တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်မႃးပုတ်ႈတူင်ႉၼိုင်တီႈဢိူင်ႇမိူင်းၵႅတ်ႈ ၸေႈဝဵင်လႃႈသဵဝ်ႈၼၼ်ႉ  တဵၵ်းၶၢၼ်းၵူၼ်းမိူင်းၵႅတ်ႈ သူင်ႇရူတ်ႉၵႃးလႄႈထေႃႈလႃႈၵျီႈ ႁဵတ်းၵၢၼ်ၸွႆႈၼႂ်းတပ်ႉၶဝ်ၵူႈဝၼ်း ၵူၼ်းမိူင်း ယၢပ်ႇၽိုတ်ႇတႃႇ ႁႃၵိၼ်လဵင်ႉတွင်ႉ။

တပ်ႉသိုၵ်းလူင်ပွင်ၸိုင်ႈ ၶမယ 362 ဢၼ်လုၵ်ႉမိူင်းၶျၢင်း မႃးပုတ်ႈလၢႆႈတပ်ႉ 368 တီႈဢိူင်ႇမိူင်းၵႅတ်ႈ ၸေႈဝဵင်းလႃႈသဵဝ်ႈ ၼၼ်ႉ ၼွၵ်ႈလိူဝ် ဢၼ်ၶၢၼ်းၵူၼ်းမိူင်းဝႆႉယဝ်ႉ သင်ဝႃႈလူဝ်ႇၸႂ်ႉရူတ်ႉၵႃး လႄႈထေႃႈလႃႈၵျီႈ ၶၢဝ်းလႂ်ၵေႃႈ ႁွင်ႉၶၢၼ်းထႅင်ႈ ႁဵတ်းႁႂ်ႈၵူၼ်းမိူင်း   ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ  ၵူၼ်းမိူင်းၵႅတ်ႈၶၢင်းပွင်ႉၼင်ႇၼႆ။

ၸၢႆးၼွင်ႉ ၵူၼ်းမိူင်းၵႅတ်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ပုတ်ႈလၢႆႈတပ်ႉၵၼ် မိူဝ်ႈလိူၼ်ပူၼ်ႉမႃး။ ၸိုဝ်ႈၽူႈၵွၼ်းတပ်ႉပိဝ်ႇႁႃ ၶမယ 362 ၼႆႉႁွင်ႉဝႃႈ ၵျေႃႇၼႅင်ႇဢူး။ ဢၼ်ၶၢၼ်းရူတ်ႉၵႃးၵူၼ်းဝၢၼ်ႈဝႆႉ မိူၼ်ပၵ်းၵဝ်ႇပိူင်ၵဝ်ႇၵေႃႈလႆႈသူင်ႇပၼ် ။ လိူဝ်ၼၼ်ႉပေႃးမီးသၢႆသိုၵ်းၶဝ်ၶိုၼ်ႈမႃးႁႃႉ ၶဝ်လူဝ်ႇၸႂ်ႉ ရူတ်ႉ ၸႂ်ႉထေႃႈထႅင်ႈႁႃႉၼႆၵေႃႈ သမ်ႉ  သင်ႇမႃးၶၢၼ်းမႃး  ႁႂ်ႈသူင်ႇပၼ်ၶဝ်ထႅင်ႈ။ တင်းၵူၼ်း တင်းထူဝ်ႈ လႆႈၵႂႃႇႁဵတ်းပၼ်ၵၢၼ်ၶဝ် ။ ပေႃးၶဝ်ႁွင်ႉမႃး ၵူၼ်းဝၢၼ်ႈတိုၵ်ႉမီးၼႂ်းသူၼ် ၼႂ်းႁိူၵ်ႈၵေႃႈ ၵႃႈလႆႈၵႂႃႇႁဵတ်းၵၢၼ်ပၼ်ၶဝ်။ ႁဝ်းၶႃႈဢမ်ႇၸၢင်ႈႁႃၵိၼ်လဵင်ႉတွင်ႉလီလီ ”- ဝႃႈၼႆ။

ၽူႈၵွၼ်းတပ်ႉပိဝ်ႇႁႃႇ 362 ၼႆႉ   ၾၢႆႇၼိုင်ႈၵေႃႈၸႂ်ႉၵူၼ်းဝၢၼ်ႈ သိူဝ်ႇသၢႆးႁဵတ်းတၢင်း လူၺ်ႈဢမ်ႇမီး လွင်ႈ ၵမ်ႉၸွႆႈၵူၼ်းဝၢၼ်ႈသင် ဝႃႈၼႆ။

ၸၢႆးၼွင်ႉသိုပ်ႇလၢတ်ႈဝႃႈ – “ ၸႂ်ႉၵူၼ်းဝၢၼ်ႈ သိူဝ်ႇတၢင်း၊ လုၵ်ႉ ဝၢၼ်ႈလူင်မိူင်းၵႅတ်ႈ သိူဝ်ႇသၢႆးထိုင် ဝၢၼ်ႈၼမ်ႉလိၼ်းၶၢၼ် ။ တၢင်းယၢဝ်းဢမ်ႇထိုင်လၵ်းသေတႃႉ တၢင်းမၼ်းၵူတ်ႉလႄႈ  လႆႈႁဵတ်းယၢဝ်း။   ၵႃႈၸလိပ်ႈ ၵႃႈၼမ်ႉမၼ်းရူတ်ႉ၊ ၼမ်ႉမၼ်းထူဝ်ႈလႆႈဢွၵ်ႇႁင်းၵူၺ်းၼႆႉမၼ်းၶၢၼ်ၸႂ်တႄႉဢေႃႈ ၵူၼ်းဝၢၼ်ႈၼႆႉ။ ပေႃးႁဝ်းၶႃႈၶၢင်း ဝႃႈ ပၢၼ်တီႊမူဝ်ႊၵရေႊသီႊယဝ်ႉ တိုၵ်ႉၸႂ်ႉႁႅင်း ၵူၼ်းဝၢၼ်ႈ ယူႇလႃ ၼႆ ၶဝ်သမ်ႉၼႄးဝႃႈ ပေႃးၵူၼ်းထိူၼ်ႇၸႂ်ႉတႄႉ သူၶႂ်ႈႁဵတ်းပၼ် ပေႃးႁဝ်းၸႂ်ႉသမ်ႉ ဢမ်ႇၶႂ်ႈႁဵတ်းပၼ် ၶိုၼ်းဝၢႆႇၼႄးၵူၼ်းဝၢၼ်ႈၸိူင်ႉၼႆထႅင်ႈဢေႃႈၼႆႉ”– ဝႃႈၼႆ။

ပၢင်သဝ်းတပ်ႉသိုၵ်းလူင်ပွင်ၸိုင်ႈဢၼ်မႃးတူင်ႉၼိုင်တီႈမိူင်းၵႅတ်ႈၼႆႉ မီးၾၢႆႇၸၢၼ်းမိူင်းၵႅတ်ႈ။ ၸဵမ်မိူဝ်ႈပၢၼ်သိုပ်ႇပၢၼ် ၵႆႉလႄႇၸႂ်ႉႁႅင်းလၢႆၵူၼ်းဝၢၼ်ႈၸွႆႈႁဵတ်းတႃႇတပ်ႉၶဝ်။

ဢိူင်ႇမိူင်းၵႅတ်ႈၼႆႉ မီးၾၢႆႇဢွၵ်ႇဝဵင်းလႃႈသဵဝ်ႈ ယၢၼ်ၵႆလႃႈသဵဝ်ႈမွၵ်ႈ 60 လၵ်း။ မီးၸုမ်းသိုၵ်းလူင်ပွင်ၸိုင်ႈ၊ သိုၵ်းၵူၼ်းမိူင်း (ပီႇတုၸိတ်ႉ)မၢၼ်ႈပၢင်ႇ၊ ပလိၵ်ႈ ၊ သိုၵ်းတဢၢင်းၸိူဝ်းၼႆႉ တူင်ႉၼိုင်ယူႇသဝ်း။