ၸိူဝ်ႉဝၢႆးရၢတ်ႉသ် ၶူဝ်ႊရူဝ်ႊၼႃႊ ဢၼ်တႄႇပဵၼ်ၼႂ်းၸေႈဝဵင်းဝူႊႁၢၼ်ႊ ၸေႈမိူင်း ႁူႊပေႊ ၼၼ်ႉယၢမ်းလဵဝ် ၽႄႈလၢမ်းထိုင်လၢႆလၢႆၸိုင်ႈမိူင်းၼႂ်းလုမ်ႈၾႃႉ၊ ၵူၼ်းမိူင်းၶႄႇလုတၢႆၼပ်ႉႁူဝ်သိပ်း ၊ ၸပ်းၸိူဝ်ႉတၢင်းပဵၼ် ၼႆႉ ႁဵင်ပၢႆယဝ်ႉ ။

ၸွမ်းၼင်ႇၶၢဝ်ႇငၢဝ်း South China Morning Post မိူင်းၶႄႇ ဢွၵ်ႇဝႆႉဝႃႈ တေႃႇထိုင်ဝၼ်းသဝ် ဝၼ်းတီႈ 25 ပူၼ်ႉမႃး ၵူၼ်းတိတ်းၸိူဝ်ႉမႅင်း ဝၢႆးရၢတ်ႉသ် ၶူဝ်ႊရူဝ်ႊၼႃႊ ၼႂ်းမိူင်းၶႄႇ မီး 2700  ပၢႆသေ ၵူၼ်းတၢႆ မီး 80 ပၢႆ၊ ၼႂ်း 80 ပၢႆၼၼ်ႉ ၵူၼ်းဝဵင်းဝူႊႁၢၼ်ႊပႃး မွၵ်ႈ 20 ၵေႃႉ ၼႂ်းၼၼ်ႉပႃးတင်းမေႃယႃ ၵေႃႉၼိုင်ႈ  လုတၢႆ    ။

ယၢမ်းလဵဝ် ၸိူဝ်ႉဝၢႆးရၢတ်ႉသ် ၶူဝ်ႊရူဝ်ႊၼႃႊၼႆႉ ၽႄႈလၢႆလၢႆမိူင်းၼႂ်းလုမ်ႈၾႃႉ မိူၼ်ၼင်ႇ ၼႂ်းမိူင်းၶႄႇ မီး 2744၊ ႁွင်ႊၶွင်ႊ 8၊ မႃႊၵၢဝ်ႉ 5၊ တၢႆႉဝၢၼ်ႊ 4၊ ဢေႊသျႃႊ 27 (မႃးမိူင်းထႆး 5 ၵေႃႉ)၊ ယူႊရူပ်ႊ 3 ၵေႃႉ၊ ဢမေႊရိၵႃးၼိူဝ် 6 ၵေႃႉ၊ ဢေႃးသ်တေးလျႃး 4 ၵေႃႉ ၊ ႁူမ်ႈတၢင်းမူတ်းမီး 2801 ၵေႃႉ။ ယွၼ်ႉ မၼ်းၽႄႈလၢမ်းဝႆးလႄႈ လူင်ပွင်ၸိုင်ႈမိူင်းၶႄႇ သင်ႇပိၵ်ႉဝႆႉၵူၼ်းမိူင်းၼႂ်း 8 ၸေႈဝဵင်း  ၼႂ်းၸေႈ မိူင်းႁူႊပေႊ  ၊ ဢမ်ႇပၼ်ဢွၵ်ႇၶဝ်ႈၵႂႃႇမႃး၊ ဢမ်ႇပၼ်သိုဝ်ႉၶၢႆၼိူဝ်ႉသတ်း တူဝ်ထိူၼ်ႇ  – ဝႆႉ။

ၾၢႆႇပၢႆးယူႇလီၼႂ်းဝဵင်းတႃႈၵုင်ႈဝႃႈ- “ယၢမ်းလဵဝ် တီႈမိူင်းမၢၼ်ႈၼႆႉၵူၼ်းတိတ်းၸပ်းတၢင်းပဵၼ် ႁဝ်းၶႃႈပႆႇလႆႈႁၼ် ပႆႇလႆႈႁပ်ႉၸႅင်ႈဝႃႈမီး၊  ၵူၺ်းၵႃႈ ၼႂ်းဝဵင်းယႂ်ႇဝဵင်းလူင် ၼႂ်းမိူင်းမၢၼ်ႈၼႆႉ ႁူဝ်ၵူၼ်းၼမ်လႄႈ သင်ဝႃႈၸိူဝ်ႉမႅင်းၼၼ်ႉၽႄႈလၢမ်းမႃးထိုင်မိူင်းမၢၼ်ႈၸိုင် မၼ်းၸၢင်ႈၽႄႈလၢမ်းဝႆး၊ ယင်းလီမႆႈၸႂ်  ၵူဝ်ယူတ်းယႃၵၼ်ဢမ်ႇၶိုတ်းတၼ်းၵူၺ်းယဝ်ႉ ” – ဝႃႈၼႆ။

ၾၢႆႇၼိုင်ႈၵေႃႈ ၼင်ႇႁိုဝ်တေၸၢင်ႈႁႄႉၸိူဝ်ႉမႅင်းယႃႇၽႄႈလႆႈထႅင်ႈၼၼ်ႉၼႆသေ လူင်ပွင်ၸိုင်ႈၸေႈမိူင်းဝူႊႁၢၼ်ႊ သင်ႇၵေႃႇသၢင်ႈႁူင်းယႃလူင်ထႅင်ႈလင်ၼိုင်ႈ မိူဝ်ႈဝၼ်းသဝ်ပူၼ်ႉမႃး၊ ႁႂ်ႈၵေႃႇသၢင်ႈယဝ်ႉၶၢဝ်းတၢင်း 6 ဝၼ်း။ ႁူင်းယႃၼၼ်ႉတေဝႆႉၵူၼ်းပဵၼ်လႆႈ 1000 ၵေႃႉ။ တေဢဝ်ၵူၼ်းပဵၼ်ဢၼ်တိတ်းၸပ်းၸိူဝ်ႉဝၢႆးရၢတ်ႉသ် ဝူႊႁၢၼ်ႊ ၼၼ်ႉၵႂႃႇဝႆႉတီႈႁူင်းယႃမႂ်ႇၼၼ်ႉ မူတ်းမူတ်း ဝႃႈၼႆ။

တႃႇတေၸွႆႈယူတ်းယႃႁႄႉၵင်ႈ  ၵူၼ်းပဵၼ်ဢၼ်တေၶဝ်ႈတီႈႁူင်းယႃမႂ်ႇၼႆႉၼႆသေ ယၢမ်းလဵဝ် မေႃယႃဢၼ်ၵတ်ႉၶႅၼ်ႇ 150 ၵေႃႉ လၢႆလၢႆဝဵင်းတူဝ်ႈလုမ်ႈၾႃႉ ႁွတ်ႈထိုင်ဝႆႉတီႈဝဵင်းဝူႊႁၢၼ်ႊ ယဝ်ႉ ႁွင်ႈၵၢၼ်ၶၢဝ်ႇ BBC ၵေႃႈပိုၼ်ၽၢဝ်ႇဝႆႉၼင်ႇၼႆ။

ၸိူဝ်ႉမႅင်းဝၢႆးရၢသ်ႉ ၶူဝ်ႊရူဝ်ႊၼႃႊ ၼႆႉ ၾၢႆႇၶူၼ်ႉၶႂႃႉတၢင်းပဵၼ်ၸၢင်ႈၸပ်းၶူၼ်ႉၶႂႃႉ ႁၼ်ဝႃႈ ပဵၼ်ယွၼ်ႉၵိၼ်ၼိူဝ်ႉမိင်ႇ၊ ၼိူဝ်ႉငူးလႄႈပဵၼ်မႃး ။ ၵူၺ်းၵႃႈယၢမ်းလဵဝ်  ၸိူဝ်ႉမႅင်းတၢင်းပဵၼ်ၼႆႉ ၽႄႈၸွမ်းလူမ်း၊ ၵႂႃႇၸွမ်းလူမ်း ထူၺ်ႈၸႂ်၊ ႁိူဝ်ႇလႄႈ ၼမ်ႉမုၵ်ႈၼမ်ႉလၢႆး (ဢႆ၊ ၸၢမ် )တေႃႇၵၼ်ၸိူဝ်းၼႆႉ ဝႃႈၼႆ။

ၾၢႆႇပၢႆးယူႇလီ ၵူႈမိူင်းမိူင်းၼႂ်းလုမ်ႈၾႃႉ ပိုၼ်ၽၢဝ်ႇဢွၵ်ႇဝႆႉဝႃႈ- ၼင်ႇႁိုဝ်တေ ဢမ်ႇတိတ်းၸပ်း ၸိူဝ်ႉမႅင်းၶူဝ်ႊရူဝ်ႊၼႃႊ လႆႈငၢႆႈ ၼၼ်ႉ 1- ယႃႇပၼ်ႁႅင်းၵမ်ႉတူဝ်တူၵ်း၊2- ယႃႇပေၵႂႃႇတီႈၵူၼ်းၵိုၼ်း၊ 3- ပေႃးဢွၵ်ႇၼွၵ်ႈႁိူၼ်း တၵ်းလႆႈသႂ်ႇဢၼ်ပိၵ်ႉပၢၵ်ႇ (Mask)တႃႇသေႇ၊ 4- ၵႆႉၵႆႉသုၵ်ႈမိုဝ်းလၢင်ႉမိုဝ်း၊ 5- ၵိၼ်ပၼ်ၼမ်ႉၼမ်ၼမ် – ဝႃၼႆ ။