သဵင်ၵွင်ႈတႅၵ်ႇၼႂ်းၵႄႈမၢၼ်ႈဝႃႈလႄႈၼႃးႁၢင်း ႁိမ်းမၢၼ်ႈၸၢမ် ဢိူင်ႇမိူင်းမု ၸႄႈဝဵင်းၼမ်ႉတူႈ ။ ၵူၼ်းမိူင်း 2 ဝၢၼ်ႈဢမ်ႇၸၢင်ႈဢွၵ်ႇဝၢၼ်ႈမႃး ထိုင်ယၢမ်းလဵဝ်။
သဵင်ၵွင်ႈတႅၵ်ႇ ဝၼ်းတီႈ 28 /11/2019 မိူဝ်ႈၼႆႉ ယၢမ်းၵၢင်ၼႂ် 8 မူင်းထိုင်ၵၢင်ဝၼ်းတဵင်ႈ။ မၢၼ်ႈဝႃႈလႄႈၼႃးႁၢင်းၼႆႉမီးၾၢႆႇၸၢၼ်းမၢၼ်ႈၸၢမ်မွၵ်ႈ 4-5 လၵ်း။
ၸၢႆးၸေႃးလ ၵူၼ်းၼမ်ႉတူႈလၢတ်ႈဝႃႈ – “တပ်ႉသိုၵ်းမၢၼ်ႈ သူင်ႇႁႅင်းသိုၵ်း ၸဵမ်မိူဝ်ႈ 2-3 ဝၼ်းပူၼ်ႉမႃး။ ပွတ်းမၢၼ်ႈဝႃႈ လႄႈၼႃးႁၢင်းသမ်ႉမီး တပ်ႉသိုၵ်းတဢၢင်းလႄႈသိုၵ်းတႆး။ ၵူၼ်းဝၢၼ်ႈဝႃႈ သိုၵ်းမၢၼ်ႈၵႂႃႇယဵပ်ႇၺႃးမၢၵ်ႇ သေ ၸင်ႇယိုဝ်းၵွင်ႈၵႂႃႇ4 ႁူး 5 တၢင်း။ လႄႈၸင်ႇပဵၼ်ပၢင်တိုၵ်း။ တေႃႇထိုင်ယၢမ်းလဵဝ် သဵင်ၵွင်ႈလူင် တိုၵ်ႉမေႃးယူႇ။ ပဵၼ်တၢင်းၸုမ်းလႂ်တႄႉႁဝ်းၶႃႈပႆႇ ၸၢင်ႈယိုၼ်ယၼ် ။ ၵူၼ်းဝၢၼ်ႈတႄႉဝႃႈ ပဵၼ်တၢင်းသိုၵ်းတႆး”- ဝႃႈၼႆ။
ပၢင်တိုၵ်းပဵၼ်ၼႂ်းၵႄႈမၢၼ်ႈဝႃႈလႄႈ ၼႃးႁၢင်း လႄႈ ၵူၼ်းဝၢၼ်ႈ ပႆႇၸၢင်ႈပၢႆႈဢွၵ်ႇမႃး။ ယၢမ်းလဵဝ်ၵေႃႈပႆႇမီးၵူၼ်းပၢႆႈၽေးသိုၵ်း ။ သင်ဝႃႈၶဝ်သိုပ်ႇယိုဝ်းၵၼ်ထႅင်ႈတႄႉ ယူဝ်ၶေးၸၢင်ႈတေမီးၵူၼ်းပၢႆႈၽေးသိုၵ်းယူႇ ၵူၼ်းၼမ်ႉတူႈၵေႃႉၼိုင်ႈလၢတ်ႈ။
ၵဵဝ်ႇၵပ်းလွင်ႈပၢင်တိုၵ်းၼႆႉသေ ယူႇတီႈၽူႈတွႆႇႁွၵ်ႈလႆႈၵပ်းသိုပ်ႇၵႂႃႇၸူးတၢင်း ၾၢႆႇပွင်ႇၶၢဝ်ႇတပ်ႉသိုၵ်းမၢၼ်ႈ ၊ ၽူႈၶၢၼ်ပၢၵ်ႇတပ်ႉသိုၵ်းတႆးယူႇ။ ၵူၺ်းၵႃႈဢမ်ႇမီးၽႂ်ႁပ်ႉၾူၼ်းတွပ်ႇလၢတ်ႈပၼ်လႄႈ ပၢင်တိုၵ်းၼႆႉ ပဵၼ်သိုၵ်းမၢၼ်ႈလႄႈၸုမ်းလႂ်တႄႉဢမ်ႇပႆႇႁူႉ ။