ၵူၼ်းမိူင်းၵူၵ်း ၸႄႈဝဵင်းမိူင်းသၢတ်ႇ ႁူမ်ႈၵၼ် သၢၼ်ၶတ်းၵၢၼ်ၶုတ်းထၢၼ်ႇႁိၼ်မႃးၶိူဝ်းယႂ်းယူႇသေတႃႉ ယူႇတီႈၾၢႆႇၶွမ်ႊပၼီႊ လူင်းမိုဝ်းၶုတ်းထၢၼ်ႇႁိၼ် တီႈမိူင်းၵူၵ်း ဢမ်ႇယင်ႉ။
မိူဝ်ႈဝၼ်းတီႈ 18/11/2019 ၶွမ်ႊမၼီႊတႄႇၸၢမ်းၶုတ်းထၢၼ်ႇႁိၼ် တၢင်းၸဵင်ႇၸၢၼ်းဝၼ်းတူၵ်း ဝၢၼ်ႈဝဵင်း ဢိူင်ႇမိူင်းၵူၵ်း ၸႄႈဝဵင်း မိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း တေႃႇထိုင်ယၢမ်းလဵဝ် တိုၵ်ႉသိုၵ်ႇၶုတ်းယူႇ ပႂ်ႉၵိုတ်းယင်ႉ ဝႃႈၼႆ။
ၸၢႆးလူင် ၵူၼ်းမိူင်းၵူၵ်း လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၶဝ်ၶုတ်းၸၢမ်းတူၺ်း ပၢၵ်ႈၼႃႈလိၼ်ၵႂႃႇ မွၵ်ႈ 2 ဢေႊၶိူဝ်ႊ ယဝ်ႉ။ ၶဝ်ၶုတ်းၵူႈဝၼ်းၶႃႈယဝ်ႉ။ ႁဝ်းၶႃႈ ႁႂ်ႈၶဝ်ၵိုတ်းၵေႃႈ ၶဝ်ဢမ်ႇၵိုတ်း” ဝႃႈၼႆ။
ၶွမ်ႊပၼီႊဝႃႈတေၸၢမ်းၶုတ်းတူၺ်းၼႆသေတႃႉ ဢဝ်လၢႆးၶုတ်းတႄႉသေ ၶုတ်းဢမ်ႇၵိုတ်းဢမ်ႇယင်ႉလႄႈၵူၼ်းမိူင်းပဵၼ်ၵၼ်သုၵ်ႉယုင်ႈၸႂ် ။ ၵူၼ်းမိူင်းသၢၼ်ၶတ်းမႃးၸဵမ်မိူဝ်ႈၸဝ်ႈၼႃႈတီႈလူင်းတူၺ်းပိုၼ်ႉတီႈ ၊ ၵူၺ်းၵႃႈ ၶွမ်ႊပၼီႊၵေႃႈဢမ်ႇသႂ်ႇၸႂ်ၼိူဝ်ၵူၼ်းမိူင်း တေႃႉၶူဝ်းၶဝ်ႈပိုၼ်ႉတီႈတေႃႇထိုင်ၶၢဝ်းလူင်းမိုဝ်းၶုတ်း တေႃႇထိုင်ယၢမ်းလဵဝ်။
ၸၢႆးလူင်သိုပ်ႇလၢတ်ႈဝႃႈ “ ၵၢၼ်ၶုတ်းထၢၼ်ႇႁိၼ်ၼႆႉ မၼ်းတေတုမ်ႉတိူဝ်ႉၵူၼ်းမိူင်းပိုၼ်ႉတီႈ။ ယဝ်ႉၵေႃႈ သူၼ်ႁႆႈၼႃး၊ ၾိင်ႈ တိုၼ်းသၽႃႇဝလႄႈ လွင်ႈပၢႆးယူႇလီ ၸဵမ်ၸိူဝ်းၼႆႉ ႁဝ်းၶႃႈ ဢွၼ်ၵၼ်မႆႈၸႂ်ၵၼ်ၶႃႈဢေႃႈ၊ ၵွပ်ႈၼၼ်သၢၼ်ၶတ်းမႃးတႃႇသေႇ။ ၶဝ်ဝႃႈၶဝ်ၸၢမ်းၶုတ်းတူၺ်းၵူၺ်းၼႆ။ ၵူၺ်းၵႃႈ ၶဝ်ၶုတ်းတႄႉၶႃႈဢေႃႈ” ဝႃႈၼႆ။
မိူဝ်ႈႁၢင်လိူၼ်ဢွၵ်ႊထိူဝ်ႊၿိူဝ်ႊ 2019 ၼၼ်ႉ ၵူၼ်းမိူင်းၵူၵ်း 300 ပၢႆ ႁူမ်ႈၵၼ် ၸတ်းပၢင်ယွၼ်းသူးလႄႈ သိုပ်ႇၸႆးတႃပၼ် ၼမ်ႉလိၼ်ႁိၼ်ၽႃႇ တွၼ်ႈတႃႇတေလွတ်ႈၽေးၵၢင်းယၢၼ် လွင်ႈၵၢၼ်ၶုတ်းထၢၼ်ႇႁိၼ်ၼႆႉ ဝႃႈၼႆ။
ၶူင်းၵၢၼ်ၶုတ်းထၢၼ်ႇႁိၼ် ၼႂ်းဢိူင်ႇမိူင်းၵူၵ်း ၸႄႈဝဵင်းမိူင်းသၢတ်ႇၼႆႉ လူင်ပွင်ၸိုင်ႈမၢၼ်ႉပၼ်ၶႂၢင်ႉတႃႇၶုတ်းၶၢဝ်းတၢင်း 28 ပီ မိူဝ်ႈလိူၼ်ၵျူႊ လၢႆႊ 2019 ၼၼ်ႉ ၶွမ်ႊပၼီႊထႆး Sahakol Equipment Co. Ltd (SQ) Company လႄႈ ၶွမ်ႊပၼီႊမၢၼ်ႈ ၼွင်ၶမ်း / မြန်မာ ရွှေရေကန် (Golden Lake Co. Ltd) ႁူမ်ႈလႆႈၸႂ် လူင်းလၢႆးမိုဝ်းၵၼ်ဝႆႉ ။
ၼွၵ်ႈလိူဝ်ၼၼ်ႉ ယူႇတီႈ ၵေႃၵပ်းသၢၼ်တူင်ႉၼိုင်တႃႇမႄႈၼမ်ႉမိူင်းတႆး ဢွၵ်ႇၶေႃႈပိုၼ်ၽၢဝ်ႇဝႆႉဝႃႈ “ထၢၼ်ႇႁိၼ် ဢၼ် ၶုတ်းတီႈမိူင်းၵူၵ်းၼႆႉ တေႁဵတ်းႁူင်းၽဝ်ထၢၼ်ႇႁိၼ် 600 မေႊၵႃႊဝတ်ႊ ပိူဝ်ႈတႃႇၸႅၵ်ႇၽႄသူင်ႇႁႅင်းၾႆးၾႃႉၶဝ်ႈပၼ် တၢင်းမိူင်းထႆး။ လိူဝ်ၼၼ်ႉ ၶွမ်ႊပၼီႊၶဝ် ၽႅၼ်ၵၢၼ်တေၶုတ်းထၢၼ်ႇႁိၼ်တေႃႇပီ 300,000 တၢၼ်ႊ။ ၽႅၼ်ၵၢၼ် တေ တေႃႉသူင်ႇၵႂႃႇ တၢင်းမိူင်းလုင်း – မိူင်းႁႆး ထိုင်တေႃၵေႃႉ တႃႈၶီႈလဵၵ်းသေ တေဢဝ်ၶၢမ်ႈၶူဝ်မိုတ်ႈၵိုဝ်းမၢႆ 2 ၶဝ်ႈၵႂႃႇတၢင်း မႄႈသၢႆ ၸိုင်ႈထႆး” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ