ၽူႈမၢႆ (ၸလေး) ဢိူင်ႇမိူင်းတၢင်ႈ ၸေႈဝဵင်းၵျွၵ်ႉမႄး ၺႃးယိုဝ်းၽွင်းၶီႇရူတ်ႉၶိူင်ႈ၊ မၢတ်ႇၸဵပ်းသူင်ႇယူတ်းယႃတူဝ်တီႈႁူင်းယႃ ၵျွၵ်ႉမႄး။
ၽူႈမၢႆဢိူင်ႇမိူင်းတၢင်ႈ ၸၢႆးမျိၼ်ႉဢူး ၵႂႃႇၵဵပ်းသဵၼ်ႈမၢႆႁူဝ်ၵူၼ်း ၵူၼ်းပႃးတွင်ႉမႄႈလႄႈလုၵ်ႈဢွၼ်ႇ တီႈဢိူင်ႇမိူင်းတၢင်ႈသေပွၵ်ႈၶိုၼ်း ၵျွၵ်ႉမႄးမိူဝ်ႈဝၼ်းတီႈ 22/1/2020 ယၢမ်းႁူဝ်ၶမ်ႈ ၽွင်းမၼ်းၸၢႆးထိုင်တီႈ ႁိမ်းတၢင်းၶွႆႈတူၼ်ႈၺွင်ႇ ဢၼ်မီးၼႂ်းၵႄႈ ဝၢၼ်မိူင်းတၢင်ႈလႄႈ ဝၢၼ်ႈၼမ်ႉသေႃႉၼၼ်ႉ မီးၵူၼ်းသွင်ၵေႃႉၶီႇရူတ်ႉၶိူင်ႈ ၸွမ်းမႃးသေ ယိုဝ်းသႂ်ႇလႄႈ ၸၢႆးမျိၼ်ႉဢူး မၢတ်ႇၸဵပ်းမၢၵ်ႇၵွင်ႈ 2 တီႈ။
ၸၢႆးၼုမ်ႇၵူၼ်းမိူင်းၵျွၵ်ႉမႄးလၢတ်ႈဝႃႈ – “မၢၵ်ႇၵွင်ႈၺႃးတီႈၵၢင်း ႁိမ်းႁူ ၵမ်းၼိုင်ႈလႄႈ တီႈပဵမ်ႉ ၵမ်းၼိုင်ႈ။ ၸုမ်းၸွႆႈထႅမ်လႆႈဢဝ်တူဝ်မၼ်းၸၢႆးၵႂႃႇသူင်ႇပၼ်တီႈႁူင်းယႃ မိူဝ်ႈဝႃးၼႆႉၵမ်းလဵဝ်ယဝ်ႉ။ လွင်ႈယိုဝ်းၵၼ်ၼႆႉ လႆႈႁၼ်ထီႇမႃးၵူႈမိုဝ်ႉၵူႈဝၼ်းလႄႈ ႁဝ်းၶႃႈၵူၼ်းမိူင်း လႆႈၾၢင်ႉယူႇ ၾၢင်ႉၵိၼ်တႄႉတႄႉ။ မႆႈၸႂ်လွင်ႈႁူမ်ႇလူမ်ႈ ”- ဝႃႈၼႆ။
ၵဵဝ်ႇၵပ်းလွင်ႈၼႆႉ ၸၢႆးထုၼ်းဝိၼ်း ၽူႈတႅၼ်းသၽႃးၸေႈမိူင်း ၶဵတ်ႇလိူၵ်ႈတင်ႈမၢႆၼိုင်ႈ ၸေႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ ၵူၼ်းမိူင်း ၼႂ်းၸိုင်ႈတႆးပွတ်းႁွင်ႇ ၵမ်းၵမ်းၺႃးယိုဝ်းၼႆႉ ပဵၼ်ယွၼ်ႉပၼ်ႁႃၵၢၼ်မိူင်းဢမ်ႇၼိမ် မၢႆမီႈၸိုင်ႈမိူင်းဢမ်ႇသုမ်ႇငမ်းၼိူဝ်ၵူၼ်းမိူင်း၊ ပဵၼ်ဢၼ်လီမႆႈၸႂ်လွင်ႈႁူမ်ႇလူမ်ႈၵူၼ်းမိူင်း ဝႃႈၼႆ။
“လွင်ႈယိုဝ်းၵၼ်ပွၵ်ႈၼႆႉ ၽူႈလူင်းမိုဝ်းယိုဝ်းပဵၼ်ၽႂ် လုၵ်ႉတၢင်းလႂ်မႃး ယွၼ်ႉသင်လႄႈယိုဝ်းၼႆ ၽႂ်ၵေႃႈဢမ်ႇလႆႈႁူႉၸွမ်း။ လွင်ႈ ယိုဝ်းၵၼ်ၵမ်းၵမ်းပဵၼ်ယူႇတိၵ်းတိၵ်းၼႆႉ ႁဝ်းၶႃႈႁၼ်ထိုင်တႄႉ တၵ်းလႆႈ ၵႄႈလိတ်ႈ ၵၢၼ်မိူင်း။ ၼင်ႇႁိုဝ်တေမီး မၢႆမီႈသုမ်ႇငမ်းပၼ်ၵူၼ်းမိူင်းလႆႈၼႆႉ ၵူႈၸၢဝ်းၶိူဝ်းတၵ်းလႆႈႁူမ်ႈၵၼ် ၽွမ်ႉၵၼ် ၶဵၼ်ႇတႅမ်ႈပိူင်ပိုင်းလၵ်းမိူင်း။ ပေႃးတေဝႃႈတႄႉတႄႉမၼ်း ယွၼ်ႉပိူဝ်ႈ သုၼ်ႇလႆႈဢမ်ႇမီးၽဵင်ႇပဵင်းၵၼ်လႄႈ ၵၢၼ်မိူင်းဢမ်ႇၼိမ်။ ပေႃးပဵၼ်ပၼ်ႁႃၸိူင်ႉၼႆမႃး ၸုမ်းယိပ်းၵွင်ႈၵၢင်ႇၵေႃႈ ၽႂ်ၵေႃႈဢမ်ႇၸၢင်ႈၸွႆႈသင်သေဢမ်ႇၵႃး ၵုမ်ႇပဵၼ်ၵဝ်ၼႄးမႂ်း မႂ်းၼႄးၵဝ်သေယဝ်ႉၵႂႃႇၸိူင်ႉၼၼ်ၵူၺ်း ” – ၸၢႆးထုၼ်းဝိၼ်း လၢတ်ႈၼေၼင်ႇၼႆ။
ပူၼ်ႉမႃးဝၼ်းတီႈ 3/11/2019 ၼၼ်ႉၵေႃႈ မီးၵူၼ်းဢမ်ႇႁူႉၸၵ်းၶဝ်ႈယိုဝ်း ၸၢႆးထုၼ်းယဵၼ်ႇ ဢႃယု (37) ပီ ၽူႈၵွၼ်းဢိူင်ႇမိူင်းတၢင်ႈ၊ ၸၢႆး ဢွင်ႇတဵင်း(ႁွင်ႉ) ၸၢႆးတဵင်း ဢႃယု (49) ပီ ပူႇၵႄႇဝၢၼ်ႈၼႃးမူၼ်း လႄႈ လုင်းသုၸေႇယ ဢႃယု (57) ပီ ပူႇၵႄႇ(ၵဝ်ႇ) ဝၢၼ်ႈလွႆ ဢွႆႇ ၼႂ်းႁၢၼ်ႉၶၢႆၶဝ်ႈၽၵ်း လူႉတၢႆထင်တီႈ 2 ၵေႃႉ။ ထႅင်ႈၵေႃႉၼိုင်ႈ ၵႂႃႇလူႉတၢႆ တီႈႁူင်းယႃ။ ၼၼ်ႉၵေႃႈ တေႃႇထိုင်ယၢမ်းလဵဝ်ယင်းဢမ်ႇတိလႆႈၵူၼ်းယိုဝ်း။
ၼႂ်းၸေႈဝဵင်းၵျွၵ်ႉမႄးၼႆႉ တပ်ႉသိုၵ်းလူင်ပွင်ၸိုင်ႈ ၊ ပလိၵ်ႈ၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တဢၢင်း၊ တႆး၊ ၶၢင် လႄႈၸုမ်းဢူၺ်းလီပွတ်းႁွင်ႇသၢမ်ၸုမ်း တူင်ႉၼိုင်ၵႂႃႇမႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ