ပၢင်လိူၵ်ႈတင်ႈ 2020 ၼႆႉၼင်ႇႁိုဝ်တေပဵၼ် သိင်ႇဝႅတ်ႉလွမ်ႉဢၼ်ၵတ်းယဵၼ်သေ တေၵိုတ်းလႆႈပၢင်တိုၵ်းၼႂ်းမိူင်းၼၼ်ႉ ၸုမ်းဢူၺ်းလီ ပွတ်းႁွင်ႇ သၢမ်ပီႈၼွင်ႉ ပိုၼ်ၽၢဝ်ႇသိုပ်ႇၵိုတ်းတိုၵ်းၾၢႆႇလဵဝ် ထႅင်ႈ  2 လိူၼ် ဝႃႈၼႆ။

တပ်ႉသိုၵ်းဢူၺ်းလီပွတ်းႁွင်ႇ သၢမ်ပီႈၼွင်ႉဢၼ်ပဵၼ်  ၵဝ်ႈၵၢင်ႉ MNDAA တပ်ႉသိုၵ်းတဢၢင်း TNLA တပ်ႉသိုၵ်းရၶႅင်ႇ AA ၶဝ် ႁူမ်ႈၵၼ်ပိုၼ်ၽၢဝ်ႇ သိုပ်ႇၵိုတ်းတိုၵ်းၾၢႆႇလဵဝ်ထႅင်ႈ တင်ႈဢဝ်ဝၼ်းတီႈ 1 /1/2020 တေႃႇထိုင် 29/2/2020 တႃႇၶၢဝ်းတၢင်း 2 လိူၼ် ဝႃႈၼႆ။

ၶေႃႈပိုၼ်ၽၢဝ်ႇ သိုၵ်းဢူၺ်းလီ 3 ပီႈၼွင်ႉၼႆႉ ဢွၵ်ႇမိူဝ်ႈဝၼ်းတီႈ 1/1/2020 ။ ပဵၼ်ၶေႃႈပိုၼ်ၽၢဝ်ႇသိုပ်ႇၵိုတ်းတိုၵ်းၾၢႆႇလဵဝ် ၵမ်းထူၼ်ႈ 3။ ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ ၶႂ်ႈၵေႃႇသၢင်ႈ သိင်ႇဝႅတ်ႉလွမ်ႉဢၼ်ၵတ်းယဵၼ်သေ ၶႂ်ႈၵိုတ်းပၢင်တိုၵ်းၼႂ်းမိူင်း ၽွင်းပၢင်လိူၵ်ႈတင်ႈ 2020 လႄႈ ၸင်ႇလႆႈပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် ဝႃႈၼႆ။

ၵူၺ်းၵႃႈၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ  ၶၢဝ်းတၢင်းၵိုတ်းတိုၵ်းၼႆႉ သင်ဝႃႈ တပ်ႉသိုၵ်းလူင်ပွင်ၸိုင်ႈ ႁႅၼ်းသိုၵ်းလေႃႇတိုၵ်းမႃးၼႆၸိုင် တေၵႅတ်ႇၶႄတူဝ် ၵႂႃႇ ဝႃႈၼႆ။

ၸုမ်းဢူၺ်းလီပွတ်းႁွင်ႇ သၢမ်ပီႈၼွင်ႉၼႆႉ ပိုၼ်ၽၢဝ်ႇၵိုတ်းတိုၵ်း  9/9/2019 တေႃႇထိုင် 8/10/2019 ၵမ်းၼိုင်ႈ၊ 20/9/2019 တေႃႇထိုင် 20/12/2019 ၵမ်းၼိုင်ႈ။  ၶၢဝ်းတၢင်းပိုၼ်ၽၢဝ်ႇ ၵိုတ်းတိုၵ်းဝႆႉၼၼ်ႉ ပၢင်တိုၵ်းပဵၼ်ၼႂ်းၸိုင်ႈတႆးပွတ်းႁွင်ႇႁၢဝ်ႈႁႅင်း။ ထိုင်တီႈၵူၼ်းမိူင်းတူၵ်းပဵၼ်ယိူဝ်ႇသိုၵ်းသိူဝ်သေ လႆႈပၢႆႈယၢၼ်ႁိူၼ်းယေးတီႈယူႇ လႆႈမၢတ်ႇၸဵပ်းလုတၢႆၸွမ်းတင်းၼမ်။