သိုၵ်းလူင်ပွင်ၸိုင်ႈမၢၼ်ႈ ၸီႉသင်ႇ ၸုမ်းပီႇတူႉၸိတ်ႉ ဢၼ်တူင်ႉၼိုင်ယူႇၼႂ်းဝဵင်းမူႇၸေႊၼၼ်ႉ ႁႂ်ႈပွၵ်ႈၶိုၼ်း တီႈယူႇၽႂ် မၼ်း ဢၼ်တမ်းဝၢင်းဝႆႉပၼ်။

မိူဝ်ႈဝၼ်းတီႈ 26/2/2020 သိုၵ်းလူင်ပွင်ၸိုင်ႈမၢၼ်ႈ ႁွင်ႉၸုမ်းပီႇတူႉၸိတ်ႉ ႁဵတ်းပၢင်ၵုမ်သေ ၸီႉသင်ႇ ဝႃႈၸိူဝ်းတူင်ႉၼိုင် ၸွမ်းလႅၼ်လိၼ် တႆး – ၶႄႇ ၼႂ်းၸႄႈဝဵင်းမူႇၸေႊၼၼ်ႉ ႁႂ်ႈပွၵ်ႈမိူဝ်းၶိုၼ်း ဢွင်ႈတီႈၽႂ်မၼ်း ဢၼ်တပ်ႉသိုၵ်းလူင်ပွင် ၸိုင်ႈမၢၼ်ႈ တမ်းဝၢင်းဝႆႉပၼ်ၼၼ်ႉ ဝႃႈၼႆ။

ၸုမ်းပီႇတူႉၸိတ်ႉ ဢၼ်ၺႃးႁွင်ႉၶိုၼ်ႈပၢင်ၵုမ်ၼၼ်ႉ ပဵၼ်ၸုမ်းပီႇတူႉၸိတ်ႉၵွင်းၶႃး၊ မိူင်းပေႃႈလႄႈ မဵဝ်ႉမ ၸဵမ်ၸိူဝ်းၼႆႉ။

ၸၢႆးၵျေႃႇတဵင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်း ယူႇၶႃႈဝႃႈၸုမ်းပီႇတူႉၸိတ်ႉၺႃးၸီႉသင်ႇပွၵ်ႈၶိုၼ်းတီႈယူႇၵဝ်ႇၼႆ။ လွင်ႈၼႆႉ ပႆႇလႆႈႁူႉၶေႃႈမုလ်း တႅတ်ႈၼႅတ်ႈၶႃႈ။ မိူဝ်ႈၶဝ် ႁွင်ႉႁဵတ်းပၢင်ၵုမ်ၼၼ်ႉ ၶႃႈႁဝ်းသမ်ႉဢမ်ႇယူႇတီႈမူႇၸေႊ” ဝႃႈၼႆ။

ၸုမ်းပီႇတူႉၸိတ်ႉ ဢၼ်တူင်ႉၼိုင်ယူႇၼႂ်းၸႄႈဝဵင်းမူႇၸေႊၼႆႉ တင်းမူတ်း ဢမ်ႇယွမ်း 10 ၸုမ်း။ ၵမ်ႈၼမ် ပီႇတူႉၸိတ်ႉ ၸိူဝ်းၶဝ် ႁဵတ်းၵၢၼ်ပၢႆးမၢၵ်ႈမီး။

ၸၢႆးၵျေႃႇတဵင်း လၢတ်ႈဝႃႈ “ ပီႇတူႉၸိတ်ႉမိူင်းပေႃႈၼႆႉ ဢွင်ႈတီႈၶဝ်တူင်ႉၼိုင် ပဵၼ်တၢင်းပၢင်ႇသၢႆး မိူင်းပေႃႈ။ ပီႇတူႉၸိတ်ႉ မဵဝ်ႉမသမ်ႉ မိူဝ်ႈၵူႈပွၵ်ႈ ပႂ်ႉၸွမ်းၶူဝ် ၸွမ်းသဵၼ်ႈတၢင်း ၼႂ်းဝဵင်းမူႇၸေႊ။ လိူဝ်ထႅင်ႈ ပီႇတူႉၸိတ်ႉၸိူဝ်းၼၼ်ႉတႄႉ ႁဵတ်း ပၢႆးမၢၵ်ႈမီးၵူၺ်း” ဝႃႈၼႆ။

ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်း လႅၼ်လိၼ်တႆး – ၶႄႇ။ ၼႂ်းၸႄႈဝဵင်းမူႇၸေႊၼႆႉ ၸုမ်းပီႇတူႉၸိတ်ႉ ယိပ်းၵွင်ႈၵၢင်ႇ တူင်ႉၼိုင်ၵႂႃႇမႃးၵၼ်တင်းၼမ်။

ၸၢႆးၵျေႃႇ ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ၼႂ်းဝူင်ႈဝၢင်ႈၼႆႉ ဢမ်ႇလႆႈႁၼ် ပီႇတူႉၸိတ်ႉ ၼုင်ႈၶူဝ်းသိုၵ်းသေ ယိပ်း ၵွင်ႈၵၢင်ႇၵႂႃႇမႃးၼႂ်းဝဵင်းယဝ်ႉ။ ပိူင်ႈဝႆႉၶႃႈဢေႃႈ” ဝႃႈၼႆ။

ယၢမ်းလဵဝ်ၼႆႉ ၸုမ်းပီႇတူႉၸိတ်ႉ ပွၵ်ႈမိူဝ်းၶိုၼ်း ဢွင်ႈတီႈယူႇၽႂ်မၼ်းၵမ်ႈၼမ်ယဝ်ႉလႄႈ လွင်ႈတဵၵ်းတဵင် ၵူၼ်းမိူင်းၵေႃႈ ဢမ်ႇပေႃးမီးယဝ်ႉ။ ၵူၼ်းမိူင်းပဵၼ်ဢၼ်လီၸႂ် ၸူမ်းသိူဝ်းယူႇ ၵူၼ်းမူႇၸေႊလၢတ်ႈၼင်ႇၼႆ။