Friday, March 29, 2024

သိုၵ်းဢူၺ်းလီ 3 ၸုမ်း လူမ်ႇယိုဝ်း ၼႂ်းၸိုင်ႈတႆးပွတ်းႁွင်ႇ 5 တီႈ ယိုဝ်းပႃးၸၼ်ႉၸွမ်သိုၵ်း-ပၢႆးၸၢၵ်ႈ ၵမ်းႁႅၵ်ႈ

Must read

သိုၵ်းဢူၺ်းလီ 3 ၸုမ်း လူမ်ႇယိုဝ်း ၼႂ်းၸိုင်ႈတႆး ပွတ်းႁွင်ႇ 5 တီႈ၊ ၸၼ်ႉၸွမ်သိုၵ်း (ၾၢႆႇပၢႆးၸၢၵ်ႈ) တီႈဝဵင်းပၢင်ႇႁူႈ ၵေႃႈ  ၺႃးလူမ်ႇယိုဝ်းၵမ်းႁႅၵ်ႈ၊ မီးလွင်ႈတၢႆမၢတ်ႇၼမ် ႁဵတ်းႁႂ်ႈၵူၼ်းမိူင်း တူၵ်းၸႂ်။

Photo Credit to Myo Thant Aung – တပ်ႉပၢင်သဝ်း ၾၢႆႇၵူတ်ႇယႃႈမဝ်းၵမ်တီႈ လၢၼ်ႇ ဢူဝ်ႊရီႊယႅၼ်ႊထိူဝ်ႊ ၼွင်ၶဵဝ် ဝၼ်းတီႈ 15/8/2019 ယၢမ်းၵၢင်ၼႂ်

ဝၼ်းတီႈ 15/8/2019 ယၢမ်းၵၢင်ၼႂ် 5 မူင်း ၸုမ်းဢူၺ်းလီပွတ်းႁွင်ႇ ဢၼ်မီး သိုၵ်းလွႆ TNLA, သိုၵ်းရၶႅင်ႇ AA, သိုၵ်းၵဝ်ႈၵၢင်ႉ MNDAA ႁူမ်ႈၵၼ် ၶဝ်ႈယိုဝ်း ၸၼ်ႉၸွမ်သိုၵ်း DSTA တီႈဝဵင်းပၢင်ႁူႈ (ပၢင်ႇဢူႈလူင်/ ပိၼ်ႇဢူးလုၼ်ႇ) ၊ တီႈလၢၼ်ႇ X-Ray ရူတ်ႉၵႃး ႁိမ်းၽြႃး လူင်ပၢင်ႇဢူႈ (တၢင်းဢွၵ်ႇၵႂႃႇလႃႈသဵဝ်ႈ) ၊ တပ်ႉၵွင် 114 လႄႈ 115 ဢၼ်မီးႁိမ်း ဝၢၼ်ႈ ၵုင်းၵႅင်း ၊ တီႈလၢၼ်ႇၵူတ်ႇထတ်းယႃႈမဝ်းၵမ်လႄႈ တူဝ်းၵဵတ်ႉ ဢူဝ်ႊရီႊယႅၼ်ႊထိူဝ်ႊ ႁၢႆးဝေး ႁူဝ်ၵိုတ်ႈ ဝဵင်းၼွင်ၶဵဝ် လႄႈ  ၶူဝ်ႁူၺ်ႈၵိုတ်ႈ ။

- Subscription -

ၸၢႆးဢွင်ႇလုၼ်ႇ ပႃႇတီႇႁူဝ်သိူဝ် ဝဵင်းၼွင်ၶဵဝ်လၢတ်ႈတီႈၽူႈတွႆႇႁွၵ်ႈဝႃႈ- “ပၢင်တိုၵ်းပဵၼ်ၸဵမ်မိူဝ်ႈၵၢင်ၼႂ် မိူင်းပႆႇလႅင်း။ ၶဝ်ဢဝ်မၢၵ်ႇလူင်ပွႆႇသႂ်ႇပႃးလႄႈ တိူဝ်ႉမၢတ်ႇပႃးၵူၼ်းဝၢၼ်ႈ၊ ၵူၼ်းၵႂႃႇတၢင်း။ ဢၼ်မၢတ်ႇ ၸဵပ်းသေ ၸုမ်းၸွႆႈထႅမ်လႆႈၵႂႃႇဢဝ်မႃးမီးတီႈႁူင်းယႃၼႆႉ မီးယူႇ 14-15 ၵေႃႉ။ ၶႃႈႁဝ်းၵႂႃႇၸႂ်းမႃးမိူဝ်ႈၵႆႈ ၼႆႉ ၵမ်ႈၽွင်ႈယင်းပႆႇၸၢင်ႈဢဝ်ၵူၼ်းပဵၼ်လူင်းၵႃး။ ယွၼ်ႉဝႃႈ သဵင်ၵွင်ႈသဵင်မၢၵ်ႇၸမ်မႃး ႁိမ်း ႁူင်းယႃ ႁႅင်းၼႃႇလႄႈ ပႃးၸဵမ် ၵူၼ်းပဵၼ်လႄႈမေႃယႃၵေႃႈဢွၼ်ၵၼ်တူၵ်းၸႂ်ၵူဝ်ႁႄၵၼ်မူတ်း။”- ဝႃႈၼႆ။

Photo Credit to Lashio Media – တပ်ႉပလိၵ်ႈႁူၺ်ႈၵိုတ်ႈ ဢၼ်ၺႃးၸုမ်းသိုၵ်းဢူၺ်းလီ ၶဝ်ႈလူမ်, ဝၼ်းတီႈ 15/8/2019 ယၢမ်းၵၢင်ၼႂ်

ယၢမ်းလဵဝ် ယွၼ်ႉပၢင်တိုၵ်းပႆႇယဵၼ်လႄႈ တေလုၵ်ႉၼွင်ၶဵဝ် လူင်းၵႂႃႇပၢင်ႇႁူႈၵေႃႈဢမ်ႇၸၢင်ႈ၊ တေလုၵ်ႉ ပၢင်ႇႁူႈၶိုၼ်ႈမႃးတၢင်း ၼွင်ၶဵဝ် – ၵျွၵ်ႉမႄးၵေႃႈဢမ်ႇၸၢင်ႈ ပိၵ်ႉဝႆႉတၢင်းသွင်ၾၢႆႇသေဢမ်ႇၵႃး ၵူၼ်းဝၢၼ်ႈဢၼ် တူၵ်းၼႂ်းပိုၼ်ႉတီႈပဵၼ်ပၢင်တိုၵ်းၼၼ်ႉၵေႃႈ ဢမ်ႇၸၢင်ႈပၢႆႈၵႂႃႇတၢင်းလႂ်။

ၸုမ်းဢူၺ်းလီၶဝ်ပိုၼ်ၽၢဝ်ႇဝႃႈ ယႃႇႁႂ်ႈၵူၼ်းဝၢၼ်ႈဢွၵ်ႇႁိူၼ်း ယႃႇႁႂ်ႈပိုတ်ႇၽၵ်းတူႁိူၼ်း။ ဢူၺ်း ၵေႃႉ ၶႃႈႁဝ်းဢၼ်ပိုၼ်ႇလၢၼ်ႉဝႆႉတီႈလၢၼ်ႇဢေးသျႃးဝိူဝ်းလ် ၼၼ်ႉမၼ်းငိၼ်းသဵင်ၵွင်ႈသေ ဢွၵ်ႇငွၵ်ႈတူၺ်း လႄႈ ပိူၼ်ႈယိုဝ်းသႂ်ႇမၼ်း မၢတ်ႇၸဵပ်းလိူဝ်ႁႅင်းယၢမ်းလဵဝ်မီးယူႇတီႈႁူင်းယႃၼွင်ၶဵဝ်ၼႆႉ။ တီႈလၢၼ်ႇ ၼၼ်ႉ ၵူၼ်းမၢတ်ႇၸဵပ်းလုတၢႆမီးထႅင်ႈတင်းၼမ်။ ပႆႇၸၢင်ႈၶဝ်ႈၵႂႃႇၸွႆႈဢဝ်မႃးလႆႈ။  – ၸၢႆးဢွင်ႇလုၼ်ႇ သိုပ်ႇလၢတ်ႈထႅင်ႈၼင်ႇၼႆ ။

ယွၼ်ႉပၢင်တိုၵ်းၼႆႉသေ တီႈႁူင်းႁဵၼ်းၸၼ်ႉၸွမ်ပၢႆးၸၢၵ်ႈၾၢႆႇသိုၵ်း DSTA ဝဵင်းပၢင်ႇဢူႈၼၼ်ႉတၢႆ 1 ၵေႃႉ တီႈလၢၼ်ႇ ဢူဝ်ႊရီႊယႅၼ်ႊ ထိူဝ်ႊ ၼွင်ၶဵဝ်ၼၼ်ႉ မၢတ်ႇၸဵပ်းလုတၢႆတင်းၼမ်။ ၶႃႈႁၢပ်ႇၵၢၼ်ၶုၼ် ဢၼ်ၺႃးတိၺွပ်းၵႂႃႇၸွမ်း ၵေႃႈ မီးတင်းၼမ်ဝႃႈၼႆ။

ၸၢႆးဢၢႆႈလွႆ ၵူၼ်းပၢင်ႁူႈလၢတ်ႈတီႈၽူႈတွႆႇႁွၵ်ႈဝႃႈ – “မိူင်းယင်းပႆႇလႅင်း လႆႈငိၼ်းသဵင်မၢၵ်ႇလူင် ယိုဝ်းမႃးတၢင်း ၸၼ်ႉၸွမ် DSTA မွၵ်ႈ5-6-7 လုၵ်ႈ။ မႃးတူၵ်းပႃးႁိမ်းၸမ်ဝၢၼ်ႈ ယၢၼ်ၵႆတၢင်းဝၢၼ်ႈ မွၵ်ႈ 1 လၵ်းၼႆႉၵူၺ်း။ ၵူၼ်းဝၢၼ်ႈတူၵ်းၸႂ်ၵူဝ်ႁႄ။ ၵူၺ်းၵႃႈဢမ်ႇတိူဝ်ႉၵူၼ်းဝၢၼ်ႈၼင်ႇၵဝ်ႇ တိူဝ်ႉၺႃးၵူၼ်း ႁုင်ၶဝ်ႈၽၵ်းတီႈႁူင်းႁဵၼ်းၶဝ် တၢႆၼိုင်ႈၵေႃႉ။ လိူဝ်ၼၼ်ႉတႄႉ လွင်ႈမၢတ်ႇၸဵပ်းလုတၢႆ မီးၵႃႈႁိုဝ် ဢမ်ႇ လႆႈ ႁူႉၸွမ်း ”- ဝႃႈၼႆ။

Photo Credit to Lashio Media – ၶူဝ်ႁူၺ်ႈၵိုတ်ႈ ဢၼ်ၺႃးၸုမ်းဢူၺ်းလီ ပွႆႇမၢၵ်ႇယႃႉလႅဝ် ဝၼ်းတီႈ 15/8/2019 ယၢမ်းၵၢင်ၼႂ်

ဢၼ်ၸုမ်းဢူၺ်းလီၶဝ်ႈယိုဝ်းႁူင်းႁဵၼ်းလႄႈတပ်ႉပၢင်သဝ်း သိုၵ်းမၢၼ်ႈၼႆႉ ပဵၼ်ယွၼ်ႉသိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းတူင်ႉၼိုင် ပၵ်းတပ်ႉမႂ်ႇ ၸွမ်းထိူၼ်ႇၸွမ်းၶိူဝ်းၼမ်မႃး ႁဵတ်းႁႂ်ႈၸုမ်းယိပ်းၵွင်ႈၵၢင်ႇ ယူႇယၢပ်ႇမႃးလႄႈ ၸင်ႇလႆႈၶဝ်ႈလူမ်ႇထိုင်ၼႂ်းဝဵင်း ၼႆ တႃးဢၢႆႈၵျေႃႇ ၽူႈၶၢၼ်ပၢၵ်ႇ သိုၵ်းတဢၢင်း လၢတ်ႈတီႈၽူႈတွႆႇႁွၵ်ႈ ၼင်ႇၼႆ။

ယွၼ်ႉပိူဝ်ႈသိုၵ်းမၢၼ်ႈထႅမ်ႁႅင်းသိုၵ်း လေႃႇတိုၵ်းမႃးတိၵ်းတိၵ်း ႁဝ်းၸၢဝ်းၶိူဝ်းယူႇယၢပ်ႇၼႃႇ ယဝ်ႉလႄႈ ၸင်ႇလႆႈယိုဝ်းၶဝ်ၶိုၼ်းၶႃႈဢေႃႈ။ ၼႂ်ၼႆႉႁဝ်းၶႃႈၶဝ်ႈယိုဝ်းၶဝ် 5 တီႈ။ လွင်ႈတၢႆမၢတ်ႇတႄႉၶႃႈ ၶဝ်ပႆႇလႆႈႁူႉ တႅတ်ႈတေႃး လွင်ႈၶႃႈႁၢပ်ႇၵၢၼ်ၶုၼ် ၺႃးတိဢၼ်ဝႃႈၼၼ်ႉၵေႃႈၶႃႈၶဝ် ပႆႇလႆႈၶၢဝ်ႇသင်   – ဝႃႈၼႆ။

ပူၼ်ႉမႃး သွင်သၢမ်ဝၼ်း မိူဝ်ႈဝၼ်းတီႈ 12/8/2019 ၼၼ်ႉ  ၸုမ်းဢူၺ်းလီပွတ်းႁွင်ႇ 3 ၸုမ်း TNLA , AA, MNDAA ဢွၵ်ႇလိၵ်ႈပိုၼ်ၽၢဝ်ႇဝႃႈ တပ်ႉသိုပ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်း တူင်ႉၼိုင် ပၵ်းတပ်ႉမႂ်ႇ ႁွၼ်ႈထဝ်ႇ သွၵ်ႈတဝ်ၼႃႈ ၼႂ်းလိၼ်ၸၢဝ်းၶိူဝ်းလႄႈ ပၢင်တိုၵ်းလႆႈၵႂၢင်ႈမႃးတိၵ်းတိၵ်း။ သင်ဝႃႈ သိုၵ်းတပ်ႉမတေႃႇ ယင်းတိုၵ်ႉထႅမ်ႁႅင်း သိုၵ်းၶိုၼ်ႈမႃးယူႇထႅင်ႈတႄႉ ပေႃးပဵၼ်လွင်ႈႁၢႆႉၸႃႉမႃး  သိုၵ်းတပ်ႉမတေႃႇ  တေလႆႈႁပ်ႈပုၼ်ႈၽွၼ်း တင်းမူတ်း – ဝႃႈၼႆဝႆႉ။

ဝၼ်းတီႈ 14/8/2019 သိုပ်းလူင်ပွင်ၸိုင်ႈမၢၼ်ႈ  ပိုၼ်ၽၢဝ်ႇဝႃႈ – ယူႇတီႈသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်း တေႃႇၵၼ်မႃး 3 ၵမ်း၊ ၼႂ်းမိူင်းတႆး 4 တိူင်းသိုၵ်း လႄႈ မိူင်းၶၢင် 1 တိူင်းသိုၵ်း (လိူၼ်ဢေႃးၵတ်ႉသ် သဵင် ပဵၼ် ဝၼ်းလိုၼ်းသုတ်း) – ဝၵ်ႉဢဝ်တိုဝ်ႉတၢင်းၼႆႉသေ ၸိူဝ်းပႆႇလူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း NCA  ၸိူဝ်းၼၼ်ႉယႃႇပႂ်ႉမိုဝ်ႉ ပႂ်ႉယၢမ်းသေ ယႃႇဝႆႉၶေႃႈၼွင်ႇငိူၼ်ႈၶႆသင်သေ လီမႃးလူင်းၽႂ်းၽႂ်းဝႃႈၼႆ။ ၵူၺ်းၵႃႈ လွင်ႈႁႅၼ်းသိုၵ်းၶဝ်ႈၼႃႈလိၼ်ၸၢဝ်းၶိူဝ်းတႄႉ ဢမ်ႇၵိုတ်းဢမ်ႇယင်ႉ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းလၢတ်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း