ပၢင်ၵမ်ႉထႅမ် တေႃႇဢွင်ႇသၢၼ်းၸူႉၵျီႇ ဢၼ်ၸတ်းႁဵတ်းတီႈဝဵင်းတႃႈၶီႈလဵၵ်းၼၼ်ႉ မီးၵူၼ်းယိပ်းပၢႆႉ ၸိုဝ်ႈသဵင် ပႃႇတီႇႁူဝ်သိူဝ် (SNLD) (လူၺ်ႈၾၢႆႇပႃႇတီႇဢမ်ႇလႆႈႁူႉၸွမ်းလွင်ႈသင်) သေၶဝ်ႈႁူမ်ႈပၢင် လႄႈ ၵေႃႇမတီႇပွင်ပဵၼ်ပၢင်ပွႆး ၶိုၼ်းမႃးယွမ်းၼွမ်း တီႈလုမ်းပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း ။
ဝၼ်းတီႈ 11/12/2019 ယၢမ်းၵၢင်ဝၼ်း 1 မူင်း ႁူဝ်ပဝ်ႈၵေႃႇမတီႇ ၸတ်းပၢင်ၵမ်ႉထႅမ်တေႃႇဢွင်ႇသၢၼ်းၸုၵျီႇ တီႈတႃႈၶီႈလဵၵ်း – တွၵ်ႇတႃႇမျိၼ်ႉမွင်ႇ၊ ၽူႈပွင်ၵၢၼ် တွၵ်ႇတိူဝ်ႇမျိၼ်ႉသူၺ်ႇ၊ ၽူႈၼမ်းၼႂ်း ၽူႈတၢင်လၢတ်ႈ ဢူးမဵဝ်းမိၼ်း ၶဝ်သၢမ်ၵေႃႉ ႁွတ်ႈထိုင်လုမ်းပႃႇတီႇႁူဝ်သိူဝ် ၸေႈဝဵင်းတႃႈၶီႈလဵၵ်းသေ ယွၼ်းၼွမ်းတၢင်းၽိတ်းတီႈဢၼ်လႆႈ ၸႂ်ႉမႅၼ်ႈပၢႆႉ ငဝ်ႈငုၼ်းတီႇမူဝ်ႇၵရေႇၸီႇၸိူဝ်ႉၶိူဝ်းတႆး SNLD တီႈပၢင်ၵမ်ႉထႅမ်တေႃႇဢွင်ႇသၢၼ်းၸုၵျီႇ ဢၼ်ၸတ်းတီႈဝဵင်းတႃႈၶီႈလဵၵ်း မိူဝ်ႈဝၼ်းတီႈ 10/12/2019 ၼၼ်ႉ။
တွၵ်ႊတိူဝ်ႊ မျိၼ်ႉသူၺ်ႇ ႁူဝ်ပဝ်ႈၾၢႆႇပွင်ပဵၼ်ပၢင်ပွႆး လၢတ်ႈတီႈပၢင်ယွမ်းၼွမ်းၼၼ်ႉဝႃႈ – ႁဝ်းၶႃႈမႃးယွၼ်းၼွမ်း ယွၼ်ႉပိူဝ်ႈလႆႈၸႂ်ႉမႅၼ်ႈပၢႆႉ ပႃႇတီႇႁူဝ်သိူဝ်။ မၼ်းပဵၼ်လွင်ႈ ယိပ်းၽိတ်းဢၼ်မၼ်းၵူၺ်း။ ဢမ်ႇလႆႈတင်ႈၸႂ်ယိပ်းပၢႆႉ SNLD ဝႃႈၼႆ။
ၽူႈတၢင်လၢတ်ႈ ဢူးမဵဝ်းမိၼ်း လၢတ်ႈဝႃႈ – ႁဝ်းၶႃႈၵေႃႈလႆႈသူင်ႇဝႆႉလိၵ်ႈၽိတ်ႈမွၵ်ႇထိုင်ၵူႈၸုမ်းၸုမ်းယူႇ။ သင်ဝႃႈတၢင်းပႃႇတီႇႁူဝ်သိူဝ်မႃးၼႆ ႁႂ်ႈမၼ်းသၢင်ႇထုၵ်ႇၼၼ်ႉ။ ယဝ်ႉၵေႃႈ ႁဵတ်းဝႆႉပၼ်ပႃး ပၢႆႉဢၼ် တႅမ်ႈၸိုဝ်ႈမူႇၸုမ်းဝႆႉၼၼ်ႉ။ တွၼ်ႈတႃႇတႆး ၼႆႉမီးပၢႆႉသွင်ဢၼ်။ တႆး ၼႆဢၼ်ၼိုင်ႈလႄႈ ငဝ်ႈငုၼ်းတီႇမူဝ်ႇၵရေႇၸီႇၸိူဝ်ႉၶိူဝ်းတႆး ၼႆဢၼ်ၼိုင်ႈ။ ဢေးၼွင်ႉၵေႃႉၼိုင်ႈသမ်ႉ ဢမ်ႇတူၺ်းလီလီသေ ၵႂႃႇၸၵ်ႉဢဝ်ပၢႆႉ ငဝ်ႈငုၼ်းတီႇမူဝ်ႇၵရေႇၸီႇၸိူဝ်ႉၶိူဝ်းတႆး ၼၼ်ႉမႃးယိပ်းသေၶဝ်ႈထႅဝ်။ ဢၼ်ၼႆႉဢမ်ႇလႆႈတင်ႈၸႂ်ၶႃႈ။ ပဵၼ်ၵႂႃႇမိူဝ်ႈပႆႇတႄႇပၢင်ပွႆးၼၼ်ႉၵမ်းၼိုင်ႈၵူၺ်း- ဝႃႈၼႆ။
လိူဝ်ၼၼ်ႉ ၸုမ်းၵေႃႇမတီႇပွင်ပဵၼ်ပၢင်ပွႆးၶဝ်လၢတ်ႈဝႃႈ – တေသူင်ႇလိၵ်ႈယွၼ်းၼွမ်းၼၼ်ႉၸူးပႃး လုမ်း SNLD တီႈတႃႈၶီႈလဵၵ်းၼႆႉလႄႈ သူင်ႇၸူးထိုင်တီႈ ငဝ်ႈငုၼ်း SNLD တီႈတႃႈၵုင်ႈပႃးဝႃႈၼႆ။
ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်သမ်ႉယိပ်းပၢႆႉ ပႃးၸိုဝ်ႈပႃႇတီႇႁဝ်းၶႃႈသေ ၶဝ်ႈပၢင်ၵမ်ႉထႅမ်ၼၼ်ႉ ႁဝ်းၶႃႈဢမ်ႇလႆႁူႉၸွမ်း။ ဢမ်ႇပႃးၵၢင်ၸႂ်ႁဝ်းၶႃႈ ၶႃႈယွၼ်ႉပိူဝ်ႈၶဝ်ႁဵတ်းၸိူင်ႉၼႆလႄႈ ႁဵတ်းႁႂ်ႈတုမ်ႉတိူဝ်ႉ ၾၢင်ႁၢင်ႈ ပႃႇတီႇႁူဝ်သိူဝ်ႁဝ်းၶႃႈ ၶႃႈဢေႃႈ ။ ဝၢႆးလင်ၼၼ်ႉ ၶဝ်ၵေႃႈႁူႉဝႃႈၶဝ်ၽိတ်းသေ ၶဝ်မႃးယွၼ်းၼွမ်းၶိုၼ်း။ ဢၼ်ႁဝ်းၶႃႈသၢၼ်ၶတ်းၼႆႉ ပဵၼ်လွင်ႈယိပ်းပၢႆႉၸိုဝ်ႈပႃႇတီႇႁဝ်းၼၼ်ႉၵူၺ်း ။ ပၢင်ၵမ်ႉထႅမ်ၼၼ်ႉႁဝ်းၶႃႈဢမ်ႇၶဝ်ႈႁူမ်ႈသေတႃႉ ႁဝ်းၶႃႈဢမ်ႇလႆႈသၢၼ်ၶတ်း ” ဝႃႈၼႆ။
မိူဝ်းဝၼ်းတီႈ 10/12/2019 ၼၼ်ႉ တေႃႇဢွင်ႇသၢၼ်းၸူႉၵျီ ၽွင်းလူင်ၾၢႆႇၼွၵ်ႈမိူင်း မိူင်းႁူမ်ႈတုမ်ၵႂႃႇၶိုၼ်ႈလုမ်းတြႃး ICJ တႃႇတေႃႇသူႈလွင်ႈဢမု ၶတီးဢၼ်မိူင်းၵမ်ႊပီႊယႃႊ ဢဝ်လိူင်ႈဝႆႉ။ လၢႆလၢႆၸေႈဝဵင်းၼႂ်းမိူင်းႁူမ်ႈတုမ် ဢွၼ်ၵၼ်ၸတ်းပၢင်ၵမ်ႉထႅမ် ပၼ်ႁႅင်း တေႃႇဢွင်ႇသၢၼ်းၸူႉၵျီႇ ။ တီႈတႃႈၶီႈလဵၵ်းၼႆႉသမ်ႉ တူဝ်တႅၼ်းပႃႇတီႇႁူဝ်သိူဝ် ဢမ်ႇလႆႈၶဝ်ႈႁူမ်ႈပၢင်သေတႃႉ မီးၼၢင်းယိင်းၵေႃႉၼိုင်ႈ ယိပ်းပၢႆႉၸိုဝ်ႈပႃႇတီႇၶဝ်ႈႁူမ်ႈပၢင် ထိုင်တီႈ ၵေႃႇမတီႇပွင်ပဵၼ်ပၢင်ပွႆးပေႃးလႆႈမႃးယွမ်းၼွမ်း။
