ၽူႈၵိူဝ်းၵုမ်ၸိုင်ႈမိူင်းတေႃႇဢွင်ႇသၢၼ်းၸူႉၵျီႇ လူင်းပိုၼ်ႉတီႈ မိူင်းတႆး မိူင်းၶျၢင်း မိူင်းယၢင်း ထပ်းၵၼ်လႄႈ ၸုမ်းႁဵတ်းၵၢၼ်မိူင်း ပၵ်းတႃထတ်းသၢင်ဝႃႈ ႁႃသဵင်တႃႇပၢင်လိူၵ်ႈတင်ႈဝႃႈၼႆ။
တေႃႇဢွင်ႇသၢၼ်းၸူႉၵျီႇ ၵႂႃႇဢႅဝ်ႇယဵမ်ႈ ဝၼ်းတီႈ 12/2/2020 ဝဵင်းပၢင်လူင်မိူင်းတႆး၊ ဝၼ်းတီႈ 20/2/2020 ဝဵင်းထၢၼ်ႊတလၢၼ်ႊ မိူင်းၶျၢင်းလႄႈ ဝၼ်းတီႈ 24-25/2/2020 မိူင်းယၢင်းၽိူၵ်ႇ။ ႁူပ်ႉထူပ်းဢုပ်ႇဢူဝ်းပႃးၵူၼ်းမိူင်း ။ ႁူဝ်ပဝ်ႈပႃႇတီႇတီႊမွၵ်ႊၶရေႊသီႊ ၸိူဝ်ႉၸၢတ်ႈၶျၢင်း ဢူးငၢႆသၵ်း လၢတ်ႈဝႃႈ မၼ်းၼၢင်းလူင်းႁူၺ်းသူၼ်းႁႃသဵင် တႃႇပၢင်လိူၵ်ႈတင်ႈတေမႃးၼႆႉဝႃႈၼႆ။
ၼႂ်းတူင်ႇဝူင်းၸုမ်းႁဵတ်းၵၢၼ်မိူင်းၵေႃႈထတ်းသၢင်ဝႃႈ ၽူႈၵိူဝ်းၵုမ်ၸိုင်ႈမိူင်း ၸႂ်ႉငိုၼ်းၸိုင်ႈမိူင်းသေ ဢွၵ်ႇတၢင်းဢႅဝ်ႇယဵမ်ႈၼႃႈလိၼ်ၸၢဝ်းၶိူဝ်းတီႈၼိုင်ႈယဝ်ႉတီႈၼိုင်ႈ ။ ဢၼ်မၼ်းၼၢင်းမွၵ်ႇလၢတ်ႈၶေႃႈၵႂၢမ်းၽွင်းႁူပ်ႉထူပ်းၵူၼ်းမိူင်းၼၼ်ႉၵေႃႈ သၢႆၵႂၢမ်းမၼ်းၼၢင်းပႃးဢၼ်ႁူၺ်းသူၼ်းတႃႇပၢင်လိူၵ်ႈတင်ႈ ဝႃႈၼႆၵေႃႈမီး။
ပႃႇတီႇၶၢင်ယင်းတူၵ်ႇတၵ်ႉဝႃႈ လၢႆးႁဵတ်းၵၢၼ်ပႃႇတီႇၼူၵ်ႉယုင်းၼႆႉငၢႆးမိူၼ်လၢႆးႁဵတ်းၵၢၼ်ပႃႇတီႇသၢင်ႇသီႈမိူဝ်ႈပူၼ်ႉမႃး ဝႃႈၼႆဝႆႉ။
ၵဵဝ်ႇၵပ်းလွင်ႈၼႆႉ ဢူးၸေႃႇထေး ၽူႈၶၢၼ်ပၢၵ်ႇ လုမ်းၸွမ်ၸိုင်ႈလၢတ်ႈမိူဝ်ႈဝၼ်းတီႈ 21/2/2020 ဝႃႈ တေႃႇဢွင်ႇသၢၼ်းၸူႉၵျီႇ လႆႈႁပ်ႉဝႆႉပႃးပုၼ်ႈၽွၼ်း ႁူဝ်ပဝ်ႈၶွမ်ႊမတီႊလွင်ႈႁုၼ်ႈမုၼ်းလႅၼ်လိၼ်လႄႈ မၼ်းၼၢင်းၸင်ႇလႆႈႁူပ်ႉထူပ်းၵူၼ်းမိူင်း ဝႃႈၼႆ။
ၾၢႆႇၼိုင်ႈ ပႃႇတီႇ NLD ၼႆႉ ၶွတ်ႇၽွတ်ႈဝႆႉ ၶွမ်ႊမတီႊၸၢဝ်းၶိူဝ်း ယဝ်ႉသေ ပိုၼ်ၽၢဝ်ႇဝႆႉဝႃႈ တေၶဝ်ႈႁႃၸၢဝ်းၶိူဝ်းႁႂ်ႈလႆႈလွင်ႈမိုတ်ႈၵိုဝ်းၸမ်ၸႂ်ၸၢဝ်းၶိူဝ်းဝႃႈၼႆဝႆႉ။
တေႃႇထိုင်ယၢမ်းလဵဝ် လူင်ပွင်ၸိုင်ႈယင်းပႆႇပိုၼ်ၽၢဝ်ႇဝၼ်းၸတ်းပၢင်လိူၵ်ႈတင်ႈလႄႈ ပႃႇတီႇၸၢဝ်းၶိူဝ်း ဢွၼ်ၵၼ်မႆႈၸႂ် ၶၢဝ်းယၢမ်းတႃႇလူင်းႁႃသဵင်၊ ၶၢဝ်းယၢမ်းႁၢင်ႈႁႅင်း ၵူဝ်ဢမ်ႇၶိုတ်းတၼ်း။ ၽွင်းယၢမ်းၼင်ႇၼႆ တေႃႇဢွင်ႇသၢၼ်းၸူႉၵျီႇ ဢၼ်ပဵၼ်ႁူဝ်ၼႃႈပႃႇတီႇၼူၵ်ႉယုင်း NLD တႄႉလူင်းပိုၼ်ႉတီႈၼႂ်းၼႃႈလိၼ်ၸၢဝ်းၶိူဝ်းႁူပ်ႉထူပ်းၵူၼ်းမိူင်း ဢမ်ႇထၢတ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ