ယိုဝ်းၵၼ်တၢႆၼႂ်းၵၢတ်ႇ သႅၼ်ႊၵျူႊရီႊ ပလႃႇၸႃႇ ဝဵင်းလူင်ၵုင်းထဵပ်ႈ ၸိုင်ႈထႆး တၢႆ 1 ၵေႃႉ မၢတ်ႇၸဵပ်း 1 ၵေႃႉ။
ဝၼ်းတီႈ 18/2/2020 ဝၼ်းမိူဝ်ႈၼႆႉ ယၢမ်းဝၢႆးဝၼ်း 3 မူင်း 15 မိၼိတ်ႉ သဵင်ၵွင်ႈတႅၵ်ႇၼႂ်းၵၢတ်ႇ သႅၼ်ႊၵျူႊရီႊ ပလႃႇၸႃႇ ဢၼ်မီးတီႈသဵၼ်ႈတၢင်း ၽယႃးထႆး ဝဵင်းလူင်ၵုင်းထဵပ်ႈ ။
ႁွင်ႈၵၢၼ်ၶၢဝ်ႇထႆးရတ်ႉ ႁၢႆးငၢၼ်းဝႃႈ မီးၽူႈၸၢႆးၵေႃႉၼိုင်ႈ ၶိုၼ်ႈမႃးၸၼ်ႉ 4 တီႈၶလိၼ်းၼိၵ်ႉ (ႁွင်ႈယႃ) မေးၼႃႈမေးတႃ ထႅမ်တၢင်းႁၢင်ႈလီ တီႈ ၼႂ်းၵၢတ်ႇ သႅၼ်ႊၵျူႊရီႊ ပလႃႇၸႃ သေယိုဝ်းသႂ်ႇၽူႈယိင်းၵေႃႉၼိုင်ႈ တၢႆထင်တီႈ။ ၵေႃႉတၢႆမီးဢႃယုမွၵ်ႈ 28 ပီ။ လိူဝ်ၼၼ်ႉ ၽူႈယိင်းထႅင်ႈၵေႃႉၼိုင်ႈ မၢတ်ႇၸဵပ်းၸွမ်း။ ယၢမ်းလဵဝ် ၸဝ်ႈၼႃႈတီႈ ႁၢမ်တူဝ်သူင်ႇႁူင်းယႃဝႆႉယဝ်ႉ ဝႃႈၼႆ။
ၸွမ်းၼင်ႇ ၸဝ်ႈၼႃႈတီႈပလိၵ်ႈထႆး မႃးၵူတ်ႇထတ်းသေ လၢမ်းၶၢတ်ႈလၢတ်ႈတီႈ သိုဝ်ႇၶၢဝ်ႇ ဝႆႉတႄႉဝႃႈၽူႈယိင်းၵေႃႉၺႃးယိုဝ်းတၢႆၼၼ်ႉပဵၼ်ၸူႉၵဝ်ႇ ၵေႃႉမႃးယိုဝ်းၼၼ်ႉ။ လႅပ်ႈတေပဵၼ်ယွၼ်ႉၶႅၼ်ၵၼ်ၵူၺ်း ဝႃႈၼႆသေတႃႉ တေႃႇထိုင်ယၢမ်းလဵဝ် တိုၵ်ႉလမ်းႁႃၵေႃႉယိုဝ်း တႃႇတိၺွပ်းမႃးၵူတ်ႇထတ်းထဵတ်ႈထၢမ်ပၼ်တူတ်ႈတၢမ်ႇ ဝႃႈၼႆ။
ၼႂ်းႁူဝ်ပီ 2020 တႃႇသွင်လိူၼ်ၼႆႉၵူၺ်း ဢၼ်ၶဝ်ႈယိုဝ်းၼႂ်းၵၢတ်ႇ တီႈၵူၼ်းၵိုၼ်းၼႆႉ ဢမ်ႇယွမ်း 5 ပွၵ်ႈယဝ်ႉ ။
