Thursday, March 28, 2024

မူတၢႆၼမ် ၼႂ်းမိူင်းတႆးလၢႆလၢႆဝဵင်း

Must read

တၢင်းပဵၼ်ၵႃႇလႃႉ မူ (ၶႆႈဝတ်းမူ ဢႅပ်ႉၾရိၵ) ၽႄႈၼႂ်းၸိုင်ႈတႆးလၢႆလၢႆၸေႈဝဵင်း ၵူၼ်းမိူင်း  ဢမ်ႇႁတ်းၵိၼ်ၼိူဝ်ႉမူ။

Photo Credit to Xinhua

ၼႂ်းဝၼ်းတီႈ 17/2/2020   ႁွင်ႈၵၢၼ်ၽွင်းလူင် ၾၢႆႇၽုၵ်ႇသွမ်ႈ ၊ လဵင်ႉလူတူဝ်သတ်းလႄႈ မိူင်ၼမ်ႉ ပိုၼ်ၽၢဝ်ႇဝႃႈ မူတၢႆ  တီႈဢိူင်ႇၼွင်မွၼ် ဝဵင်းလႃႈသဵဝ်ႈ လႆႈၵူတ်ႇထတ်းတူၺ်း လိူတ်ႈမူ ၶေႃႈတွပ်ႇဝႃႈပဵၼ် တၢင်းပဵၼ်   ၼၢဝ်ဢႅပ်ႉၾရိၵ – ဝႃႈၼႆ။

- Subscription -

ၻွၵ်ႊတိူဝ်ႊ ယႄးဝိၼ်းထုၼ်း ၾၢႆႇၸိသင်ႇ ႁွင်ႈၵၢၼ်ယူတ်းယႃလႄႈလဵင်ႉလူတူဝ်သတ်း လၢတ်ႈဝႃႈ – တီႈၼွင်မွၼ်ၼႆႉ မူဢၼ်ၵူၼ်းဝၢၼ်ႈလဵင်ႉမီး 854 တူဝ် တၢႆၵႂႃႇယဝ်ႉ 30 တူဝ်။ ၼင်ႇႁိုဝ်မူတေဢမ်ႇတၢႆၼမ်ၼၼ်ႉ ႁဝ်းၶႃႈလႆႈႁူမ်ႈမိုဝ်းၵၼ်သေ ၽဵဝ်ႈလၢင်ႉ ႁဵတ်းလွင်ႈမူတ်းသႂ်ၼႂ်းဝၢၼ်ႈ ပၼ်ပိုၼ်ႉႁူႉၵႅမ်တူဝ် တေႁဵတ်းႁိုဝ်လုမ်းလႃး မူလီ မူၼၢဝ် လႄႈမူတၢႆ ၸဵမ်ၸိူဝ်းၼႆႉ – ဝႃႈၼႆ။

ၵဵဝ်ႇၵပ်းလွင်ႈၼႆႉ ၸၢႆးၼုမ်ႇ ၵူၼ်းလႃႈသဵဝ်ႈလၢတ်ႈဝႃႈ မူၵေႃႈတၢႆၼမ် ၵႆႇၵေႃႈတၢႆၼမ် လႆႈဝႄႈဝႆႉၶႃႈဢေႃႈယၢမ်းလဵဝ် ၼိူဝ်ႉမူ ၼိူဝ်ႉၵႆႇ ဢမ်ႇႁတ်းၵိၼ်ၶႃႈ။ ၼႂ်းၵၢတ်ႇၵေႃႈမီၵူၼ်းၶၢႆၵူၺ်း ဢမ်ႇမီးၵူၼ်းသိုဝ်ႉ  ၼိူဝ်ႉမူၼႆႉပဵၼ်ဢႅမ်ႈပဵၼ်ဢႅမ်ႈၶႃႈယဝ်ႉ။    ”- ဝႃႈၼႆ။

ၻွၵ်ႊတိူဝ်ႊ ယႄးဝိၼ်းထုၼ်းတႄႉလၢတ်ႈဝႃႈ တၢင်းပဵၼ်ၵႃႇလႃႉမူ ဢႅပ်ႉၾရိၵ ၼႆႉ ဢမ်ႇ ၸပ်းၵူၼ်း ငၢႆႈ။ ၵူၺ်းၵႃႈ  မူတေႃႇမူ ၸပ်းၵၼ်ငၢႆႈလႄႈ ပေႃးဢမ်ႇလုမ်း လႃးလီလီ မူၸၢင်ႈမူၺ်ႉမူတ်း။ ပဵၼ်ႁိုဝ်ၵေႃႈယဝ်ႉတၵ်းလႆႈႁဵတ်းလွင်ႈမူတ်းသႂ်ၼႂ်းဝၢၼ်ႈ ၼႂ်းႁိူၼ်း လႄႈၶွၵ်ႈမူ ဝႃႈၼႆ။

တီႈဝဵင်းလၢႆးၶႃႈၵေႃႈ တင်ႈဢဝ်ႁူဝ်လိူၼ်ၾႅပ်ႊပိဝ်ႊရီႊၼႆႉမႃး မူတၢႆၼမ် ထိုင်တီႈၵူၼ်းမိူင်း ပေႃးဢမ်ႇႁတ်း ၵိၼ်ၼိူဝ်ႉမူ။

လုင်းၸၢႆးၵူၼ်းလၢႆးၶႃႈလၢတ်ႈဝႃႈ-  တီႈဝၢၼ်ႈၼွင်မိူင်းၼၼ်ႉ မူလဵင်ႉတၢႆၼမ်   ဢၼ်လဵင်ႉ 20-30 ၵေႃႈ တၢႆမူၺ်ႉၵိုတ်းမွၵ်ႈ2-3 တူဝ်ၸိူဝ်းၼႆႉၵူၺ်း။ ဢၼ်တၢႆတင်းၶွၵ်ႈၵေႃႈမီး။ ၵူၼ်းလဵင်ႉမူပေႃးၶႂ်ႈၸႂ်လု ၶႃႈဢေႃႈ။ ၵူၼ်းမိူင်းၵေႃႈဢမ်ႇႁတ်းၵိၼ်ၼိူဝ်ႉမူ ပေႃးတေမီးလိူၼ်ယဝ်ႉၶႃႈ။ – ဝႃႈၼႆ။

ၵဵဝ်ႇၵပ်းလွင်ႈၼႆႉ ပူႇလႃႉ ထဝ်ႈဝၢၼ်ႈထဝ်ႈၼႃး  ၵေႃႈလၢတ်ႈဝႃႈ – “မူတၢႆၼၼ်ႉ  ၵူၼ်းဝၢၼ်ႈ ဢဝ်ၵႂႃႇပွႆႇတူၵ်းၼမ်ႉတဵင်း ႁဵတ်းႁႂ်ႈၼမ်ႉတဵင်းဝူၺ်ႇႁင်ႈ တူႇၼဝ်ႈ။ မၼ်းဢမ်ႇလီပဵၼ်သေဢိတ်း။ တႃႉဢဝ်ၾင်လိၼ်ပႅတ်ႈ ဢမ်ႇၼၼ် ၽဝ်ပႅတ်ႈလႃႈ– ဝႃႈၼႆ ။

ၼႂ်းၸေႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်းၵေႃႈ မူပဵၼ်တၢင်းပဵၼ်သေ တၢႆတင်းၼမ် ။  မိူဝ်ႈဝၼ်းတီႈ 10/2/2020 ၼၼ်ႉ ၸဝ်ႈၼႃႈတီႈၾၢႆႇလိူမ်ႈလႆႇ၊   ၾၢႆႇလဵင်ႉလူတူဝ်သတ်း ဢိၵ်ႇပလိၵ်ႈလႄႈ ထဝ်ႈဝၢၼ်ႈထဝ်ႈၼႃးႁူမ်ႈၵၼ်လူင်းၵူတ်ႇထတ်းၼႂ်းဝၢၼ်ႈ။တိၺွပ်းလႆႈ ၼိူဝ်ႉမူ ၼဝ်ႈ ပဵၼ်လၢႆလၢႆတိူၵ်ႈ ၼပ်ႉႁူဝ်သိပ်းၸွႆႉ တီႈၵူၼ်းၶၢႆၼိူဝ်ႉမူ ပွၵ်ႉဝၢၼ်ႈမၢၵ်ႇပိၼ်း။ လႆႈႁူမ်ႈၵၼ်ဢဝ်ၵႂႃႇၽဝ်ပႅတ်ႈ  ။

ၼၢင်းလၢဝ် ၵူၼ်းလၢင်းၶိူဝ်းလၢတ်ႈတီႈၽူႈတွႆႇႁွၵ်ႈဝႃႈ – ပီႈၼွင်ႉလၢင်းၶိူဝ်းၵမ်ႈၼမ် ဢမ်ႇသိုဝ်ႉၵိၼ် ၼိူဝ်ႉမူ  တေမီးမွၵ်ႈလိူၼ်ႈၼိုင်ႈယဝ်ႉၶႃႈ။ မူပဵၼ်ၵႃႇလႃႉတၢႆၼမ်ၼႃႇ ဢမ်ႇႁတ်းၵိၼ်     တီႈပၢင်လူႇပၢင်တၢၼ်း ၵၢပ်ႈသွမ်းၸိူဝ်းၼႆႉၵေႃႈ ယင်းဢမ်ႇလူႇပႃးၼိူဝ်ႉမူ ယဝ်ႉၶႃႈ။ ၵႆၽေး ႁႂ်ႈဝႄႈၽေး ၶႃႈၼေႃႈ။  ဝႄႈဝႆႉၼႆႉလီလိူဝ် ၶႃႈဢေႃႈ။ – ဝႃႈၼႆ။

မိူဝ်ႈၵူႈပွၵ်ႈ ၼိူဝ်ႉမူၼိုင်ႈၸွႆႉ မိုၼ်ႇပၢႆ။ ယၢမ်းလဵဝ် 5-6 ႁဵင်ၵေႃႈဢမ်ႇမီးၵူၼ်းသိုဝ်ႉၵိၼ် ပီႈၼၢင်း ၵူၼ်းၶၢႆၶူဝ်းၼႂ်းၵၢတ်ႇလၢင်းၶိူဝ်းလၢတ်ႈၼေၼင်ႇၼႆ။

ၻွၵ်ႊတိူဝ်ႊ ယႄးဝိၼ်းထုၼ်း လၢတ်ႈဝႃႈ ၶႂ်ႈတိုၵ်းသူၼ်းၵူၼ်းမိူင်း ၸိူဝ်းလဵင်ႉမူ ၊ ပေႃးမီးမူတၢႆၼမ် သူင်ႇၶၢဝ်ႇပၼ်ၾၢႆႇလဵင်ႉလူတူဝ်သတ်း တေၸၢင်ႈမႃးယူတ်းယႃၵႄႈလိတ်ႈပၼ်။ မူတၢႆၼၼ်ႉယႃႇပွႆႇတူၵ်းၼမ်ႉတူၵ်းၼွင်။ ၾင်ပႅတ်ႈလိုၵ်ႉလိုၵ်ႉ ဢမ်ႇၼၼ် ၽဝ်ပႅတ်ႈ ၼႆႉ ပဵၼ်လၢႆးသၢင်ႇထုၵ်ႇလိူဝ်ပိူၼ်ႈ – ဝႃႈၼႆ။

တၢင်းပဵၼ်ၵႃႇလႃႉမူ (ၼၢဝ်ဢႅပ်ႉၾရိၵ) ၼႆႉ မိူဝ်ႈပီၵၢႆမွၵ်ႈလိူၼ်ထူၼ်ႈ 8 ၼႆႉၵေႃႈ ပဵၼ်ၼႂ်းၸိုင်ႈတႆးပွတ်းဢွၵ်ႇႁၢဝ်ႈႁႅင်း ယဝ်ႉၵမ်းၼိုင်ႈ။

ၵူၺ်းၵႃႈပဵၼ်ႁွပ်ႈၼႆႉ လူင်ပွင်ၸိုင်ႈယင်းဢမ်ႇပႆႇပိုၼ်ၽၢဝ်ႇပဵၼ်တၢင်းၵၢၼ်ဝႃႈ ပဵၼ်ဝဵင်းလႂ်လၢႆလၢႆ မူတၢႆလၢႆတူဝ်ယဝ်ႉ ၸဵမ်ၸိူဝ်းၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း