Thursday, July 25, 2024

ၵူၼ်းၸေႊလၢၼ်ႉ ႁေႃႈရူတ်ႉၶိူင်ႈၽႃႇသႂ်ႇတူၼ်ႈမႆႉ ထိုင်တီႈမၢတ်ႇၸဵပ်းႁႅင်း ၵေႃႉၼိုင်ႈ

Must read

ၵူၼ်းၸေႊလၢၼ်ႉ ၵေႃႉၼိုင်ႈ ႁေႃႈရူတ်ႉၶိူင်ႈဝႆး ၽႃႇသႂ်ႇတူၼ်ႈၼႆႉ ဢၼ်မီးဝႆႉႁိမ်းၶၢင်ႈတၢင်းၼၼ်ႉ လႆႈလူမ်ႉၵႂႃႇသေ ထိုင်တီႈတိူဝ်ႉမၢတ်ႇၸဵပ်းႁႅင်း လႆႈသူင်ႇယူတ်းယႃတူဝ် တီႈမူႇၸေႊ ဝႃႈၼႆ။

ဝၼ်းတီႈ 01/05/2024 ယၢမ်းဝၢႆးဝၼ်းမွၵ်ႈ 4 မူင်းၶိုင်ႈ ၸၢႆးတၢၼ်းမိၼ်ႉ ဢႃယုမွၵ်ႈ 40 ပီ ပဵၼ်ၽေးၵိုင်ႉၵၢင်ႉ ႁေႃႈရူတ်ႉၶိူင်ႈ ၽႃႇသႂ်ႇတူၼ်ႈမႆႉ ႁိမ်းၶၢင်ႈတၢင်း တီႈႁိမ်းဝၢၼ်ႈၼွင်သႅင် ၼႂ်းၵႄႈမူႇၸေႊ – ၼမ်ႉၶမ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထိုင်တီႈမၢတ်ႇၸဵပ်း ပေႃးလိုမ်းတူဝ် ၼႆယဝ်ႉ။

- Subscription -
တူၼ်ႈမႆႉ တီႈၽႃႇသႂ်ႇ
Photo by – ၵူၼ်းပိုၼ်ႉတီႈ/ တူၼ်ႈမႆႉ ဢၼ်တီႈၽႃႇသႂ်ႇ

ၵူၼ်းပိုၼ်ႉတီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆး တေႁေႃႈမႃးဝႆး ဢမ်ႇၵုမ်းလႆႈႁႅင်းရူတ်ႉသေ လေႃႇ ၽႃႇသႂ်ႇ တူၼ်ႈမႆႉႁိမ်းၶၢင်ႈတၢင်းၼၼ်ႉ။ လႅပ်ႈတေမဝ်းမႃးၽွင်ႈႁိုဝ် ဢမ်ႇႁူႉ။ မိူဝ်ႈၽွင်းလူမ်ႉၼၼ်ႉ မၼ်းၸၢႆးၼွၼ်းလူမ်ႉလိုမ်းတူဝ်ဝႆႉၼိူဝ်တၢင်း ၸိူင်ႉၼၼ်ၶႃႈဢေႃႈ။ လႆႈငိၼ်းဝႃႈ မၼ်းၸၢႆး လုၵ်ႉတၢင်းၼွင်လွင်းသေ ပွၵ်ႈမႃးၼႆ ၶႃႈ ဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉသေ ယူႇတီႈ ၸုမ်းပရႁိတ လႅင်းမိူင်းသႂ် ၼွင်လွင်း လႆႈမႃးတေႃႉဢဝ် တူဝ်ၸၢႆးတၢၼ်းမိၼ်ႉ ၵႂႃႇယူတ်းယႃတူဝ် တီႈႁူင်းယႃပႃႇႁူဝ်ႇမူႇၸေႊဝႆႉယဝ်ႉ ဝႃႈၼႆ။

ၸၢႆးတၢၼ်းမိၼ်ႉ ဢႃယုမွၵ်ႈ 40 ၼႆႉ ပဵၼ်ၵူၼ်းဝၢၼ်ႈၽၢႆတူင်ႈ ဢိူင်ႇၸေႊလၢၼ်ႉ ၸႄႈဝဵင်းမူႇၸေႊ ဝႃႈၼႆ။

ၸၢႆးတၢၼ်းမွင်ႇ
Photo by – ၵူၼ်းပိုၼ်ႉတီႈ/ ၸၢႆးတၢၼ်းမွင်ႇ ၵေႃႉလူမ်ႉရူတ်ႉၶိူင်ႈ

ပူၼ်ႉမႃး မိူဝ်ႈဝၼ်းတီႈ 10/4/2024 ယၢမ်းႁူဝ်ၶမ်ႈ 5 မူင်း ၼၢင်းဢွင်ႇမေႇ ဢႃယုမွၵ်ႈ 50 ပီ ၺႃးၵႃးၽႃႇသႂ်ႇ တီႈႁိမ်းဝၢၼ်ႈၼွင်သႅင်ၼႆႉ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း ထိုင်တီႈလႆႈတေႃႉသူင်ႇယူတ်းယႃတူဝ် တီႈႁူင်းယႃ သူၺ်ႇမူႇၸေႊ။

ၼႂ်းဝၼ်းတီႈ 10 ၼၼ်ႉၵူၺ်း ၼင်ႇၵဝ်ႇ ယၢမ်းၵၢင်ၼႂ်မွၵ်ႈ 8 မူင်း ၵႃးၽႃႇသႂ်ႇ ရူတ်ႉၶိူင်ႈလမ်းၼိုင်ႈ တီႈဝၢၼ်ႈပၢင်ႇၶမ်း ၸႄႈဝဵင်းမူႇၸေႊ ၽူႈယိင်း ဢႃယု 20 ပီပၢႆ ၵေႃႉၼိုင်ႈ လႆႈလူႉတၢႆထင်တီႈ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း