ပလိၵ်ႈၶဝ်ႈၵူတ်ႇထတ်းပၢင်လွင်းၼႂ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းယဝ်ႉသေ လၢတ်ႈဝႃႈ တီႈတႃႈၶီႈလဵၵ်းၼႆႉ ပၢင်လွင်း (ကာစီနို) ဢၼ်ပိုတ်ႇဝႆႉပဵၼ် တၢင်းၵၢၼ် ဢမ်ႇမီး ဝႃႈၼႆ ။
ဝၼ်းတီႈ 6/2/2020 ၼၼ်ႉ ပလိၵ်ႈၸႄႈဝဵင်းတႃႈၶီႈလဵၵ်း ၶဝ်ႈၵူတ်ႇထတ်းႁူင်းႁႅမ်းလႄႈ တီႈဢၼ်ၸိုဝ်ႈယႂ်ႇ တီႈမီး ပၢင်တေႃႇလွင်း လၢႆလၢႆတီႈ၊ ၵူတ်ႇထတ်း ၸဝ်ႈၶွင်ၵၢၼ် (ၼၢႆးၸၢင်ႈ) တီႈႁူင်းႁႅမ်းသေတီႉၺွပ်း ပၢင်တေႃႇလွင်း 6 တီႈ ၊ ၵူၺ်းၵႃႈ ပလိၵ်ႈၸေႈဝဵင်းတႃႈၶီႈလဵၵ်းလၢတ်ႈဝႃႈ ဢမ်ႇၸႂ်ႈပၢင်တေႃႇလွင်းၼႂ်းႁူင်းႁႅမ်း ဝႃႈၼႆ။
မွင်ႇၺီႇၺီႇထူၺ်း ၽူႈၵွၼ်းပလိၵ်ႈ ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ပၵ်းပိူင်မၢႆမီႈတွၼ်ႈတႃႇပၢင်လွင်း ၵႃႊသီႊၼူဝ်ႊ ၼႆႉမီးဝႆႉပိူင်ငဝ်ႈပိုင်းမိူင်းယဝ်ႉ။ ပေႃးၶႂ်ႈပိုတ်ႇပၢင်လွင်း ၵႃႊသီႊၼူဝ်ႊၼႆ တေလႆႈတၢင်ႇယွၼ်းဢၼုယၢတ်ႈ သေပိုတ်ႇပဵၼ်တၢင်းၵၢၼ် ။ ယၢမ်းလဵဝ်ၼႂ်းဝဵင်းတႃႈၶီႈလဵၵ်းၼႆႉ ဢမ်ႇမီးပၢင်တေႃႇလွင်း ဢၼ်ပိုတ်ႇဝႆႉၸွမ်းၼင်ႇပၵ်းပိူင် ပဵၼ်တၢင်းၵၢၼ်”- ဝႃႈၼႆ။
ၵဵဝ်ႇလူၺ်ႈ ပၼ်ႁႃၼႆႉ မၼ်းၸၢႆးသိုပ်ႇလၢတ်ႈဝႃႈ “ ႁဝ်းၶႃႈလႆႈတီႉၺွပ်း ပၢင်တေႃႇလွင်း 6 တီႈ။ ႁဝ်းၶႃႈ ၶဝ်ႈၵူတ်ႇ ထတ်း တီႈဢၼ်ႁဝ်းၶႃႈထၢင်ႇထိူမ်သေလႆႈၶၢဝ်ႇဝႆႉၸိူဝ်းၼၼ်ႉၵူၺ်း။ ၵူၺ်းၵႃႈဢမ်ႇၸႂ်ႈပၢင်လွင်းၼႂ်းႁူင်းႁႅမ်း။ ၼႂ်းႁူင်းႁႅမ်းတႄႉ ႁဝ်းၶႃႈဢမ်ႇႁၼ်ပၢင်တေႃႇလွင်းၶႃႈ ” – ဝႃႈၼႆ။
ၸွမ်းၼင်ႇၽူႈမၢၵ်ႈၵူၼ်းမီး ၸဝ်ႈၶွင်ႁူင်းႁႅမ်းၼႂ်းတႃႈၶီႈလဵၵ်းလၢတ်ႈတႄႉဝႃႈ – ယွၼ်ႉပိူဝ်ႈပၢင်တေႃႇလွင်း ၼႂ်းၸေႈဝဵင်းတႃႈၶီႈလဵၵ်း ထုၵ်ႇသင်ႇၵိုတ်းဝႆႉလႄႈ ၵူၼ်းဢၼ်ႁၢမ်းႁႅၵ်းၵၢၼ်ငၢၼ်းၵႂႃႇမီးမွၵ်ႈ 7 ႁဵင်ပၢႆ ဝႃႈၼႆ ။
ဝၢႆးလင်ပၢင်လွင်းထုၵ်ႇသင်ၵိုတ်းယဝ်ႉသေ မိူဝ်ႈဝႃး ဝၼ်းတီႈ 11/2/2020 ၵေႃႈ ၵူၼ်းႁၢမ်းၵၢၼ် မွၵ်ႈ 200 ၵေႃႉ ဢွၼ်ၵၼ်ၵႂႃႇယွၼ်းတၢင်းၸွႆႈထႅမ်တီႈလုမ်း ႁွင်ႈၵၢၼ် ၾၢႆႇႁႅင်းၵၢၼ် တီႈတႃႈၶီႈလဵၵ်း ႁႂ်ႈၸွႆႈၵႄႈလိတ်ႈပၼ် ဝႃႈၼႆ။
ပလိၵ်ႈ မွင်ႇၺီႇၺီႇထူၺ်း လၢတ်ႈဝႃႈ “ ၶဝ်ႈၵူတ်ႇထတ်းတီႉၺွပ်းပၢင်တေႃႇလွင်းၼႆႉ ဢမ်ႇၸႂ်ႈၵၢင်ၸႂ်ႁဝ်းၶႃႈ ပလိၵ်ႈ သေႁဵတ်း။ ပဵၼ်ၶေႃႈၸီႉသင်ႇတင်းၼိူဝ် လူင်းမႃး။ ယွၼ်ႉပိူဝ်ႈမီးပၵ်းပိူင်မၢႆမီႈဝႆႉယဝ်ႉလႄႈ တေႁဵတ်းၵႂႃႇၸွမ်း ၼင်ႇ ပၵ်းပိူင် ” ဝႃႈၼႆ။
ယၢမ်းလဵဝ် ပၢင်တေႃႇလွင်းၼႂ်းႁူင်းႁႅမ်း ထုၵ်ႇသင်ႇပိၵ်ႉဝႆႉလႄႈ ၵူၼ်းမိူင်းထႆး ၸိူဝ်းပဵၼ် ၸဝ်ႈၶွင်ပၢင်တေႃႇလွင်း ၵဵမ်းဢွၼ်ႊလၢႆႊ ၸိူဝ်းၼၼ်ႉ ဢွၼ်ၵၼ်ပွၵ်ႈမိူဝ်းၶိုၼ်းယဝ်ႉသေတႃႉ ဢၼ်ပဵၼ်ၵူၼ်းႁဵတ်းၵၢၼ်ၵမ်ႈၽွင်ႈတႄႉ တိုၵ်ႉၶဝ်ႈဢွၵ်ႇယူႇၵူႈဝၼ်း။ ၵူၺ်းၵႃႈ ပၢင်လွင်းပိုတ်ႇဝႆႉတီႈလႂ်တႄႉဢမ်ႇႁူႉ ၼႆ ၸၢႆးၸူဝ်းၵူၼ်းတႃႈၶီႈလဵၵ်း လၢတ်ႈ တီႈၽူႈတွႆႇႁွၵ်ႈၼင်ႇၼႆ။
မွင်ႇၺီႇၺီႇထူၺ်း ပလိၵ်ႈၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈ ဝႃႈ ၼင်ႇႁိုဝ်တေၸၢင်ႈ လူတ်းယွမ်း လူင်းပၢင်တေႃႇလွင်း ၊ ၼင်ႇႁိုဝ်တေၸၢင်ႈၽဵဝ်ႈမူၺ်ႉလႆႈ လွင်ႈၵေႃႇၵၢၼ်ႁၢႆႉလႄႈၼင်ႇႁိုဝ်မၢႆမီႈတေသုမ်ႇငမ်းၼၼ်ႉ လႆႈတမ်းဝၢင်းပိူင်ၵၢၼ် 90 ဝၼ်း “ ၶၵ်ႉၵၢၼ်ၸဝ်ႈၶုၼ်သိူဝ် (ၵျႃးမိၼ်းၸီႇမၢၼ်ႇၶျႅတ်ႉ) ” သေတႄႇလူင်းမိုဝ်းႁဵတ်း သၢင်ႈၵႂႃႇယူႇ ဝႃႈၼႆ။