ပလိၵ်ႈလူင်ပွင်ၸိုင်ႈမၢၼ်ႈသွၵ်ႈႁႃတိၺွပ်းၵူၼ်းထႆးၸိူဝ်းပၢႆႈၶဝ်ႈလိၼ်မိူင်းတႆးယွၼ်ႉယႃႈမဝ်းၵမ် သမ်ႉၵႂႃႇတိၺႃးၵူၼ်းထႆး ၵေႃႉၼိုင်ႈ ၵေႃႉဢၼ်ဢမ်ႇပႃးၼႂ်းသဵၼ်ႈၸိုဝ်ႈသွၵ်ႈႁႃ။
မိူဝ်ႈဝၼ်းတီႈ 1/3/2020 ပလိၵ်ႈမၢၼ်ႈၸေႈတွၼ်ႈမိူင်းသၢတ်ႇ ပၼ်တၢင်းႁူမ်ႈမိုဝ်း ပလိၵ်ႈထႆး သေၸွႆႈ ၶူၼ်ႉႁႃ ၵူၼ်းထႆးသၢမ်ၵေႃႉ ဢၼ်ၺႃးမၢႆတႃႇတိၺွပ်းယွၼ်ႉယႃႈမဝ်းၵမ် သမ်ႉ ပၢႆႈၶဝ်ႈမူၵ်းဝႆႉ ၼႂ်းလိၼ်တႆး တီႈဝၢၼ်ႈပႃၶီး ဢိူင်ႇၼမ်ႉႁူးၶုၼ်ႇ ၸေႈဝဵင်းပုင်ႇပႃႇၶႅမ် ၸိုင်ႈတႆးပွတ်းဢွၵ်ႇ။
ပလိၵ်ႈမၢၼ်ႈဢၼ်ၵႅမ်ၽူႈၵွၼ်းပလိၵ်ႈ ယၢၼ်ႇၼၢႆႇထုၼ်းဢွၼ်ႁူဝ်ဢဵၼ်ႁႅင်း ၵႂႃႇၶူၼ်ႉသွၵ်ႈၵူၼ်းထႆး သၢမ်ၵေႃႉ ဢၼ်ပႃး ၸိုဝ်ႈ ၽႃႊၶိၼ်ႊ ၽွၼ်ႊတေႊၶျႃႊ ဢၼ်လႆႈပၢႆႈ ယွၼ်ႉပလိၵ်ႈထႆး တိလႆႈယႃႈမဝ်းၵမ် 23 လၢၼ်ႉမဵတ်ႉမိူဝ်ႈၵၢင်လိူၼ်ၾႅပ်ႉပိဝ်ႊရီႊပူၼ်ႉမႃး။ ပလိၵ်ႈထႆး လၢမ်းၶၢတ်ႈဝႃႈမၼ်းၸၢႆးၵႂႃႇမူၵ်းသွၼ်ႉယူႇတီႈၼႂ်းၸေႈဝဵင်းပုင်ႇပႃႇၶႅမ်ဝႃႈၼႆ။
ၵူၺ်းၵႃႈ ပလိၵ်ႈမၢၼ်ႈဢမ်ႇႁၼ်ၽူႈဢၼ်ပႃးၼႂ်းသဵၼ်ႈၸိုဝ်ႈၼၼ်ႉသေ ၵႂႃႇႁၼ်မႅၼ်ႈ ၵူၼ်းထႆးထႅင်ႈၵေႃႉၼိုင်ႈ ၸိုဝ်ႈ ၽတ်းထႃးၽွၼ်း ဢႃယု 27 ပီ တိုၵ်ႉပႅပ်ႉဝႆႉၼႂ်းယုမ်း ။ ပလိၵ်ႈမၢၼ်ႈတိၺွပ်းၵူတ်ႇထတ်း ႁၼ်မႅၼ်ႈ ယႃႈမႃႉ လႄႈၸေႈလိူမ်ႈ(ၸႂ်ႉမိူဝ်ႈသူႇယႃႈမႃႉ) တီႈတူဝ်မၼ်းၸၢႆး ။
သိုပ်ႇၵူတ်ႇထတ်းတွင်ႈထၢမ်တူၺ်းလႆႈႁူႉဝႃႈ မၼ်းၸၢႆးယူႇၸွမ်းၵၼ်တင်းၵူၼ်းထႆးထႅင်ႈ 7 ၵေႃႉၼႆလႄႈလႆႈမိူဝ်းၵူတ်ႇသွၵ်ႈတူၺ်းတီႈသုမ်ႉၶဝ်ယူႇၼၼ်ႉ တိလႆႈထႅင်ႈ ယႃႈမႃႉ ၊ၵွင်ႈယၢမ်း၊ ၵွင်ႈပွတ်း၊ မၢၵ်ႇၵွင်ႈ၊ ပပ်ႉယေးငိုၼ်း ၵုင်းသီ၊ ထီႊဢႅမ်ႊပီႊ လႄႈ ဝႂ် ATM ထုၵ်ႈငိုၼ်း လၢႆလၢႆဢၼ်။
မၼ်းၸၢႆးၼႆႉပဵၼ်ၵူၼ်းမိူင်းၾၢင် ၸေႈဝဵင်းၵဵင်းမႆႇ ၸိုင်ႈထႆး။
ၵူၼ်းထႆးသၢမ်ၵေႃႉၼၼ်ႉၵေႃႈပဵၼ်ၵူၼ်းၵဵင်းမႆႇ ၸိုင်ႈထႆးၼင်ႇၵဝ်ႇ။ ယၢမ်းလဵဝ်ပလိၵ်ႈမၢၼ်ႈတိုၵ်ႉသိုပ်ႇႁႃတူဝ်ၶဝ်သၢမ်ၵေႃႉထႅင်ႈယူႇ ဝႃႈၼႆ။
Ref; MCOT, Kanbawza Tai News
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ