ်ႈ လုၵ်ႉတၢင်းၼႂ်း တၢင်းလွႆတွၼ်းဢွၵ်ႇမႃး ၵွၼ်ႇၶဝ်တေၶဝ်ႈဝၢၼ်ႈၵုင်းၺွင်ႇ ၽႃသႃးၼၼ်ႉ ၶဝ်ဢဝ်မၢၵ်ႇလူင် ယိုဝ်း သႂ်ႇၼႂ်းဝၢၼ်ႈ 2 လုၵ်ႈ ယဝ်ႉၸင်ႇၶဝ်ႈမႃး။ ယဝ်ႉၵေႃႈ ယႃႉသွၵ်ႈတဝ်ၶူဝ်းၶွင်ႁိူၼ်းယေးၵူၼ်းဝၢၼ်ႈ 4 လင်၊ ၼႂ်း 4 လင် ၼၼ်ႉ ယႃႉၽၵ်းတူႁိူၼ်း၊ ယႃႉပႃးၶဵင်ႇၽြႃး သွၵ်ႈတဝ်ၼႂ်းႁိူၼ်းယေး ပေႃးမၢၵ်ႇမိူဝ်ၵႂႃႇမူတ်း။ ၵွင်ႈယိုဝ်းသႂ်ႇ ႁိူၼ်းပေႃးပွင်ႇ ၸဵမ်ၸိူဝ်းၼႆႉ” ဝႃႈၼႆ။

ဢၼ်သိုၵ်းလူင်ပွင်ၸိုင်ႈမၢၼ်ႈ ပွႆႇမၢၵ်ႇသႂ်ႇၼႂ်းဝၢၼ်ႈၵုင်းၺွင်ႇၽႃသႃး 2 လုၵ်ႈၼၼ်ႉ တူၵ်းတႅၵ်ႇတင်းသွင်လုၵ်ႈ ၵူၺ်းၵႃႈ ဢမ်ႇမီးလွင်ႈတုမ်ႉတိူဝ်ႉၵူၼ်းဝၢၼ်ႈမၢတ်ႇၸဵပ်း လူႉတၢႆသင် ဝႃႈၼႆ။

လုင်းၸၢႆးလူင် လၢတ်ႈဝႃႈ “ လွင်ႈၼႆႉ ယွၼ်ႉတၢင်းၼိူဝ်ၶဝ်ၵေႃႈၸႂ်ႉထွႆ။ ၼႂ်းပၢင်တိုၵ်းၵေႃႈ ၶဝ်သမ်ႉတူၵ်းသုမ်းမၢတ်ႇၸဵပ်း တၢႆၼမ်ၵေႃႈတေပႃး၊ ၵွပ်ႈၼၼ်ၶဝ်ၶႂ်ႈႁဵတ်းၸႃႉတီႈၵူၼ်းမိူင်း။ ဢၼ်ၶဝ်ႁဵတ်းၼႆႉ ၶဝ်သၢင်ႈႁႂ်ႈမၼ်းမိူၼ်ပွႆးတိုၵ်းသေ တိူဝ်ႉ ၺႃးႁိူၼ်းၵွႆ။ ၶဝ်သမ်ႉၶဝ်ႈၵႂႃႇၵူတ်ႇထတ်းဝၢႆးပွႆးတိုၵ်း ၶႂ်ႈႁႂ်ႈၾၢင်ႁၢင်ႈမၼ်းပဵၼ်ၸိူင်ႉၼၼ်။ ႁဝ်းတႄႉ ႁၼ်ထိုင်ဝႃႈ ၼမ်ႉ ၸႂ်ၶဝ် တိုၼ်းဝႃႈဢမ်ႇလီၼၼ်ႉယဝ်ႉ။ ဢမ်ႇပေႉမေႃႈပေႃႉၵၢၵ်ႇၼၼ်ႉယဝ်ႉ လၢႆးမၼ်း။ မိူဝ်ႈဝႃးၼႆႉ ပၢင်တိုၵ်းတီႈလွႆတွၼ်း ၼၼ်ႉ ဢမ်ႇလႆႈငိၼ်းသဵင်ယိုဝ်း။ သိုၵ်းတႆးၵေႃႈ ပေႃးငိူင်ႉဝႄႈပၼ်ၶဝ်ယဝ်ႉလူး” ဝႃႈၼႆ။

ၵဵဝ်ႇလူၺ်ႈလွင်ႈ ႁိူၼ်းၵူၼ်းဝၢၼ်ႈ ဢၼ်ၺႃးသိုၵ်းလူင်ပွင်ၸိုင်ႈမၢၼ်ႈ ယႃႉသွၵ်ႈတဝ်ၶူဝ်းၶွင်ၼႂ်းႁိူၼ်းယေးၼၼ်ႉ ၶူဝ်းၶွင် ဢၼ်လႆႈလူႉလႅဝ် ဢၼ်လႆႈႁၢႆၵႂႃႇၸိူဝ်းၼၼ်ႉ ပႆႇလႆႈႁူႉႁူဝ်ၼပ်ႉၵႃႈၶၼ်မၼ်း ယွၼ်ႉၵူၼ်းဝၢၼ်ႈပႆႇႁတ်းပွၵ်ႈၵၼ် တေႃႈ လဵဝ် တိုၵ်ႉယူႇသဝ်းဝႆႉ တီႈဝတ်ႉလွႆၸၢၵ်ႈ တင်း ဝတ်ႉၵုင်းၸူင် ဢိူင်ႇႁၢမ်းငၢႆး မွၵ်ႈႁူဝ်ၵူၼ်း 200 ပၢႆ။

ၵူၼ်းပၢႆႈၽေးသိုၵ်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တႄႇဢဝ် ၶဝ်ပွႆႇမၢၵ်ႇသႂ်ႇၼႂ်းဝၢၼ်ႈၵေႃႈ ႁဝ်းၶႃႈ ၼႅတ်ႈဢွၼ်ၵၼ်ပၢႆႈဢွၵ်ႇမႃးၶႃႈယဝ်ႉ။ လႆႈငိၼ်းဝႃႈ ၶဝ်သွၵ်ႈတဝ်ၼႂ်းႁိူၼ်း 4 လင်။ ၵူၺ်းၵႃႈ ၶဝ်ဢဝ်သင်ၵႂႃႇလၢႆလၢႆ မီး လွင်ႈလူႉသုမ်းၸိူင်ႉႁိုဝ် ဢၼ်ဝႃႈၼၼ်ႉ ႁဝ်းၶႃႈ ပႆႇႁတ်းပွၵ်ႈၵၼ်ၶႃႈလႄႈ ပႆႇလႆႈႁူႉ သဵၼ်ႈမၢႆမၼ်းလီလီ” ဝႃႈၼႆ။

“မိူဝ်ႈသိုၵ်းမၢၼ်ႈၶဝ် တႄႇဢွၵ်ႇဝၢၼ်ႈၵုင်းၺွင်ႇ ၽႃသႃး မႃးတၢင်းႁၢမ်းငၢႆးၼၼ်ႉ ၶဝ်ယိုဝ်းၵွင်ႈၸွမ်း သဵၼ်ႈတႃႈသၢႆတၢင်း ႁဵတ်းၶိတ်ႈ ႁဵတ်းပၢႆႇ တေႃႇပေႃးထိုင် တီႈၶူဝ်ႁၵ်း” ၵူၼ်းမိူင်းပိုၼ်ႉတီႈ ပွတ်းႁၢမ်းငၢႆး လၢတ်ႈၼႄ ၼင်ႇၼႆ။

ပၢင်တိုၵ်းဢၼ်ပဵၼ်ယူႇတီႈလွႆတွၼ်း ဢိူင်ႇႁၢမ်းငၢႆးၸႄႈဝဵင်းမိူင်းၵိုင်ၼႆႉ တႄႇဢဝ် ဝၼ်းတီႈ 27/2/2020 တေႃႇထိုင်ယၢမ်း လဵဝ် တိုၵ်ႉပဵၼ်ပၢင်တိုၵ်းၵၼ်ယူႇ လိူဝ်ၼၼ်ႉ ယူႇတီႈၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ တိုၵ်ႉၽိူမ်ႉထႅမ်ႁႅင်းသိုၵ်းၵႂႃႇ ထႅင်ႈတင်းၼမ်လၢႆ ဝႃႈၼႆ။