ဝၼ်းတီႈ 5/12/2019 ယၢမ်းၵၢင်ၼႂ် ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်းပၢင်ၵႅဝ်ႈ ဝၼ်းၽူႈႁတ်းႁၢၼ် လုၵ်ႉၽိုၼ်ႉ တီႈငဝ်ႈငုၼ်းဝၢၼ်ႈႁႆးၸိုင်ႈတႆးပွတ်းႁွင်ႇ။
ၸဝ်ႈသိုၵ်းလူင် ၸၢႆးၵျေႃႇလႃႉ ၽူႈၼမ်းၼႂ်း 1 SSPP/SSA လၢတ်ႈတီႈၽူႈတွႆႇႁွၵ်ႈဝႃႈ “ ဝၼ်းၽူႈႁတ်းႁၢၼ်လုၵ်ႉၽိုၼ်ႉ ၼႆႉ ဢၼ်ႁဝ်းမၵ်းမၼ်ႈမႃးတႄႉ တႄႇဢဝ် ဝၼ်းတီႈ 5/121978 မႃး ပဵၼ်ဝၼ်းဢၼ် ၵႅမ်ႁူဝ်ပဝ်ႈ SSPP/ SSA ၸဝ်ႈသိူဝ် ၶၼ်ႇ (ႁွင်ႉ) ၸဝ်ႈဢုင်းပွင်ႇ တူၵ်းသုမ်းၼႃႈသိုၵ်းသေ ၸင်ႇမၵ်းမၼ်ႈမႃး။ ၵူၺ်းၵႃႈ ဢမ်ႇမၢႆထိုင်မၼ်းၸဝ်ႈၵေႃႉလဵဝ်။ မၢႆထိုင်ၽူႈႁတ်းႁၢၼ်ၵူႈၸဝ်ႈ။ ၽူႈႁတ်းႁၢၼ် လုၵ်ႉၽိုၼ်ႉ ဢၼ်ဝႃႈၼၼ်ႉ မိူၼ်ၸိူင်ႉၼင်ႇ ၵူႈၵေႃႉႁူႉထိုင်ၵၼ်ၼၼ်ႉၶႃႈယဝ်ႉ။ ပေႃးႁဝ်းတၵ်ႉယမ် တုင်းၸိူဝ်ႉၸၢတ်ႈယဝ်ႉၼႆ ၵေႃႈ တၵ်ႉယမ် ၽူႈႁတ်းႁၢၼ် ၵူႈၸဝ်ႈၵူႈၵေႃႉ မီးၸွမ်းမႃးတႃႇသေႇၶႃႈယဝ်ႉ” ဝႃႈၼႆ။
ၼင်ႇႁိုဝ် ၵူႈၵေႃႉတေဢမ်ႇလိုမ်း ႁႂ်ႈတွင်းၵိုမ်းၽူႈႁတ်းႁၢၼ်လုၵ်ႉၽိုၼ်ႉ တၢင်းလၢႆ ၼင်ႇႁိုဝ် ၵူၼ်းၼုမ်ႇသႅၼ်းႁုၼ်ႈမႂ်ႇ ႁႂ်ႈၸၢင်ႈသိုပ်ႇ လူယိူင်ႈၵႂႃႇတၢင်းၼႃႈၼႆသေ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA လႆႈမၢႆတမ်းမီးဝႆႉမႃး “ ဝၼ်းၽူႈႁတ်းႁၢၼ်လုၵ်ႉၽိုၼ်ႉလႄႈ ပိူင်ၵၢၼ်၊ လၢႆးၵၢၼ်ယွင်ႈယေႃး ဢဝ်ၵုင်ႇမုၼ် ၽူႈႁတ်းႁၢၼ်လုၵ်ႉၽိုၼ်ႉ ဢိၵ်ႇပႃး ၸၼ်ႉထီႉၽူႈႁတ်းႁၢၼ် (4) ၸၼ်ႉ ၸၼ်ႉ (1) ႁတ်းႁၢၼ်သိူဝ်ဝၼ်း၊ (2) ႁၼ်းႁၢၼ် သိူဝ်ၶၼ်ႇ၊ (3) ႁတ်းႁၢၼ် ၸၢမ်မႂ်ႇ (4) ထုၼ်းႁတ်းႁၢၼ် ၸဵမ်ၸိူဝ်းၼႆႉ။
“ ၶေႃႈၵႂၢမ်းၽူႈလုၵ်ႉၽိုၼ်ႉႁဝ်းၶႃႈဝႃႈ လွင်ႈတဵၵ်းတဵင်မီးတီႈလႂ် လွင်ႈလုၵ်ႉၽိုၼ်ႉမီးတီႈၼၼ်ႈ ၸူဝ်ႈၵႃႈၸိူဝ်ႉၸၢတ်ႈဝၢၼ်ႈ မိူင်းႁဝ်း တိုၵ်ႉလႆႈၶၢမ်ႇတဵၵ်းတဵင်ဝႆႉယူႇၵူႈၾၢႆႇ၊ ပႆႇမီးၸၼ်ႉထၢၼ်ႈပဵင်းၵၼ်၊ ပႆႇမီးသုၼ်ႇတႅပ်းတတ်းႁင်းၶေႃ၊ ၵူႈၸိူဝ်ႉ ၸၢတ်ႈၸၢဝ်းၶိူဝ်း ပႆႇမေႃပိၼ်ႇပၢႆႇယူႇႁူမ်ႈၵၼ်၊ ပႆႇမေႃႁၵ်ႉႁွမ်ၵၼ်၊ ၵေႃႇသၢင်ႈၵႂႃႇလႆႈလွင်ႈႁၵ်ႉႁွမ်ၵၼ် ၸိူဝ်းၼႆႉၸိုင် ၽူႈႁတ်းႁၢၼ်လုၵ်ႉၽိုၼ်ႉၼႆၵေႃႈ တိုၼ်းတေသိုပ်ႇမီးသိုပ်ႇပဵၼ်ယူႇတိၵ်းတိၵ်းၶႃႈယဝ်ႉ။ ၵွပ်ႈပိူဝ်ႈၸိူင်ႉၼၼ်လႄႈ ၸိူဝ်း ပဵၼ်သႅၼ်းႁုၼ်ႈမႂ်ႇႁဝ်း ႁႂ်ႈဢွၼ်ၵၼ်လဵပ်းႁဵၼ်း သိုပ်ႇယိူင်းၵႂႃႇတၢင်းၼႃႈ” ၸဝ်ႈသိုၵ်းလူင် ၸၢႆးၵျေႃႇလႃႉ တိုၵ်းသူၼ်း လၢတ်ႈၼႄၵႂႃႇၼင်ၼႆ။
ဝၼ်းၽူႈႁတ်းႁၢၼ်လုၵ်ႉၽိုၼ်ႉၼႆႉ မၵ်းမၼ်ႈပဵၼ်ဝၼ်းတီႈ 5/12/1978 ပဵၼ်ဝၼ်းဢၼ်ႁတ်းႁၢၼ် သိူဝ်ၶၼ်ႇ(ႁွင်ႉ) ၸဝ်ႈ ဢုင်းပွင်ႇ တူၵ်းသုမ်းၼႃႈသိုၵ်းၼၼ်ႉသေ ယိူင်းဢၢၼ်းႁႂ်ႈလႆႈတၵ်ႉယၢမ်တွင်းၵိုမ်းၵုင်ႇၵုၼ်းမုၼ်ငဝ်း ၽူႈႁတ်းႁၢၼ် လုၵ်ႉ ၽိုၼ်ႉၼမ်လၢႆၵႂႃႇၼႃႈၶၢဝ်းႁိုင်ၵူႈၶၢဝ်းယၢမ်းလႄႈ ႁႂ်ႈၸိူဝ်းသႅၼ်းႁုၼ်ႈမႂ်ႇတင်းလင် ပေႃးတေၸၢင်ႈသိုပ်ႇလူယိူင်းၸွမ်း တၢင်းၼႃႈၵႂႃႇၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး လႆႈဢွၼ်ၸတ်းႁဵတ်းပၢင်ၵႅဝ်ႈမႃးၵူႈပီ ဝႃႈၼႆ။
