ၾႆးမႆႈပၢမ်ႉၼမ်ႉမၼ်း တီႈၼိုင်ႈ ၼႂ်းၸႄႈဝဵင်းမူႇၸေႊ မီးလွင်ႈလူႉသုမ်းတင်းၼမ်  ၵူၼ်းမၢတ်ႇၸဵပ်း လူႉတၢႆတႄႉဢမ်ႇ မီး။

ဝၼ်းတီႈ 1/3/2020 ယၢမ်းၵၢင်ၼႂ် မွၵ်ႈ 10 မူင်း ၾႆးမႆႈပမ်ႉၼမ်ႉမၼ်း တီႈၼိုင်ႈ ၸိုဝ်ႈႁွင်ႉ ၶႂႃၸိင်ႉ ဢၼ်ပိုတ်ႇဝႆႉ ၼႂ်းၵႄႈပၢင်ႇသၢႆး – မူႇၸေႊ တၢင်းၵႂႃႇ ၽၵ်းတူလိၼ်လႅၼ် သၢမ်ၸဵင်ႇၶမ်း(ၵျိၼ်းၸၢင်းၵျေႃႉ) ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၽူႈတူင်ႉၼိုင် ၼႂ်းတူင်ႇဝူင်းတႆး မူႇၸေႊ ၵေႃႉၼိုင်ႈ ဢႃယု 30 ပၢႆ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ပၢမ်ႉၼမ်ႉ မၼ်း ၶွင်ပီႇတူႉၸိတ်ႉၵွင်းၶႃႈ။ ႁဵတ်းႁိုဝ်လႄႈမႆႈ ဢၼ်ဝႃႈၼၼ်ႉတႄႉ ပႆႇလႆႈႁူႉလီၶႃႈ။ မၢင်ၵေႃႉၵေႃႈ လၢတ်ႈဝႃႈ ပရိၵ်ႈၵႃးပွင်ႇ ၼႆဝႃႈ။ မႆႈပႃးတင်းၵႃးတၢင်ႇတႅင်ႁွမ် လမ်းၼိုင်ႈ၊ ၵႃးၼၼ်ႉ တေတူၵ်ႈမႅၼ်ႈငိုၼ်း မွၵ်ႈ 200 သႅၼ်ၼႆႉ။ တႅင်ႁွမ် ဢၼ် တၢင်ႇမႃးသမ်ႉ တေတူၵ်းမႅၼ်ႈယူႇ မွၵ်ႈ 35,000 ယႂၼ် (ငိုၼ်းၶႄႇ) ပေႃးပဵၼ်ငိုၼ်းမၢၼ်ႈၵေႃႈ တေတူၵ်းယူႇ 7 သိပ်းသႅၼ် ပၢႆၼႆႉ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး” ဝႃႈၼႆ။

ၽူႈၵႂႃႇၸွႆႈၶႄၾႆး ၸုမ်းၶႄၾႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၾႆးၼႆႉ မႆႈၵႃးတၢင်ႇတႅင်ႇလမ်းၼိုင်ႈ၊ ရူတ်ႉၶိူင်ႈ လမ်း ၼိုင်ႈ၊ ႁွင်ႈသဝ်းၵူၼ်းႁဵတ်းၵၢၼ် 2 ၸၼ်ႉ ၼိုင်ႈလင်၊ ယဝ်ႉၵေႃႈ ဢွင်ႈတီႈသႂ်ႇၼမ်ႉမၼ်း ၸၢၵ်ႇသႂ်ႇၼမ်ႉမၼ်း 4 လုၵ်၊ လွင်ႈလူႉသုမ်းတႄႉ တေလႅပ်ႈသုမ်းၼမ်ယူႇ” ဝႃႈၼႆ။

ပၢမ်ႉၼမ်ႉမၼ်းၼၼ်ႉ တိုၵ်ႉပိုတ်ႇဝႆႉမိူဝ်ႈ 2 ပီပူၼ်ႉမႃးၼႆႉၵူၺ်း ဝႃႈၼႆ။

ၵဵဝ်ႇၵပ်းလွင်ႈၾႆးမႆႈၼႆႉသေ လွင်ႈလူႉသုမ်းတင်းမူတ်း တေတူၵ်းမႅၼ်ႈငိုၼ်ႈၵႃႈႁိုဝ် ဢၼ်ဝႃႈၼၼ်ႉ ယူႇတီႈၽူႈမီးပုၼ်ႈၽွၼ်းၶဝ် တိုၵ်ႉၵူတ်ႇထတ်းယူႇ ဝႃႈၼႆ။

လိူဝ်ၼၼ်ႉ ယူႇတီႈရူတ်ႉၵႃးၶႄၾႆး ဢၼ်မႃးၸွႆႈႁူတ်းမွတ်ႇသမ်ႉ ရူတ်ႉၵႃး ပၢင်ႇသၢႆး၊ ပွၵ်ႉၼိူဝ် မူႇၸေႊ၊ ပွၵ်ႉႁွင်ႇ၊ မေႃႈ တွင်း၊ 105 လၵ်း ၸိူဝ်းၼႆႉ။