ၸွမ်ၸိုင်ႈ ၻေႃႊၼႄႊလ်ထရမ်ႉ မိူင်းဢမေႊရိၵၼ်ႊ ဢွၵ်ႇၶၢဝ်းတၢင်းဢႅဝ်ႇယဵမ်ႈမိူင်းဢိၼ်ႊတီႊယႃႊ ၼႂ်းဝၼ်းတိတ်ႉလႄႈဝၼ်းၸၼ် 23-24/2/2020 ။
မၼ်းၸၢႆးပိုၼ်ၽၢဝ်ႇဝႃႈ ၶႂ်ႈႁူပ်ႉထူပ်းၵူၼ်းမိူင်း ဢိၼ်ႊတီႊယႃႊၵူၺ်းဝႃႈၼႆသေတႃႉ လၢႆလၢႆမိူင်းၼႂ်းလုမ်ႈၾႃႉ ထတ်းသၢင်ဝႃႈ ပဵၼ်တႃႇသိုဝ်ႉၶၢႆၶိူင်ႈမိၼ်သိုၵ်း ၊ တႃႇဢမေႊရိၵၼ်ႊလႄႈ မိူင်းဢိၼ်ႊတီႊယႃႊ ႁူမ်ႈမိုဝ်းၵၼ် ႁႄႉၵင်ႈလွင်ႈၶႄႇၶႂၢၵ်ႈၵၢၼ်သိုၵ်း ဝႃႈၼႆ။
ၾၢႆႇၼိုင်ႈ ၸွမ်ၸိုင်ႈဢူးဝိၼ်းမျိၼ်ႉ လူင်ပွင်ၸိုင်ႈမိူင်းႁူမ်ႈတုမ် ၵေႃႈပိုၼ်ၽၢဝ်ႇဝႃႈ ဝၼ်းတီႈ 26 ထိုင် 29/2/2020 ၼႆႉ တေဢွၵ်ႇၶၢဝ်းတၢင်းၵႂႃႇတီႈ မိူင်းဢိၼ်ႊတီႊယႃႊၼင်ႇၵဝ်ႇ ဝႃႈၼႆ။
ၶၢဝ်းတၢင်းၼႆႉ လူင်ပွင်ၸိုင်ႈမိူင်းႁူမ်ႈတုမ် တႄႉပိုၼ်ၽၢဝ်ႇဝႃႈတေၵႂႃႇဢႅဝ်ႇယဵမ်ႈၼႆၵူၺ်းသေတႃႉ ၾၢႆႇပၵ်းတႃၵၢၼ်မိူင်းၶဝ်တႄႉထတ်းသၢင်ဝႃႈ ၸွမ်းၼင်ႇပဵၼ်မိူင်းဢူၺ်းလီတင်းမိူင်းၶႄႇလႄႈ ပဵၼ်တႃႇၸွႆႈသၢင်ႈတႃႇ ဢိၼ်ႊတီႊယႃႊလႄႈမိူင်းၶႄႇ ၸမ်ၸႂ်ၵၼ် ဝႃႈၼႆ။
ၾၢႆႇၼိုင်ႈၵေႃႈ ပူၼ်ႉမႃးဝၼ်းတီႈ 17-20/2/2020 ၼႆႉ ၽူႈၵွၼ်းတပ်ႉၼမ်ႉမိူင်းဢိၼ်ႊတီႊယႃႊ Karambir Singh ဢႅဝ်ႇယဵမ်ႈမိူင်းႁူမ်ႈတုမ်သေ ဢုပ်ႇလၢတ်ႈတႃႇပၼ်တၢင်းၸွႆႈထႅမ် တၢင်းႁူႉပၢႆးပၺ်ၺႃၵဵဝ်ႇၵပ်းလွင်ႈတပ်ႉၼမ်ႉမိူင်းမၢၼ်ႈ။ တႃႇယုၵ်ႉမုၼ်းၵၢၼ်သိုၵ်း 2 ၸိုင်ႈမိူင်း ၼႆသေ လႆႈႁူပ်ႉထူပ်းၸွမ်ၸိၵ်းသိုၵ်း မိၼ်းဢွင်ႇလႅင်ႇ၊ ႁူပ်ႉထူပ်း ဢွင်ႇသၢၼ်းၸုၵျီႇ ၸိူဝ်းၼႆႉပႃး လႆႈႁူႉၼင်ႇၼႆ။
