သိုၵ်းလူင်ပွင်ၸိုင်ႈမၢၼ်ႈ ႁႅင်းသိုၵ်း သီႇပၢၵ်ႇပၢႆ ၶိုၼ်ႈယိုဝ်းတပ်ႉပၢင်သဝ်း ၶွင်ႇသီႇဢဝ်ၶိုၼ်းၸိုင်ႈတႆး ပွတ်းထုင်ႉလွႆတွၼ်း ဢၼ်မီး ၾၢႆႇတူၵ်း ၵေးသီး ၾၢႆႇႁွင်ႇႁၢမ်းငၢႆး ၼႂ်းၸႄႈဝဵင်းမိူင်းၵိုင်။

ဝၼ်းတီႈ 27/02/2020 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ ႁႅင်းသိုၵ်း 100 ပၢႆ ယွၼ်းလတ်းလွႆတွၼ်း သေ ၵႂႃႇတူင်ႉၼိုင် တၢင်းပွတ်းထုင်ႉၼၼ်ႉ။ လွင်ႈၼႆႉ ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA သႅၼ်းၽူႈၵွၼ်း တပ်ႉ ပႃႈတႂ်ႈ တိုၵ်ႉႁၢႆးငၢၼ်းထိုင် ၸၼ်ႉပႃႈၼိူဝ်၊ ပႆႇတၼ်းလႆႈတွပ်ႇပၼ်ၶိုၼ်းသေ သိုၵ်းလူင်ပွင်ၸိုင်ႈမၢၼ်ႈ ၶိုၼ်ႈယိုဝ်းၾၢႆႇလဵဝ်။

ၽူႈမီးပုၼ်ႈၽွၼ်း ၼႂ်းပိုၼ်ႉတီႈ ၸဝ်ႈၼိုင်ႈလၢတ်ႈဝႃႈ – “ တင်ႈဢဝ်ၵၢင်ၼႂ် 8 မူင်း သိုၵ်းမၢၼ်ႈဢဝ်ႁႅင်းသိုၵ်း 100 ပၢႆ ၶိုၼ်ႈယိုဝ်းတပ်ႉပၢင်သဝ်း လွႆတွၼ်း ဢၼ် RCSS ပၵ်းဝႆႉၶႃႈ။ တေႃႇထိုင်ယၢမ်းလဵဝ် တိုၵ်ႉယိုဝ်းယူႇတိၵ်းတိၵ်း” – ဝႃႈၼႆ။

ယၢမ်းမွၵ်ႈ 10:30 မူင်း ၼႂ်ၼႆႉ သိုၵ်းလူင်ပွင်ၸိုင်ႈမၢၼ်ႈ တႃႇ ႁႅင်းသိုၵ်း 40 ၵေႃႉ ယူႇၾၢႆႇလင်သေ ယိုဝ်းၵွင်ႈလူင်ပၼ်၊ ႁႅင်း ၵူၼ်းတႃႇ 70 ၵေႃႉသမ်ႉၶိုၼ်ႈယိုဝ်းတပ်ႉ RCSS သၼ်လွႆတွၼ်း၊ ဢၼ်လုၵ်ႉတၢင်း မိူင်းၵိုင်သေ ၶိုၼ်ႈမႃးတၢင်း ၾၢႆႇ ၸၢၼ်း လွႆတွၼ်းၵေႃႈမီး ။ ဢၼ်သူင်ႇႁႅင်းသိုၵ်းၶိုၼ်ႈမႃးထႅင်ႈၵေႃႈ မီးပဵၼ် 4 တပ်ႉၵွင်။ ပဵၼ်တႂ်ႈတပ်ႉတိူင်းသိုၵ်း ယမၶ လႃႈသဵဝ်ႈလႄႈ ယလၶ ၶူဝ်လမ် – ၼႆ ၽူႈမီးၸၼ်ႉၼႂ်းပိုၼ်ႉတီႈလၢတ်ႈ။

“ယၢမ်းလဵဝ် ၵူၼ်းဝၢၼ်ႈၵူၼ်းသူၼ် တႄႉ ပႆႇႁၼ်ၽႂ်ပၢႆႈလူင်းမႃး ၼင်ႇၵဝ်ႇၶႃႈ။ သၼ်လွႆထုင်ႉၼၼ်ႉၵေႃႈမီး ဝၢၼ်ႈၵူၼ်းယူႇ၊ ပေႃးယိုဝ်းၵၼ် ႁဵတ်းၼႆတႄႉ တိုၼ်းလႆႈပၢႆႈၶႃႈလေႃႇ” – ၼႆ ၸၢႆးသႅင် ၵူၼ်းႁၢမ်းငၢႆးလၢတ်ႈ။

ၸဝ်ႈၼႃႈတီႈၼႂ်းပိုၼ်ႉတီႈ လၢတ်ႈထႅင်ႈဝႃႈ -“မိူဝ်ႈၵၢင်ဝၼ်းတဵင်ႈၼၼ်ႉၵေႃႈ ႁိူဝ်းမိၼ်သိုၵ်းမၢၼ်ႈ လတ်းၵႂႃႇလမ်း ၼိုင်ႈ။ မုင်ႈၼႃႈၵႂႃႇတၢင်းမိူင်းတုင်။ ႁိူဝ်းမိၼ်ၼၼ်ႉတႄႉဢမ်ႇယိုဝ်းလူင်းမႃးၼင်ႇၵဝ်ႇ ” – ဝႃႈၼႆ။

မိူဝ်ႈဝၼ်းတီႈ 24/2/2020 ၼၼ်ႉ RCSS လႆႈဢွၵ်ႇၶေႃႈပိုၼ်ၽၢဝ်ႇၽိုၼ်ၼိုင်ႈ ။ ပႃးဝႆႉဝႃႈ တေၶတ်းၸႂ်ပွင်သၢင်ႈၵႂႃႇ ၼင်ႇႁိုဝ်တေပဵၼ်မႃးပၢင်ၵုမ်လူင်လွင်ႈငမ်းယဵၼ်မိူင်းႁူမ်ႈတုမ် (ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင်ပွၵ်ႈၵမ်း 4) တေ ၸတ်းပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈတႆး ၸဵမ်ၸိူဝ်းၼႆႉ။

ၽူႈမီးပုၼ်ႈၽွၼ်းၼႂ်း RCSS ၸဝ်ႈၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ ပေႃးတူၺ်းဝၼ်းမိူဝ်ႈၼႆႉ ၶဝ်တိုၼ်းတင်ႈၸႂ် ၶိုၼ်ႈယိုဝ်းႁဝ်းၶႃႈၵူၺ်း။ ဢၼ်ၶဝ်ႁဵတ်းၸိူင်ႉၼႆ ယၢမ်းလဵဝ်ၼႆႉ မိူၼ်တင်းဝႃႈ သိုၵ်းမၢၼ်ႈၼႆႉ ၶႂ်ႈယႃႉၵၢၼ်ငမ်းယဵၼ် ၵူၺ်းယဝ်ႉ”- ဝႃႈၼႆ။

မိူဝ်ႈၵၢင်လိူၼ် ၾႅပ်ႊၿိဝ်ႊရီႊၼႆႉၵေႃႈ သိုၵ်းလူင်ပွင်ၸိုင်ႈမၢၼ်ႈ ၶိုၼ်ႈယိုဝ်း သၢႆသိုၵ်း RCSS/SSA တၢင်းထုင်ႉ ၼွင်လႅင် – ဝဵင်းပၢင်လူင်လႄႈလႆႈပိုတ်းယိုဝ်းၵၼ်။ ၵူၺ်းၵႃႈ ဢမ်ႇလႆႈပဵၼ်ပၢင်တိုၵ်းယႂ်ႇတေႃႇၵၼ်။

ၶွင်ႇသီႇဢဝ်ၶိုၼ်းၸိုင်ႈတႆးၼႆႉ ၵိုတ်းတိုၵ်း NCA ၵေႃႇသၢင်ႈလွင်ႈငမ်းယဵၼ်ဝႆႉ ၸၼ်ႉၸိုင်ႈပတ်းပိုၼ်ႉ၊ ၵူၺ်းၵႃႈ ၵၢၼ်သိုၵ်းၵၢၼ်သိူဝ်ဢမ်ႇၼိမ်ဢမ်ႇသဝ်း၊ တင်ႈတႄႇ ႁူဝ်ပီ 2020 ၼႆႉမႃး ၺႃးသိုၵ်းလူင်ပွင်ၸိုင်ႈမၢၼ်ႈ ၵူတ်ႇသွၵ်ႈ လိုပ်ႈလမ်း ၼႂ်းထုင်ႉ တူၼ်းလွႆ ၾၢႆႇႁွင်ႇမိူင်းပၼ်ႇ၊ ၾၢႆႇၸၢၼ်းၶူဝ်လမ်၊ ထုင်ႉၵဵင်းတွင်း၊ ၵဵင်းလူမ်း၊ ၵဵင်းၶမ်းၸိူဝ်းၼႆႉ ၊ ၾၢႆႇ RCSS ငိူင်ႉဝႄႈပၼ်လႄႈ ဢမ်ႇထိုင်တီႈလႆႈပဵၼ်ပၢင်တိုၵ်းၵိူတ်ႇၶိုၼ်ႈမႃး။

ၾၢႆႇၼိုင်ႈ RCSS ႁၢင်ႈႁႅၼ်း တႃႇဢွၼ်ၼမ်း ၸတ်းႁဵတ်းပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး တီႈဝဵင်းလၢင်းၶိူဝ်း ၸိုင်ႈတႆး ပွတ်းၸၢၼ်း ၼႂ်းႁူဝ်လိူဝ် ဢေႊပရိူဝ်ႊ (ၼႃႈသွၼ်းၼမ်ႉ) တေမႃးၼႆႉ။