ၶၢဝ်းယၢမ်းဝဵင်း ဝေႃႊသျိၼ်ႊတၼ်ႊ မိူင်းဢမေႊရိၵၼ်ႊ ဝၼ်းတီႈ 7/1/2020 ဝၼ်းဢင်းၵၢၼ်း ယၢမ်း ႁူဝ်ၶမ်ႈ 5 မူင်းၶိုင်ႈ (ၶၢဝ်းယၢမ်းမိူင်းတႆး ဝၼ်းတီႈ 8/1/2020 ဝၼ်းပုတ်ႉၵၢင်ၼႂ် 8 မူင်းၶိုင်ႈ)ၼၼ်ႉ သိုၵ်းဢီႊရၢၼ်ႊ ယိုဝ်းတပ်ႉလူမ်းဢမေႊရိၵၼ်ႊ ဢၼ်ပၵ်းတီႈ မိူင်းဢီႊရၵ်ႉ။
ငဝ်ႈငုၼ်းသိုၵ်း ပႅၼ်ႊတၵွၼ်ႊ ၶွင်ဢမေႊရိၵၼ်ႊပိုၼ်ၽၢဝ်ႇပဵၼ်တၢင်းၵၢၼ်ဝႃႈ ၺႃးယိုဝ်းဢမ်ႇယွမ်း 12 ၵမ်း။
သိုၵ်းဢီႊရၢၼ်ႊၼႆႉ ယူႇမိူင်းဢီႊရၢၼ်ႇသေ ယိုဝ်းမၢၵ်ႇၵႂႃႇၸူးတပ်ႉဢမေႊရိၵၼ်ႊ ဢၼ်မီးတီႈ မိူင်းဢီႊရၵ်ႉၼၼ်ႉၵမ်းသိုဝ်ႈဝႃႈၼႆ။
ၸွမ်ၸိုင်ႈ ဢမေႊရိၵၼ်ႊ ၻေႃႊၼႄလ်ႊထရမ်ႉ တႄႉ တႅမ်ႈတၢင်ႇတီႈ ဢိၼ်ႊသတႃႊၵရမ်ႊ သုၼ်ႇတူဝ်မၼ်းဝႃႈ -“ တပ်ႉလူမ်းသိုၵ်းဢမေႊရိၵၼ်ႊဢၼ်မီးတီႈ မိူင်းဢီႊရၵ်ႉၼၼ်ႉ ၺႃးယိုဝ်း 2 ၵမ်း။ သိုၵ်းဢမေႊရိၵၼ်ႊ မီးႁႅင်းသိုၵ်းလႄႈၶိူင်ႈယိုဝ်းသိုၵ်းၶိုတ်းၵၢပ်ႈပၢၼ်လိူဝ်ပိူၼ်ႈ ၼႂ်းလုမ်ႈၾႃႉ” – ဝႃႈၼႆ။
ၵူၺ်းၵႃႈ ယူႇတီႈဢမေႊရိၵၼ်ႊ တေတွပ်ႇၶိုၼ်းၸိူင်ႉႁိုဝ်ၼႆတႄႉ ပႆႇပိုၼ်ၽၢဝ်ႇပဵၼ်တၢင်းၵၢၼ်။
ပၢင်ၵုမ်သၽႃးမိူင်းဢီႊရၢၼ်ႊ ဝၼ်းတီႈ 7/1/2020 မိူဝ်ႈဝႃးၼႆႉလႆႈဢုပ်ႇၵုမ်ၵၼ်သေ ဢွၵ်ႇပၵ်းပိူင်ယုၵ်း ယၢင်ႇဢၼ်ၼိုင်ႈဝႃႈ တပ်ႉသိုၵ်းဢမေႊရိၵၼ်ႊ ဢိၵ်ႇပႃးတင်း ၽူႈႁူမ်ႈမိုဝ်းၸွႆႈထႅမ် တႃႇလူင်းမိုဝ်းၶႃႈ ႁႅမ်ၸွမ်သိုၵ်းလူင်ဢီႊရၢၼ်ႊ ၼၼ်ႉ ယူႇတီႈမိူင်းဢီႊရၼ်ႊ မၵ်းမၢႆဝႃႈ ပဵၼ်ၽူႈၵေႃႇၵၢၼ်ႁၢႆႉ – ဝႃႈၼႆ။
ဝၼ်းတီႈ 3/1/2020 ဢမေႊရိၵၼ်ႊၸႂ်ႉၶိူင်ႈမိၼ် ၻရူၼ်ႊ လမ်းယိုဝ်းၸွမ်သိုၵ်းလူင်ဢီႊရၢၼ်ႊ ၵႃႊသမ်ႊ သူဝ်ႊလေႊမၼီႊ ဢႃႇယု 62 ပီ တၢႆထင်တီႈ တီႈႁိမ်းၶူင်ႇႁိူဝ်းမိၼ်မိူင်း ပႅၵ်ႉၵတႅတ်ႉ မိူင်းဢီႊရၵ်ႉ။ ဝၢႆး ၼၼ်ႉ သွင်ၾၢႆႇၶဵင်ႈၶႅင်ၵၢၼ်သိုၵ်းၵၼ်မႃး။ ဢမေႊရိၵၼ်ႊၵေႃႈသူင်ႇႁႅင်းသိုၵ်း ႁိမ်းၸမ် 4000 ။ ဢီႊရၢၼ်ႊၵေႃႈပိုၼ်ၽၢဝ်ႇၵႃႈႁူဝ် ၸွမ်ၸိုင်ႈ ထရမ်ႉ 80 လၢၼ်ႉၻေႃႊလႃႊ (ငိုၼ်းမၢၼ်ႈမွၵ်ႈ လၢၼ်ႉ 120000 လၢၼ်ႉ) ။ၵူၼ်းမိူင်းတင်းလုမ်ႈၾႃႉတႄႉ မႆႈၸႂ်ၵူဝ်ပဵၼ်သိုၵ်းၵမ်ႇၽႃႇၵမ်း 3 ၼႆယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ