ပလိၵ်ႈထႆး တင်ႈၸုမ်း 20 ပၢႆ လမ်းတိၵူၼ်းၸူၼ်ႁၢၼ်ႉၶမ်း(ယိုဝ်းၵူၼ်းပႃး) တီႈၵၢတ်ႇ ရူဝ်ႊပိၼ်ႊသၼ်ႊ မိူင်းလူပ်းပူႊရီႊ ၸိုင်ႈထႆးၼၼ်ႉ ႁိုင်ၼၢၼ်း 14 ဝၼ်း တိလႆႈပႃးတင်းၶမ်း တင်းၵူၼ်းၽွမ်ႉၵၼ်။
ဝၼ်းတီႈ 22 ပလိၵ်ႈထႆး တိၺွပ်း ၸၢႆးပရသိတ်ႇၶျႆး ၶဝ်ၵႅဝ်ႈ (ၸိုဝ်ႈလဵၼ်ႈ – ၵွပ်း) ဢႃယု 39 ပီ ၊ ဢၼ်ၶဝ်ႈၸူၼ် ႁၢၼ်ႉၶမ်းမိူဝ်ႈဝၼ်းတီႈ 8/1/2020 ။ ပလိၵ်ႈတိၺွပ်းတူဝ်တီႈႁိူၼ်းမၼ်းၸၢႆး ဢၼ်မီးတီႈဝဵင်းသိင်ႊပူႊရီႊ။ မၼ်းၸၢႆးၼႆႉပဵၼ်ၽူႈၵွၼ်းႁူင်းႁဵၼ်းၸၼ်ႉၵၢင် လင်ၼိုင်ႈ တီႈဝဵင်းသိင်ႊပူရီႊ- ဝႃႈၼႆ။
ၶူးၵွပ်း (ၽူႈၵွၼ်းႁူင်းႁဵၼ်း)ၼႆႉ ၽွင်းမၼ်းၸၢႆးၵႂႃႇၸူၼ်ႁၢၼ်ႉၶမ်းၼၼ်ႉ ယိုဝ်းၺႃးပႃးၵူၼ်း 3 ၵေႃႉ ပႃးလုၵ်ႈဢွၼ်ႇ 2 ၶူပ်ႇ ၵေႃႉၼိုင်ႈ။
ၵဵဝ်ႇၵပ်းလွင်ႈၼႆႉ ၸၢႆးပရသိတ်ႇၶျႆး ၶဝ်ၵႅဝ်ႈ (ၶူးၵွပ်း )လၢတ်ႈဝႃႈ – “လူဝ်ႇတႅၼ်းၼီႈၼမ်၊ ဝူၼ်ႉသင်ဢမ်ႇပဵၼ်သင်လႄႈ ၸင်ႇလႆႈမႃးၸူၼ်လၢၼ်ႉၶမ်း။ ၶႂ်ႈႁႂ်ႈပလိၵ်ႈလမ်းတိ၊ လမ်းယိုဝ်း တၢႆ။ ပေႃးတၢႆ တေလႆႈငိုၼ်းသၢႆႈတႅၼ်း ၸဵမ်တီႈပလိၵ်ႈလႄႈတီႈၶွမ်ႊပၼီႊ။ ဢၼ်ယိုဝ်းၵူၼ်းၼၼ်ႉတႄႉ ဢမ်ႇလႆႈတင်ႈၸႂ်ယိုဝ်း။ ယိုဝ်းလွၵ်ႇႁႂ်ႈၵူၼ်းပၢႆႈပၼ်တၢင်းသေလႄႈ မူင်မိုဝ်းသမ်ႉၶမ်ၵႆၵွင်ႈလႄႈ ဢဝ်ၵွင်ႇလၼ်ႇတိူဝ်ႉၺႃးၵူၼ်းသွင်ၵေႃႉထိုင်တီႈလႆႈတၢႆ ပႃးၸဵမ်လုၵ်ႈဢွၼ်ႇလဵၵ်ႉၼၼ်ႉ ”- လၢတ်ႈၼေၸဝ်ႈၼႃႈတီႈပလိၵ်ႈလႄႈ ၼၵ်းၶၢဝ်ႇၶဝ်ၼင်ႇၼႆ။
ၶူးသွၼ်တီႈႁူင်းႁဵၼ်းလႄႈ ၵူၼ်းႁိမ်းႁွမ်းႁိူၼ်းမၼ်းၸၢႆးတႄႉလၢတ်ႈတီႈသိုဝ်ႇၶၢဝ်ႇထႆးဝႃႈ မၼ်းၸၢႆးၼႆႉ ပဵၼ်ၵူၼ်းလီလႄႈၵူၼ်းမီးၼမ်ႉၸႂ်ၵေႃႉၼိုင်ႈ ၊ လုမ်းလႃးပေႃႈမႄႈထဝ်ႈ 2 ၵေႃႉ၊ ဢမ်ႇထၢင်ႇမၼ်းၸၢႆးတေႁဵတ်းၸူၼ်၊ ဢမ်ႇလီၶႂ်ႈယုမ်ႇသေဢိတ်းဝႃႈၼႆ။
ဝၼ်းတီႈ 22/1/2020 ဝၢႆးလင် တိလႆႈမၼ်းၸၢႆးယဝ်ႉ ပလိၵ်ႈသိုပ်ႇၶူၼ်ႉႁႃၶမ်း ဢၼ်မၼ်းၸၢႆးၸူၼ်ၵႂႃႇ ၊ ၶူၼ်ႉႁၼ်တီႈႁိူၼ်းမေးမၼ်းၸၢႆး၊ ဢဝ်လၵ်ႉသိူင်ႇဝႆႉၼႂ်းၵူင် ၵွၼ်ႁိူၼ်းမၼ်း ။ တိလႆႈၶိုၼ်းတင်း 28 ဝၢတ်ႇ (ၼင်ႇဢၼ်ၸူၼ်ဢဝ်မႃး) ၵႃႈၶၼ်ၶမ်းမီးယူႇမွၵ်ႈ 7 သႅၼ်ဝၢတ်ႇ။
ဝၢႆးလင်ၼႆႉတႄႉ တေဢဝ်ၶိုၼ်ႈလုမ်းတြႃး တႃႇတႅပ်းတတ်းပၼ်တူတ်ႈတၢမ်ႇၵႂႃႇ – ဝႃႈၼႆ။
Ref; Thairat Online
