မိူဝ်ႈၼႆႉဝၼ်းတီႈ 29 ယၢမ်းၵၢင်ၼႂ် 8 မူင်းၶိုင်ႈ ၼၢင်းယိင်းၶႄႇ ၵေႃႉၼိုင်ႈ ဢႃယု 32 ပီ ဢၼ်မႃးဢႅဝ်ႇယဵမ်ႈမိူင်းထႆးၼၼ်ႉ တၢႆတီႈႁူင်းႁႅမ်း ရီႊသွတ်ႊလင်ၼိုင်ႈ တီႈၸေႈဝဵင်းမႄႈရိမ်း ၸေႈတွၼ်ႈၵဵင်းမႆႇ မိူင်းထႆး။ ၸဝ်ႈၼႃႈတီႈၵႂႃႇၵဵပ်းတူဝ်တၢႆ ၵူတ်ႇထတ်းတူၺ်းတႄႉ ဢမ်ႇႁၼ်ႁွႆးပေႃႉထုပ်ႉၶႃႈႁႅမ်။
ဢူၺ်းၵေႃႉမၼ်းၼၢင်းလၢတ်ႈဝႃႈ ၶမ်ႈဝႃးမၼ်းၼၢင်းယင်းၵိၼ်ၵျေႃႇတင်းဢူၺ်းၵေႃႉသေ ၶၢင်းဝႃႈ ဢမ်ႇယူႇလီ ၼႆယူႇ။ ၼႂ်ၼႆႉ မၼ်းၼၢင်းလူမ်ႉ တၢႆ ၼႂ်းႁွင်ႈၼွၼ်းတီႈႁူင်းႁႅမ်း။ တၢႆယွၼ်ႉသင် ၵေႃႈဢမ်ႇႁူႉ ဝႃႈၼႆ။
တေႃႇထိုင်ယၢမ်းလဵဝ်ၸဝ်ႈၼႃႈတီႈၵေႃႈပႆႇပိုၼ်ၽၢဝ်ႇပဵၼ်တၢင်းၵၢၼ်ဝႃႈ မၼ်းၼၢင်းတၢႆယွၼ်ႉသင်။ တိုၵ်ႉၵူတ်ႇထတ်းယူႇ ပႆႇႁူႉလႆႈတႅတ်ႈတေႃး။ တေလႆႈဢဝ်ၶၢဝ်းယၢမ်းမွၵ်ႈ 2 ဝၼ်း ဝႃႈၼႆ။
ယၢမ်းလဵဝ်ၽူႈမီးပုၼ်ႈၽွၼ်း ဢဝ်တူဝ်တၢႆၼၢင်းၶႄႇၼႆႉ ၵႂႃႇဝႆႉတီႈႁူင်းယႃ ၼၶွၼ်းၽိင်း။ တူၺ်းႁၢင်ႈၾၢင်ၵူၼ်းၸွႆႈထႅမ်ၵဵပ်းတူဝ်တၢႆ တႄႉ သႂ်ႇသိူဝ်ႈၶူဝ်းႁႄႉၵင်ႈၸိူဝ်ႉမႅင်းဝၢႆးရတ်ႉသ် ၶူဝ်ႊရူဝ်ႊၼႃႊ (မိူၼ်ၼင်ႇၸဝ်ႈၼႃႈတီႈ တီႈမိူင်းဝူႊႁၢၼ်ႊ) ဝႆႉလႄႈ ၵူၼ်းမိူင်းဢွၼ်ၵၼ် တူၵ်းၸႂ်ၵူဝ်ႁႄ။
ၼၢင်းယိင်း ၵေႃႉဢၼ်ယၢမ်ႈၸွႆႈထႅမ် တႃႇပၢႆးယူႇလီပီႈၼွင်ႉတႆးၼႂ်းၵဵင်းမႆႇ လၢတ်ႈဝႃႈ လီမႆႈၸႂ်တႃႇပီႈၼွင်ႉတႆး၊ ၵူၼ်းႁဵတ်းၵၢၼ် မႄႈဝၢၼ်ႈ တီႈႁူင်းႁႅမ်းၼၼ်ႉ။ ယွၼ်ႉပိူဝ်ႈဝႃႈ ပီႈၼွင်ႉတႆးႁဝ်းၵမ်ႈပႃႈၼမ် ဝႆႉမဝ်မၢင်ပၢႆးယူႇလီ။ ဢမ်ႇပေႃးသူၼ်ၸႂ်ၼႂ်းၵၢၼ်ႁႄႉၵင်ႈတၢင်းပဵၼ် ။ ၶႂ်ႈတိုၵ်းသူၼ်း ႁႂ်ႈသႂ်ႇၽႅၼ်ႇပူၵ်ႉသူပ်းပူၵ်ႉပၢၵ်ႇ ၊ လုမ်းလႃးပၢႆးယူႇလီၵၼ်ၽွင်ႈ ဝႃႈၼႆ။
တေႃႇထိုင်ဝၼ်းမိူဝ်ႈၼႆႉ ဝၼ်းတီႈ 29/1/2020 ၵူၼ်းတိတ်းၸပ်းတၢင်းပဵၼ် ဝၢႆးရၢတ်ႉသ် ၶူဝ်ႊရူဝ်ႊၼႃႊ ၼႂ်းလုမ်ႈၾႃႉမီး 6078 ၵေႃႉ။ ၼႂ်းၼၼ်ႉ မိူင်းထႆး မီးၵူၼ်းတိတ်းၸပ်းၸိူဝ်ႉမႅင်းဝႆႉ 14 ၵေႃႉ။ ၼႂ်းမိူင်းၶႄႇၵူၺ်း မီးၵူၼ်းတိတ်းၸပ်းတၢင်းပဵၼ်ၼႆႉ 5991 ၵေႃႉ။ လုတၢႆၵႂႃႇယဝ်ႉ 132 ၵေႃႉ။
Ref; One 31
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ