ၵူၼ်းဝၢၼ်ႈပၢင်လႅင် ဢိူင်ႇပၢင်လႅင် ၸႄႈဝဵင်းၵျွၵ်ႉမႄး 6 ၵေႃႉ ၺႃးၸုမ်းဢူၺ်းလီပွတ်းႁွင်ႇ ၵုမ်းတူဝ် ႁွင်ႉဝႆႉ ပႆႇပွႆႇပၼ်ၶိုၼ်း ။

ဝၼ်းတီႈ 2/10/2021 ၵူၼ်းဝၢၼ်ႈပၢင်လႅင် ဢိူင်ႇပၢင်လႅင်ၸႄႈဝဵင်းၵျွၵ်ႉမႄး 6 ၵေႃႉ ယွၼ်ႉပိူဝ်ႈပဵၼ်ၵူၼ်းသိုၵ်း ၵဝ်ႇ RCSS ၼႆသေ ၸုမ်းဢူၺ်းလီၶဝ်ႈမႃးၼႂ်းဝၢၼ်ႈသေ ႁွင်ႉဢဝ်ၵႂႃႇၵုမ်းတူဝ်ဝႆႉ တေႃႇထိုင်ယၢမ်းလဵဝ်ပႆႇပွႆႇလွတ်ႈမႃးၶိုၼ်း ၵူၼ်းဝၢၼ်ႈပၢင်လႅင် ဢႃယု 40 ပၢႆၵေႃႉၼိုင်ႈလတ်ၢႈ။

မၼ်းၸၢႆးလၢတ်ႈတီႈၽူႈတွႆႇႁွၵ်ႈဝႃႈ -“ၶဝ်တင်း 6 ၵေႃႉပဵၼ်တႆး ဢေႃႈ။ ၶဝ်ပဵၼ်ၵူၼ်းသိုၵ်းၵဝ်ႇ ၶူဝ်းလၢႆး ၶႃႈ။ ၵူၺ်းၵႃႈတလဵဝ်တႄႉၶဝ်ထၢၵ်ႈယဝ်ႉ။ ၶဝ်မႃးႁဵတ်းၵၢၼ်သူၼ်ၼဵင်ႈတီႈဝၢၼ်ႈၶိုၼ်းဢေႃႈ ”  – ဝႃႈၼႆ။

ဢၼ်ၺႃးတီႉ 6 ၵေႃႉၼႆႉ ပဵၼ် ၽူႈယိင်း 2 ၵေႃႉလႄႈ ၽူႈၸၢႆး 4 ၵေႃႉ။ ၽွင်းၸုမ်းသိုၵ်းဢူၺ်းလီမႃးႁွင်ႉၵႂႃႇၼၼ်ႉတႄႉ ဢမ်ႇပေႃႉထုပ်ႇၼင်ႇၵဝ်ႇ၊ လႅပ်ႈၶဝ်ဢမ်ႇဝႆႉဝၢင်းၸႂ်ၵူဝ်ပဵၼ်ၵူၼ်းပွင်ႇၶၢဝ်ႇလႄႈမႃးႁွင်ႉၵႂႃႇၵူၺ်း – ၵူၼ်းၸၢႆး ၵူၼ်းဝၢၼ်ႈၼၼ်ႉသိုပ်ႇလၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ တပ်ႉသိုၵ်းတဢၢင်း  TNLA ၸဝ်ႈသိုၵ်း မၢႆးဢၢႆႈၵျေႃႇ လၢတ်ႈတီႈၽူႈတွႆႇႁွၵ်ႈဝႃႈ -“ႁဝ်းၶႃႈတႄႉ ဢမ်ႇမီးပေႃႇလသီႇ တီႉၺွပ်းၵူၼ်းမိူင်း ။ ၵူၺ်းၵႃႈ ပေႃးယၢမ်ႈပဵၼ်ၵူၼ်းသိုၵ်းၵဝ်ႇတႄႉ ႁွင်ႉၵုမ်းၵၵ်းတူဝ်ဝႆႉယူႇ။ ၵူၼ်းမိူင်းႁႃၵိၼ်လဵင်ႉတွင်ႉသိုဝ်ႈသိုဝ်ႈယူဝ်းယူဝ်းတႄႉ ဢမ်ႇတီႉ”- ဝႃႈၼႆ။

တီႈဢိူင်ႇပၢင်လႅင်ၼႆႉၵူၼ်းမိူင်းဢၼ်ၵႂႃႇသူင်ႇၶဝ်ႈၽၵ်း သိုၵ်းဢူၺ်းလီ ဢၼ်ပၵ်းပၢင်သဝ်းႁိမ်းဝၢၼ်ႈၼၼ်ႉ ၺႃးယိုဝ်း 2 ပွၵ်ႈ။ ၼႂ်းလိူၼ် သႅပ်ႉထႅမ်ႊပိူဝ်ႊပူၼ်ႉမႃး ဝၼ်းတီႈ 18 ၵေႃႉၼိုင်ႈ မၢတ်ႇၸဵပ်းတီႈဢူၵ်းလႄႈ ဝၼ်းတီႈ 22 ၵေႃႉၼိုင်ႈမၢတ်ႇၸဵပ်းတီႈမိုဝ်း။ တၢင်းထုင်ႉဢိူင်ႇပၢင်လႅင် ဝဵင်းၵျွၵ်ႉမႄးၼႆႉ ၸုမ်းသိုၵ်းၵေႃႈမီးၸေး၊ ပၼ်ႁႃပၢင်တိုၵ်းၵေႃႈပဵၼ်ၶိူဝ်းယႂ်းလႄႈ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၊ ၵႆႉၺႃးတီႉၺွပ်း ပေႃႉထုပ်ႉ ပိုတ်းယိုဝ်း ၶႃႈႁႅမ်တၢႆ ။